ខេត្តមណ្ឌលគិរី ៖ ដើម្បីចូលរួមសម្រេចឱ្យបានចក្ខុវិស័យរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស ជាពិសេសការកសាងបាន នូវកម្លាំងពលកម្មជំនាញ ដែលមានជំនាញវិជ្ជាជីវៈច្បាស់លាស់ គំនិតច្នៃប្រតិដ្ឋ និងភាពប្រកួតប្រជែងខ្ពស់ និងដើម្បីធានាថា…
ខេត្តមណ្ឌលគិរី ៖ ដើម្បីចូលរួមសម្រេចឱ្យបានចក្ខុវិស័យរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស ជាពិសេសការកសាងបាន នូវកម្លាំងពលកម្មជំនាញ ដែលមានជំនាញវិជ្ជាជីវៈច្បាស់លាស់ គំនិតច្នៃប្រតិដ្ឋ និងភាពប្រកួតប្រជែងខ្ពស់ និងដើម្បីធានាថា “យុវជនម្នាក់មានជំនាញមួយយ៉ាងតិច ប្រចាំជីវិត” អាជ្ញាធរខេត្តមណ្ឌលគិរី បានជម្រុញដល់យុវជនទាំងអស់ ជាពិសេសយុវជនយុវតី ស្ថិតក្នុងគ្រួសារខ្វះខាតលទ្ធភាពរៀនបន្ត ចូលរៀនជំនាញនៅមជ្ឈមណ្ឌលបណ្តុះបណ្តាលវិជ្ជាជីវៈខេត្ត ដោយឥតគិតថ្លៃ ។
លោក ហ៊ាញ ប៉ុណ្ណា អ្នកនាំពាក្យសាលាខេត្តមណ្ឌលគិរី បានឲ្យដឹងថា រដ្ឋាភិបាលបានបង្កើនការបណ្តុះបណ្តាលជំនាញបច្ចេកទេស និងវិជ្ជាជីវៈ ចំនួន១.៥លាននាក់ ដល់យុវជនមកពីគ្រួសារក្រីក្រ និងគ្រួសារងាយរងគ្រោះ ដោយទទួលបានប្រាក់ឧបត្ថម្ភ ២៨ម៉ឺនរៀលក្នុងមួយខែ រយៈពេល០៤ខែ តាមរយៈអនុសាសន៍ រៀនឱ្យចប់ ឱ្យចេះ ឱ្យមានការងារធ្វើ ។
លោក ប៉ុណ្ណា បន្ថែមថា ជាការឆ្លើយតបនឹងកាអភិវឌ្ឍន៍ជាមួយរាជរដ្ឋាភិបាល និងខេត្ត តាមរយៈគោលនយោបាលទាំងនេះក្នុងនាម ថ្នាក់ដឹកនាំខេត្ត គណៈកម្មាធិការបណ្តុះបណ្តាលខេត្ត ព្រមទាំងក្រុមការងារលេខាធិការដ្ឋានបាននឹងកំពុងធ្វើ សកម្មភាពដំណើរឆ្ពោះទៅមុខបង្កើនគំនិតផ្តួចផ្តើមថ្មីៗ ដើម្បីពន្លឿនកិច្ចការផ្សព្វផ្សាយ និងជ្រើសរើសយុវជនមកចូល រៀននៅ TVET ដល់មូលដ្ឋានភូមិ ឃុំ ស្រុក ដែលចាំបាច់បំផុត ដើម្បីធ្វើឱ្យវិស័យ TVET កាន់តែឆ្លើយតបទៅនឹងតម្រូវការទីផ្សារនៅក្នុងខេត្ត និងក្រៅខេត្ត ទាំងបច្ចុប្បន្ន និងអនាគត ។
លោក ហ៊ាញ ប៊ុណ្ណា បានស្នើសុំដល់អាជ្ញាធរពាក់ព័ន្ធ ត្រូវយកចិត្តទុកដាក់ ក្នុងការជំរុញផ្សព្វផ្សាយដល់យុវជន ក្នុងមូលដ្ឋាន ដែលពុំមានជំនាញ ឬបោះបង់ការសិក្សា ឱ្យវិលត្រឡប់មកបន្តយកជំនាញសម្រាប់អនាគតរបស់យុវជន ក្នុងឆ្នាំ២០២៥ ឱ្យសម្រេចតាមផែនការ នេះបើពុំមានការជំរុញ និងចូលរួមពីអាជ្ញាធរទេ នោះការអភិវឌ្ឍធនធានមនុស្ស និងការកាត់បន្ថយភាពក្រីក្រនៅកម្ពុជា ក៏ពុំអាចសម្រេចបាននោះដែរ។ ម្យ៉ាងទៀត បើយុវជន ដែលជាទំពាំងរបស់យើង ពុំមានជំនាញ តើយើងប្រកួតប្រជែងទីផ្សារ យ៉ាងដូចម្តេច គេនឹងដណ្តើមទីផ្សារពលកម្មជំនាញពីយើង យើងនឹងនៅតែជាជនរងគ្រោះ ក្រីក្រដោយសារគ្មានជំនាញ ហើយអនាគតអ្នកគ្មានជំនាញ ឬជំនាញទាបប្រឈមនឹងបាត់បង់ការងារជាក់ជាពុំខានដោយសារបច្ចេកទេសថ្មីៗ មកជំនួស ។
លោក កោ គីមអាន ប្រធានលេខាធិការដ្ឋាន នៃគណៈកម្មាធិការបណ្តុះបណ្តាលខេត្ត ឱ្យដឹងដែរថា មជ្ឈមណ្ឌលបណ្តុះបណ្តាលវិជ្ជាជីវៈខេត្តមណ្ឌលគិរី ឆ្នាំ២០២៤ មានសិស្សចូលរៀនសរុប ២៤៩នាក់ ស្ត្រី៩៥នាក់ ក្នុងកម្រិតថ្នាក់ជាន់ខ្ពស់បច្ចេកទេស សញ្ញាបត្រវិជ្ជាជីវៈ២ និងកម្មវិធី១.៥លាននាក់ ក្នុងនោះសិស្សបានបញ្ចប់ការងារសិក្សាសរុប ៧២នាក់ ស្ត្រី៤១នាក់ និងសិស្ស ដែលមានការងារធ្វើសរុប៩៥នាក់ ស្ត្រី៤៧នាក់ ៕
ចែករំលែកព័តមាននេះ