ខេត្តកំពង់ចាម ៖ នៅលើដងផ្លូវមុខសាលាដំបូងខេត្តនាព្រឹកថ្ងៃទី១៩ ធ្នូ ២០២៤ គេបានឃើញមានការដាក់ពង្រាយកម្លាំងនគរបាល និងអាវុធហត្ថជាច្រើននាក់ តាំងពីពេលព្រឹក រហូតដល់ពេលល្ងាច ដើម្បីពង្រឹងសន្តិសុខនិងសណ្ដាប់ធ្នាប់…
ខេត្តកំពង់ចាម ៖ នៅលើដងផ្លូវមុខសាលាដំបូងខេត្តនាព្រឹកថ្ងៃទី១៩ ធ្នូ ២០២៤ គេបានឃើញមានការដាក់ពង្រាយកម្លាំងនគរបាល និងអាវុធហត្ថជាច្រើននាក់ តាំងពីពេលព្រឹក រហូតដល់ពេលល្ងាច ដើម្បីពង្រឹងសន្តិសុខនិងសណ្ដាប់ធ្នាប់ ខណៈអ្នកសារព័ត៌មានអនឡាញរាប់សិបនាក់បានមកប្រមូលផ្តុំគ្នាមុខតុលាការ គ្រាដែលតំណាងអយ្យការអមសាលាដំបូងខេត្តកោះហៅលោក ផាត់ ហ៊ន ហៅពូហ៊ន ជាអ្នកសារព័ត៌មានអនឡាញឱ្យចូលខ្លួនបំភ្លឺជុំវិញករណីផ្សាយព័ត៌មានពីរោងដាក់រថយន្ត និងបង្គន់ ដែលជារឿងក្តីមួយផ្ទុះមុននេះនៅភូមិហាន់ជ័យ ឃុំហាន់ជ័យ ស្រុកកំពង់សៀម ។
លោក ផាត់ ហ៊ន អ្នកសារព័ត៌មានអនឡាញបានផ្ដល់កិច្ចសម្ភាសន៍ដល់អ្នកសារព័ត៌មានអនឡាញជាច្រើននាក់នៅខាងក្រៅបរិវេណសាលាដំបូងខេត្តកំពង់ចាម នារសៀលថ្ងៃទី១៩ធ្នូ ដោយលើកឡើងថា រូបលោកបានចូលខ្លួនមកបំភ្លឺនៅតំណាងអយ្យការអមសាលាដំបូងខេត្ត នៅវេលាម៉ោង២រសៀលរហូតដល់ម៉ោង៤និង៣០នាទីរសៀល ។ ពេលរូបលោកចូលទៅដល់បន្ទប់ការិយាល័យ ដែលគេបម្រើការងារនោះ គឺមិនមានការបំភិតបំភ័យណាមួយនោះទេ ។ ជាមួយនោះមន្ត្រីបម្រើការងារនៅក្នុងស្ថាប័ននេះបានធ្វើការពន្យល់ដល់លោក (ផាត់ ហ៊ន) ពីសំណុំរឿងនោះថាជាទំនាស់ដីធ្លីពុំមែនជាបទល្មើសព្រហ្មទណ្ឌនោះទេ ។
លោក ផាត់ ហ៊ន បានបន្តឲ្យដឹងទៀតថា រូបលោកបានទទួលកំហុសចំពោះព័ត៌មាន ដែលបានផ្សាយកន្លងមកថា ព័ត៌មានដែលទទួលបានពីភាគីទាំងសងខាងជារឿងមិនពិត ។
លោក ផាត់ ហ៊ន បានទទួលស្គាល់ថា បានផ្សាយធ្វើឲ្យប៉ះពាល់ធ្ងន់ដល់ស្ថាប័នសាលាដំបូងខេត្តដោយចោទថា «តុលាការការពារបង្គន់…» គឺជាព័ត៌មានមិនពិត ព្រោះថាតុលាការមិនបានការពារសកម្មភាពបែបនេះទេ ហើយតុលាការ ក៏មិនអនុញ្ញាតឲ្យសាងសង់បង្គន់ផងដែរ ។ ភារកិច្ចនិងតួនាទីគឺស្ថិតនៅលើអាជ្ញាធរមូលដ្ឋានឯណោះ ដែលជាអ្នកមើលការខុសត្រូវក្នុងការសាងសង់បង្គន់ ។
លោកថា ចំពោះស្ថាប័នសាលាដំបូងខេត្ត មិនទាន់ត្រូវបានបញ្ចប់រឿងរបស់លោកនៅឡើយទេ ដោយខ្លាចរូបលោកឈានជើងចេញមកក្រៅហើយផ្សាយនាំឲ្យប៉ះពាល់បន្ថែមទៀត។
បញ្ហាបង្គន់នោះគឺបុគ្គលឈ្មោះ ធី គឺជាអ្នកធ្វើដោយខ្លួនឯង ហើយថាតុលាការកាត់ក្តីឱ្យឈ្មោះ ធី នេះឈ្នះគឺជារឿងមិនពិតទាល់តែសោះ ។ ដើម្បីបញ្ចៀសកុំឲ្យមានបញ្ហាណាមួយកើតឡើងទៅថ្ងៃក្រោយ មុននឹងធ្វើការផ្សព្វផ្សាយដូចជារឿងនេះ រូបលោកត្រូវតែធ្វើការសាកសួរមកអ្នកនាំពាក្យនៅសាលាដំបូងខេត្តជាមុនសិន រូបលោកគឺផ្សាយដោយឯកតោភាគី ហើយរឿងនេះពុំទាន់រួចទេ គឺឱ្យលោកកែតម្រូវព័ត៌មានដែលបានផ្សព្វផ្សាយកន្លងទៅ ។
លោក ហ៊ន លើកឡើងថា រូបលោកមិនមានការភ័យខ្លាចនោះទេ កំហុសថ្ងៃនេះគឺជាមេរៀនរបស់លោកជាអ្នកប្រព្រឹត្តខុសចំពោះការផ្សាយ ។ ហើយការផ្សាយលើកក្រោយរូបលោកប្ដេជ្ញាចិត្តនិងស្រាវជ្រាវរកប្រភពឲ្យបានច្បាស់លាស់គ្រប់ជ្រុងជ្រោយ ចៀសវាងកុំឲ្យមានកំហុសបន្តទៀត ។ លោកថាសាលាដំបូងខេត្តគឺជាអ្នករងគ្រោះដែរ ព្រោះបុគ្គលឈ្មោះ ធី ធ្លាប់បានអះអាងថាតុលាការកាត់ក្តីឲ្យរូបលោកឈ្នះ តែតាមការពិតគឺតុលាការមិនបានកាត់ឱ្យភាគីខាងណាមួយជាអ្នកឈ្នះក្តីនោះទេ ។
លោកសំណូមពរដល់ស្ថាប័នសាលាដំបូងខេត្ត សូមមេត្តាលើកលែងទោសកំហុសនៃការផ្សាយរបស់លោក ហើយអ្នកព័ត៌មានបើដឹងប្រភពដែលទទួលបានហើយនោះមានការពាក់ព័ន្ធនិងស្ថាប័នតុលាការត្រូវតែព្យាយាមទាក់ទងសុំការបំភ្លឺអ្នកនាំពាក្យរបស់តុលាការ ដើម្បីកុំឲ្យមានបញ្ហាដូចជារូបលោក ។
ខណៈពេលលោក ហ៊ន ដើរចេញពីក្នុងបរិវេណសាលាដំបូងខេត្ត មកដល់ផ្លូវខាងមុខ ត្រូវបានកូនប្រុសតូចអាយុក្រោម ១០ឆ្នាំចេញមករត់ឱបជើងលោក ហ៊ន ឪពុក ដោយមានភាពត្រេកអរ ។ ចំណែកកូនប្រុសរបស់ដើមបណ្ដឹងក៏បានជូនដាច់ផ្កាដល់លោក ហ៊ន ១បាច់ផងដែរ ។
លោក ស្រី សុភ័ក្ត្រ អ្នកនាំពាក្យសាលាខេត្តកំពង់ចាមវិញមានប្រសាសន៍ឲ្យដឹងដែរថា បុគ្គលដែលធ្វើរោងដាក់រថយន្តនិងសង់បង្គន់ឈ្មោះ លឹម សុធី នៅព្រឹកថ្ងៃទី១៩ ធ្នូ ឆ្នាំ២០២៤ បានធ្វើលិខិតមួយច្បាប់គោរពជូនឯកឧត្តម អ៊ុន ចាន់ដា អភិបាលខេត្តកំពង់ចាម ដោយយល់ព្រមរុះរើសំណង់របស់ខ្លួនក្នុងពេលខាងមុខឆាប់ៗនេះ និងប្រគល់ដីជូនដល់រដ្ឋបាលខេត្ត ធ្វើឱ្យដីនេះនឹងក្លាយទៅជាទ្រព្យសម្បត្តិសាធារណៈរបស់រដ្ឋ ។
ជាមួយគ្នានោះភាគីទាំងសងខាង បានធ្វើការសម្របសម្រួលដោយព្រមទទួលដកថយម្នាក់មួយជំហានហើយបញ្ចប់បញ្ហានឹងគ្នាមិនឲ្យកើតមានទៀតនោះទេ គឺបានធ្វើការសម្របសម្រួលដោយមិនមានអ្នកចាញ់អ្នកឈ្នះ ។
សូមបញ្ជាក់ថា នៅឆ្នាំ២០២៥ រដ្ឋបាលខេត្តគ្រោងពង្រីកផ្លូវថ្នល់ ពីជើងភ្នំហាន់ជ័យ មកដល់ផ្សារថ្មគោល ជាយក្រុងកំពង់ចាមហើយ ។
ក្រៅនីតិវិធីពីតុលាការ លោក ផាត់ ហ៊ន ក៏បានទទួលលិខិតព្រមានរបស់ក្រសួងព័ត៌មានចុះថ្ងៃទី២៩ ខែវិច្ឆិកា ឆ្នាំ២០២៤ ដែលចុះហត្ថលេខាដោយឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន ដោយព្រមានលោក ផាត់ ហ៊ន ចាងហ្វាងគេហទំព័រwww.khplus-cambodia.com បញ្ឈប់នៅរាល់ការផ្សព្វផ្សាយព័ត៌មានដោយមិនមានមូលដ្ឋានច្បាស់លាស់និងមានតុល្យភាពនាំឲ្យសាធារណមតិមានការយល់ច្រឡំនិងត្រូវគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈ ។
តាមប្រភពព័ត៌មានចុងក្រោយនៅរសៀលថ្ងៃទី២០ ធ្នូ ២០២៤ អាជ្ញាធរបានចុះទៅរុះរើរោងរថយន្តនោះហើយ ចេញពីមុខផ្ទះដើមបណ្តឹង ។ រោងនេះក៏ត្រូវបានយកចេញរួចហើយបន្ទប់បង្គន់ដែលបានធ្វើឡើងដោយសម្អាងថាដីរបស់ខ្លួន តែបន្ទាប់ពីមានការផ្ទុះឡើងការតវ៉ាភាគីម្ខាងដែលកំពុងសាងសង់ផ្ទះវីឡាមួយនៅទល់មុខគ្នាក៏បានរុះចេញវិញ ។ ពេលនេះមិនខុសពី ក្រោយភ្លៀង មេឃស្រឡះឡើយ ៕
ចែករំលែកព័តមាននេះ