រាជធានីភ្នំពេញ ៖ រដ្ឋលេខាធិការក្រសួងកិច្ចការនារី លោកស្រី ញ៉ែម មរកត បានចេញមុខដោយស្នើឲ្យម្ចាស់ផលិតកម្ម ឬអ្នកគ្រប់គ្រងល្មមដល់ពេលបើកលុយដែលជំពាក់តួសម្តែងហើយ ខណៈពេលដែលរឿងរ៉ាវមួយនេះ កំពុងតែក្លាយជាប្រធានបទដ៏ក្តៅគគុកក្នុងការវែកញែកគ្នាលើបណ្តាញសង្គមក្នុងរយៈពេលចុងក្រោយនេះ…
រាជធានីភ្នំពេញ ៖ រដ្ឋលេខាធិការក្រសួងកិច្ចការនារី លោកស្រី ញ៉ែម មរកត បានចេញមុខដោយស្នើឲ្យម្ចាស់ផលិតកម្ម ឬអ្នកគ្រប់គ្រងល្មមដល់ពេលបើកលុយដែលជំពាក់តួសម្តែងហើយ ខណៈពេលដែលរឿងរ៉ាវមួយនេះ កំពុងតែក្លាយជាប្រធានបទដ៏ក្តៅគគុកក្នុងការវែកញែកគ្នាលើបណ្តាញសង្គមក្នុងរយៈពេលចុងក្រោយនេះ ។
ការចេញមុខស្នើសុំពីលោកស្រីជារដ្ឋលេខាធិការខាងលើនេះ ធ្វើឡើងបន្ទាប់ពីលោកស្រីទទួលការផ្តល់ដំណឹងដោយផ្ទាល់ពីបណ្តាអ្នកសិល្បៈចាស់ៗមួយចំនួនដែលកំពុងជួបបញ្ហានេះ ក្នុងពេលដែលលោកស្រីក៏មានការងឿងឆ្ងល់អំពីមូលហេតុនេះផងដែរ ។
តាមរយៈសំណេរបង្ហោះលើបណ្តាញសង្គមលោកស្រី ញ៉ែម មរកត បានលើកឡើងថា បងរ៉ូស តារាសម្តែងបានប្រាប់ខ្ញុំពីការងារដែលគាត់បានធ្វើ ហើយគេមិនព្រមបើកលុយឲ្យ តើមូលហេតុអ្វី ?ខ្ញុំសំណូមពរដល់ម្ចាស់ផលិតកម្ម ឬអ្នកគ្រប់គ្រងល្មមដល់ពេលបើកប្រាក់ពលកម្មជូនគាត់ហើយ ! ម៉ែរ៉ូស សុជាតា ម៉ែណូអែលកូនដំរី ។ល។ ទាំងអស់គ្នា បានចូលរួមជួយកិច្ចការសង្គមច្រើនណាស់ជាមួយជនពិការ និងកិច្ចការសង្គមផ្នែកផ្សេងៗទៀត! ។
អ្នកស្រីថា អាណិតពួកគាត់ណាស់ ប្រឹងធ្វើការដើម្បីក្រពះ ចិញ្ចឹមកូនចៅ ថត១ថ្ងៃៗពីព្រឹលដល់កណ្តាលយប់ក៍មាន តែថៅកែឬអ្នកគ្រប់គ្រងទុកលុយពលកម្មរបស់គាត់ធ្វើអ្វី ម៉េចមិនឆាប់បើកជូនពួកគាត់ ?។ យ៉ាងណា តាមរយៈសំណេរខាងលើនេះ គេឃើញមានអ្នកសិល្បៈជើងចាស់ដែលធ្លាប់ និងកំពុងជួបបញ្ហានេះបានចូលទៅធ្វើការខមមិន ដោយម្នាក់ៗបានថ្លែងអំណរគុណចំពោះការឈឺឆ្អាលពីសំណាក់លោកស្រី ញ៉ែម មរកត ក្នុងពេលដែលពួកគេរំពឹងថា ចំពោះរឿងនេះនឹងមានយុត្តិធម៌ក្នុងពេលឆាប់ៗនេះ ។
ចាត់ទុកថា នេះមិនមែនជាលើកទីមួយទេ ដែលលោកស្រី ញ៉ែម មរកត បានជួយដោះស្រាយបញ្ហានានា សម្រាប់អ្នកសិល្បៈ ពោលកន្លងមក លោកស្រីក៏ធ្លាប់បានចេញមុខជួយដោះស្រាយ និងប្រឹក្សាផ្នែកច្បាប់ទៅដល់អ្នកសិល្បៈក្នុងពេលជួយបញ្ហាផងដែរ ។ គួរបញ្ជាក់ថា កាលពីពេលថ្មីៗនេះ មានអ្នកសិល្បៈមួយចំនួនទាំងចាស់ទាំងក្មេងបានចេញនិយាយដោយឥតលាក់លៀមពីការបណ្តាផលិតករ ឬម្ចាស់ផលិតកម្មមួយចំនួនតូចដែលបានជំពាក់ថ្លៃថតរាប់ឆ្នាំ មិនព្រមទូទាត់អស់ ហើយគេចវេសមិនព្រមដោះស្រាយ ។
តួយ៉ាង តារាសម្តែអ្នកស្រី រ៉ែត រ៉ូស បានលើកឡើងពីបញ្ហានេះជាសាធារណៈថា ផលិតករមួយចំនួនតូចកេងប្រវ័ញ្ចលើកម្លាំងញើសឈាមតួចាស់ៗខ្លាំងណាស់ ឱ្យយើងទៅដល់ទីតាំងម៉ោង7 និង30ព្រឹក ថតរហូតដល់ស្អែកឡើងម៉ោង6:00ព្រឹកវិញបានចប់។ សុំសួរមតិបងប្អូនបន្តិច តើការគិតលុយឲ្យតែមួយថ្ងៃត្រឹមត្រូវដែរទេ សូមខមមិនគាំម្នាក់មួយមក តែខ្ញុំបានប្រាប់ថា ខ្ញុំសុំគិត2ថ្ងៃ តែខាងផលិតកម្មនៅតែគិតឲ្យ១ថ្ងៃ ដូចជាបំបាក់ទឹកចិត្តយាយចាស់តាចាស់ពេកហើយ ។
រឿងថតតាំងពីថ្ងៃទី១០ ខែ១០ មកដល់ថ្ងៃនេះ ហើយរឿងចាក់បញ្ចាំងចង់ចប់ហើយនៅឡើយ តែលុយមិនបើកឱ្យនេះហើយជាមូលហេតុដែលតួចាស់ៗឈឺអត់មានលុយទិញថ្នាំ អត់លុយឱ្យថ្លៃឈ្នួលផ្ទះ ពេលខ្លះត្រូវម្ចាស់ផ្ទះដេញចេញកុំឆ្ងល់ទៀត។
អ្នកស្រីបញ្ជាក់ថា ខ្ញុំមិនចង់លាតត្រដាងរឿងសិល្បៈឱ្យសង្គមយើងដឹងទេ តែវាហួសហេតុពេកកម្លាំងញើសឈាមយើងសោះមិនបើកឱ្យយើងសុំគេបើកលុយអង្វរគេដូចយើងទៅសុំទានគេ ខ្ញុំនិយាយដដែលៗសិល្បៈចាស់ហើយក្រគេដៀលតែថតជំពាក់លុយតួអ្នកក្រសួរថា យុត្តិធម៌ទេ សម្រាប់តួចាស់ដូចខ្ញុំ ៕
ចែករំលែកព័តមាននេះ