ចរាជធានីភ្នំពេញ ៖ មន្ត្រីជំនាញ សាខា ក.ប.ប. រាជធានីភ្នំពេញ សហការជាមួយ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី២៣…
ចរាជធានីភ្នំពេញ ៖ មន្ត្រីជំនាញ សាខា ក.ប.ប. រាជធានីភ្នំពេញ សហការជាមួយ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី២៣ ខែធ្នូឆ្នាំ២០២៤ បានបង្ក្រាបករណីចែកចាយផលិតផលគ្រឿងក្នុងជ្រូកដឹកតាមម៉ូតូរ៉ឺម៉កផ្ទុកជាង៧០០គីឡូក្រាម ខូចគុណភាព គ្មានសុវត្ថិភាព បង្កប៉ះពាល់សុខភាពប្រជាពលរដ្ឋនៅក្នុងសង្កាត់ទួលសង្កែ១ ខណ្ឌប្ញស្សីកែវ រាជធានីភ្នំពេញ ។
ការបង្ក្រាបខាងលើនេះដោយអនុវត្តតាមបទបញ្ជាផ្ទាល់របស់ឧត្តមសនីយ៍ឯក ជួនណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងដឹកនាំបញ្ជាកម្លាំងផ្ទាល់ដោយលោកឧត្តមសេនីយ៍ទោ ពិត បញ្ញា ស្នងការរង ផែនការងារប្រឆាំងបទល្មើសសេដ្ឋកិច្ច និងលោកវរសេនីយ៍ឯក យឹម សុជាតិ នាយការិយាល័យនគរបាលប្រឆាំងបទល្មើសសេដ្ឋកិច្ច ។
លោកវរសេនីយ៍ទោ ម៉ៅ សុទ្ធាគុណ នាយរងការិយាល័យនគរបាលប្រឆាំងបទល្មើសសេដ្ឋកិច្ច ឲ្យដឹងថា បើយោងតាមចម្លើយសារភាពពីបុរសម្ចាស់ម៉ូតូរ៉ឺម៉ក គឺផលិតផលគ្រឿងក្នុងជ្រូកទាំងអស់នេះ រូបគាត់គ្រាន់តែស៊ីឈ្នួលដឹកឱ្យគេតែប៉ុណ្ណោះ មិនមែនរបស់ខ្លួននោះឡើយ ។
បន្ទាប់មក សមត្ថកិច្ចក៏បានធ្វើការអប់រំ និងឱ្យធ្វើកិច្ចសន្យា ចំពោះម្ចាស់ម៉ូតូរ៉ឺម៉ក បញ្ឈប់ការដឹកជញ្ជូនផលិតផលគ្រឿងក្នុងជ្រូកដែលគ្មានប្រភព និងឯកសារច្បាស់លាស់នៅពេលក្រោយទៀត ហើយបានអនុញ្ញាតឱ្យត្រឡប់ទៅផ្ទះវិញ ។
លោកនាយរងការិយាល័យប្រឆាំងបទល្មើសសេដ្ឋកិច្ច បានបញ្ជាក់ថា ផលិតផលទាំងនេះ នាំចូលពីប្រទេសជិតខាង ដែលកន្លងមកសមត្ថកិច្ចតែងតែបង្ក្រាបបានជាបន្តបន្ទាប់ ។ ផលិតផលគ្រឿងក្នុងជ្រូកជាង៧០០គីឡូក្រាម នៅថ្ងៃដដែល សមត្ថកិច្ចចម្រុះបានសម្រេច ដកហូត និងយកទៅបំផ្លាញចោលតាមនីតិវិធី នៅទីលានចាក់សម្រាមខណ្ឌដង្កោ រាជធានីភ្នំពេញ ៕
ចែករំលែកព័តមាននេះ