ទីក្រុងបាគូ៖ ដូចការសន្និដ្ឋានរបស់ក្រុមបស្ចិមប្រទេសមែន យន្តហោះដឹកអ្នកដំណើររបស់ក្រុមហ៊ុនអាហ្សឺបៃហ្សង់ អ៊ែឡាញ (Azerbaijan Airlines) ត្រូវបានបាញ់ទម្លាក់ដោយស្នាដៃរបស់រុស្ស៊ីកាលពីសប្ដាហ៍មុន។ ប្រធានាធិបតីអាហ្សឺបៃហ្សង់ លោកអាលីយ៉េវ (Aliyev)…
ទីក្រុងបាគូ៖ ដូចការសន្និដ្ឋានរបស់ក្រុមបស្ចិមប្រទេសមែន យន្តហោះដឹកអ្នកដំណើររបស់ក្រុមហ៊ុនអាហ្សឺបៃហ្សង់ អ៊ែឡាញ (Azerbaijan Airlines) ត្រូវបានបាញ់ទម្លាក់ដោយស្នាដៃរបស់រុស្ស៊ីកាលពីសប្ដាហ៍មុន។ ប្រធានាធិបតីអាហ្សឺបៃហ្សង់ លោកអាលីយ៉េវ (Aliyev) យល់ថាយ៉ាងហោចណាស់លោកចង់ឃើញរុស្ស៊ីទទួលស្គាល់កំហុសរបស់ខ្លួនមុនថ្ងៃចូលឆ្នាំសាកល។
លោកក៏ទាមទារឱ្យអាជ្ញាធររុស្ស៊ីចាប់ខ្លួនជនដៃដល់ និងអ្នកសមគំនិតនៅក្នុងរឿងនេះយកទៅផ្ដន្ទាទោសទៅតាមផ្លូវច្បាប់។ នៅក្នុងចំណោមមនុស្សសរុប៦៧នាក់នៅក្នុងយន្តហោះនោះគិតទាំងអ្នកដំណើរ និងបុគ្គលិករបស់ក្រុមហ៊ុន ៣៨នាក់បានស្លាប់ ខណៈដែល២៩នាក់នៅរស់រានមានជីវិត។ នៅក្នុងចំណោមអ្នកនៅរស់ទាំងនោះក៏មានជនជាតិរុស្ស៊ី៩នាក់ផងដែរ។
យន្តហោះទំនងជារងការវាយប្រហារដោយប្រព័ន្ធការពារដែនអាកាសរបស់រុស្ស៊ីនៅពេលព្យាយាមចុះចតនៅតំបន់ឆេចនី (Chechnya)។ បន្ទាប់មក យន្តហោះនេះបាត់ម្ចាស់ការ និងបកត្រឡប់ក្រោយមករកដែនអាកាសប្រទេសកាហ្សាក់ស្ថានវិញ។ កាលពីថ្ងៃសៅរ៍ លោកពូទីនបានហៅទូរស័ព្ទទៅប្រធានាធិបតីអាហ្សឺបៃហ្សង់ និងសម្ដែងការសោកស្ដាយចំពោះរឿងនេះ។
លោកទំនងជាចង់ឱ្យអាហ្សឺបៃហ្សង់យោគយល់អធ្យាស្រ័យទុកជាមុនបើក្រុមអ្នកស៊ើបអង្កេតរកឃើញថានេះជាស្នាដៃរបស់រុស្ស៊ី។ ប៉ុន្តែលោកមិនបានប្រកាសទទួលខុសត្រូវនៅក្នុងរឿងនេះទេ។ សម្រាប់ប្រមុខដឹកនាំអាហ្សឺបៃហ្សង់ លោកអាលីយ៉េវ លោកហាក់ដូចជាអាក់អន់ស្រពន់ចិត្តយ៉ាងខ្លាំងដែលរុស្ស៊ីព្យាយាមលាក់បាំងរឿងនេះ ធ្វើឱ្យរដ្ឋាភិបាលរបស់លោកវិលក្បុង និងវ៉ៃស្មានទៅរកមូលហេតុអ្វីផ្សេង។
អ្នកខ្លះប៉ាន់ស្មានថាប្រហែលមានសត្វបក្សី១ក្បាល ឬមួយហ្វូងហើរទៅប៉ះយន្តហោះ។ ទន្ទឹមនឹងការទទួលយកនូវការសោកស្ដាយរបស់លោកពូទីន លោកអាលីយ៉េវចង់ឱ្យរុស្ស៊ីប្រកាសទទួលស្គាល់កំហុសជាផ្លូវការ និងផ្ដល់ប្រាក់សំណងចំពោះក្រុមគ្រួសារជនរងគ្រោះដែលស្លាប់ និងរបួស។ សូមរំលឹកថាយន្តហោះរបស់ក្រុមហ៊ុនអាហ្សឹបៃហ្សង់ អ៊ែឡាញបានចាកចេញដំណើរពីទីក្រុងបាគូ (Baku) ប្រទេសអាហ្សឺបៃហ្សង់ សំដៅទៅទីក្រុងក្រូសស្នី (Grozny) នៃតំបន់ឆេចនីរបស់ប្រទេសរុស្ស៊ី។
បន្ទាប់ពីរងការវាយប្រហារដោយប្រព័ន្ធអេឡិចត្រូនិច និងគ្រាប់មីស៊ីលរបស់រុស្ស៊ី យន្តហោះនេះក៏បាត់ម្ចាស់ការ និងហោះក្រវែលឥតទិសដៅពិតប្រាកដនៅលើដែនអាកាសប្រទេសកាហ្សាក់ស្ថាន។ ពេលនោះ យន្តហោះស្ថិតនៅចម្ងាយ៣គីឡូម៉ែត្រពីអាកាសយានដ្ឋាននៃទីក្រុងអាកតូ (Aktau) ហាក់ដូចជាចង់ចុះចតជាបន្ទាន់។ មិនទាន់ចុះចតផង យន្តហោះនេះក៏ធ្លាក់នៅលើឆ្នេរខ្សាច់មាត់សមុទ្រ។
អ្នកដំណើរភាគច្រើនបំផុតជាជនជាតិអាហ្សឺបៃហ្សង់។ ក្រៅពីនេះមានជនជាតិរុស្ស៊ី, កាហ្សាក់ស្ថាន និងកឺកគីស្ថាន (Kyrgyzstan)។ ក្រុមអ្នកជំនាញខាងវិស័យអាកាសចរណ៍សន្និដ្ឋានថាប្រព័ន្ធជីភីអេស (GPS) របស់យន្តហោះទំនងជាបាត់ម្ចាស់ការក្រោយការវាយប្រហារដោយប្រព័ន្ធអគ្គិសនីឆក់ និងអម្បែងគ្រាប់មីស៊ីលរបស់ប្រព័ន្ធការពារដែនអាកាសរុស្ស៊ី។ ប៉ុន្តែកាលពីប៉ុន្មានថ្ងៃមុននេះ អាជ្ញាធររុស្ស៊ីអះអាងផ្សេងពីនេះ។ ពួកគេថាមានហេតុការណ៍ផ្ទុះធុងហ្គាសនៅក្នុងយន្តហោះ។
ចំណុចនេះហើយដែលធ្វើឱ្យប្រធានាធិបតីអាហ្សឺបៃហ្សង់ខឹងសម្បារព្រោះពួកគេមិនព្រមនិយាយត្រង់ៗទេ ប៉ុន្តែព្យាយាមនិយាយបង្វែងដាន ភូតកុហក និងបិទបាំងការពិត។ នៅក្នុងការសន្ទនាគ្នាតាមទូរស័ព្ទនោះ លោកពូទីនហាក់ដូចជាបានទទួលស្គាល់ការពិតបាត់ទៅហើយនៅពេលលោកនិយាយដោយប្រយោលថាប្រព័ន្ធការពារដែនអាកាសរុស្ស៊ីបើកដំណើរការយ៉ាងសកម្មបំផុតដើម្បីតាមប្រមាញ់យន្តហោះដ្រូនរបស់អ៊ុយក្រែន៕
ចែករំលែកព័តមាននេះ