រាជធានីភ្នំពេញ ៖ រដ្ឋមន្ត្រីក្រសួងព័ត៌មាន បើកវេទិកា ជាមួយម្ចាស់ស្ថានីយវិទ្យុ និងទូរទស្សន៍ និងក្រុមហ៊ុនផ្សព្វផ្សាយពាណិជ្ជកម្មដើម្បីស្វះស្វែងរកដំណោះស្រាយរួមគ្នា ធានាឱ្យបាន នូវនិរន្តរភាព នៃដំណើរការប្រព័ន្ធផ្សព្វផ្សាយ…
រាជធានីភ្នំពេញ ៖ រដ្ឋមន្ត្រីក្រសួងព័ត៌មាន បើកវេទិកា ជាមួយម្ចាស់ស្ថានីយវិទ្យុ និងទូរទស្សន៍ និងក្រុមហ៊ុនផ្សព្វផ្សាយពាណិជ្ជកម្មដើម្បីស្វះស្វែងរកដំណោះស្រាយរួមគ្នា ធានាឱ្យបាន នូវនិរន្តរភាព នៃដំណើរការប្រព័ន្ធផ្សព្វផ្សាយ ទាំងបុរាណ និងប្រព័ន្ធផ្សព្វផ្សាយទំនើប ក្នុងបរិបទឌីជីថល ។
ឯកឧត្តមរដ្ឋមន្ត្រី បានគូសបញ្ជាក់ថា ចំពោះមុខ នៃការរីកចម្រើនផ្នែកបច្ចេកវិទ្យាឌីជីថល ប្រព័ន្ធផ្សព្វផ្សាយព័ត៌មាន ប្រឈមមុខនឹងការប្រកួតប្រជែងខ្ពស់ និងការធ្លាក់ចុះចំណូលពីការផ្សព្វផ្សាយពាណិជ្ជកម្ម។ ប្រឈមមុខនឹងបញ្ហាទាំងនេះ ទើបក្រសួងព័ត៌មានបានរៀបចំវេទិកា ជំនួបជាមួយម្ចាស់ស្ថានីយវិទ្យុ ទូរទស្សន៍ និងក្រុមហ៊ុនផ្សព្វផ្សាយពាណិជ្ជកម្ម ដើម្បីខិតខំរិះរកដំណោះស្រាយរួមគ្នា ។
វេទិការវាងក្រសួងព័ត៌មាន និងម្ចាស់ស្ថានីយវិទ្យុ ទូរទស្សន៍ និងក្រុមហ៊ុនផ្សព្វផ្សាយពាណិជ្ជកម្ម សហការរៀបចំដោយក្រសួងព័ត៌មាន និងក្រុមហ៊ុន Marketing Solutions Asia, Ltd MSA ជាក្រុមហ៊ុនផ្សព្វផ្សាយពាណិជ្ជកម្ម ធំជាងគេនៅកម្ពុជា នារសៀលថ្ងៃទី១១ ខែធ្នូ ឆ្នាំ២០២៤ ដោយមានការអញ្ជើញចូលរួមពីតំណាងម្ចាស់ស្ថានីយវិទ្យុ ទូរទស្សន៍ និងក្រុមហ៊ុនភ្នាក់ងារផ្សព្វផ្សាយពាណិជ្ជកម្មកំពុងប្រកបមុខរបរក្នុងប្រទេសកម្ពុជា ។
ឯកឧត្តម នេត្រ ភក្ត្រា បានគូសបញ្ជាក់ថា ក្នុងបរិបទឌីជីថល និងការរីកចម្រើនយ៉ាងឆាប់រហ័ស បច្ចេកវិទ្យាព័ត៌មាន, ប្រព័ន្ធផ្សព្វផ្សាយបុរាណ រួមមានទូរទស្សន៍ វិទ្យុ កាសែត ទស្សនាវដ្តី ប្រឈមមុខនឹងការបាត់បង់ចំណូលពីការផ្សព្វផ្សាយពាណិជ្ជកម្ម ដែលនេះជាបញ្ហាប្រឈមស្រួចស្រាល់មួយ ដែលប្រព័ន្ធផ្សព្វផ្សាយកំពុងជួបប្រទះ ហើយធ្វើឱ្យប្រព័ន្ធផ្សព្វផ្សាយបុរាណមួយចំនួន បានបិទទ្វារ និងកំពុងប្រឈមនឹងបញ្ហា។ ដូច្នេះសម្រាប់កិច្ចពិភាក្សានាពេលនេះ ដើម្បីធ្វើសិក្សាស្វែងយល់ពីបញ្ហាប្រឈម និងតម្រូវការ ហើយរួមគ្នាដោះស្រាយ ៕
ចែករំលែកព័តមាននេះ