រាជធានីភ្នំពេញ ៖ ចាប់ពីឆ្នាំ២០២៤ ដល់ឆ្នាំ២០២៨ ថវិកាមូលនិធិ ពីថ្នាក់ជាតិ សម្រាប់ទម្លាក់ទៅឱ្យរដ្ឋបាលក្រុង-ស្រុក/ខណ្ឌ និងរដ្ឋបាលឃុំ-សង្កាត់ នឹងមានការកើនឡើង ដោយនៅក្នុងឆ្នាំនីមួយៗ…
រាជធានីភ្នំពេញ ៖ ចាប់ពីឆ្នាំ២០២៤ ដល់ឆ្នាំ២០២៨ ថវិកាមូលនិធិ ពីថ្នាក់ជាតិ សម្រាប់ទម្លាក់ទៅឱ្យរដ្ឋបាលក្រុង-ស្រុក/ខណ្ឌ និងរដ្ឋបាលឃុំ-សង្កាត់ នឹងមានការកើនឡើង ដោយនៅក្នុងឆ្នាំនីមួយៗ ប្រមាណ២០ពាន់លានរៀល ដែលក្នុងនោះគិតជាមធ្យម គឺក្រុង-ស្រុក/ខណ្ឌនីមួយៗ នឹងទទួលបានថវិកាយ៉ាងតិច៨០លានរៀល សម្រាប់ចំណាយលើសេវាផ្នែកសង្គម អនាម័យ និងបរិស្ថាន គ្រាដែលរដ្ឋបាលឃុំ-សង្កាត់នីមួយៗ ទទួលបានក្នុងចន្លោះប្រមាណពី២៨លានរៀល ទៅ៤០លានរៀល សម្រាប់ចំណាយលើសេវា ផ្នែកទាំងនេះ ដូចគ្នា នេះបើតាមការបញ្ជាក់ឱ្យដឹងពីឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ នៅក្នុងពិធីបិទមហាសន្និបាត អាណត្តិទី៣ របស់សមាគមជាតិក្រុមប្រឹក្សារាជធានី-ខេត្ត នាព្រឹកថ្ងៃទី២៥ ខែធ្នូ ឆ្នាំ២០២៤ ដែលធ្វើឡើងនៅមជ្ឈមណ្ឌលសន្និបាត និងពិព័រណ៍កោះពេជ្រ ។
ឯកឧត្តម បន្តថា ទំហំមូលនិធិសម្រាប់រដ្ឋបាលថ្នាក់ក្រោមជាតិនេះ នឹងបន្តបង្កើនឡើងជាបន្តបន្ទាប់រហូតដល់ឆ្នាំ២០២៨ ដោយផ្អែកតាមទំហំតូចធំ នៃដែនសមត្ថកិច្ចរបស់រដ្ឋបាលនីមួយៗ ។
ឯកឧត្តមរដ្ឋលេខាធិការ បានស្នើឱ្យរដ្ឋបាលថ្នាក់ក្រោមជាតិនីមួយៗ បន្តផ្តោតការយកចិត្តទុកដាក់បន្ថែមទៀត លើការអភិវឌ្ឍសមត្ថភាពរបស់ក្រុមប្រឹក្សា នៃរដ្ឋបាលថ្នាក់ក្រោមជាតិនីមួយៗ ក្នុងការដឹកនាំ ការគ្រប់គ្រង និងការតាមដាន ត្រួតពិនិត្យលើការអនុវត្តមុខងារ និងធនធានដែលថ្នាក់ជាតិបានផ្ទេរទៅឱ្យប្រកបដោយប្រសិទ្ធភាព តម្លាភាព គណនេយ្យភាព និងដោយមានការចូលរួមតាមបែបប្រជាធិបតេយ្យ នៅក្នុងដែនសមត្ថកិច្ចរបស់ខ្លួន ។
សូមបញ្ជាក់ថា រដ្ឋបាលក្រុង-ស្រុក/ខណ្ឌ ត្រូវបានផ្ទេរអំណាចក្នុងការផ្តល់សេវា និងការអភិវឌ្ឍមូលដ្ឋានក្នុងវិស័យ ដែលបានចាត់តាំងរួមមាន៖ កសិកម្ម ការអប់រំ រុក្ខាប្រមាញ់ ការគ្រប់គ្រងធនធានធម្មជាតិ និងបរិស្ថាន សុខភាព ការអភិវឌ្ឍសេដ្ឋកិច្ច ការគ្រប់គ្រងធនធានទឹក និងទេសចរណ៍។ ចំណែករដ្ឋបាលឃុំ-សង្កាត់ ត្រូវបានចាត់តាំងទទួលបន្ទុករួមមាន៖ សន្តិសុខ និងបណ្តាប់ធ្នាប់សាធារណៈ សេវាសាធារណៈសំខាន់ៗ សុខុមាលភាពរបស់ប្រជាពលរដ្ឋ ការអភិវឌ្ឍសេដ្ឋកិច្ចសង្គមនិងកម្រិតជីវភាពកាន់តែប្រសើរឡើង ការថែរក្សាបរិស្ថាន បង្កើតការអត់ឱន និងការផ្សះផ្សាជម្លោះ ដែលឆ្លើយតបទៅនឹងតម្រូវការសហគមន៍មូលដ្ឋាន ៕
ចែករំលែកព័តមាននេះ