រាជធានីភ្នំពេញ ៖ ជនសង្ស័យម្នាក់បានប្រើល្បិចបញ្ឆោតឲ្យបុរសម្នាក់ទៀត ដែលជាអ្នកស្គាល់គ្នាយកលុយទៅដាក់ចូលគណនីធនាគារវីង ហើយខ្លួនអង្គុយចាំម៉ូតូឲ្យ ប៉ុន្តែឆ្លៀតឱកាសម្ចាស់ម៉ូតូចូលទៅក្នុងកន្លែងវីងផុតបន្តិច ជននេះក៏លួចយកម៉ូតូជិះគេចខ្លួនបាត់ស្រមោល ។ ប៉ុន្តែក្រោយមកកម្លាំងនគរបាលខណ្ឌដង្កោ ដឹកនាំដោយលោកវរសេនីយ៍ឯកជឹម…
រាជធានីភ្នំពេញ ៖ ជនសង្ស័យម្នាក់បានប្រើល្បិចបញ្ឆោតឲ្យបុរសម្នាក់ទៀត ដែលជាអ្នកស្គាល់គ្នាយកលុយទៅដាក់ចូលគណនីធនាគារវីង ហើយខ្លួនអង្គុយចាំម៉ូតូឲ្យ ប៉ុន្តែឆ្លៀតឱកាសម្ចាស់ម៉ូតូចូលទៅក្នុងកន្លែងវីងផុតបន្តិច ជននេះក៏លួចយកម៉ូតូជិះគេចខ្លួនបាត់ស្រមោល ។
ប៉ុន្តែក្រោយមកកម្លាំងនគរបាលខណ្ឌដង្កោ ដឹកនាំដោយលោកវរសេនីយ៍ឯកជឹម ស៊ីថា អធិការនគរបាលខណ្ឌ ក្រោមការដឹកនាំបញ្ជាដោយលោកឧត្ដមសេនីយ៍ឯកជូនណារិន្ទ អគ្គស្នងការរង និងជាស្នងការនគរបាលរាជធានីភ្នំពេញពេញ បានធ្វើការស្រាវជ្រាវតាមរយៈប្រព័ន្ធតាមដានសុវត្ថិភាព GPS រហូតកំណត់បានពីគោលដៅដែលជនសង្ស័យកំពុងស្ថិតនៅ រួចក៏បានសហការការណ៍ជាមួយនគរបាលស្រុកស្វាយជ្រុំ ខេត្តស្វាយរៀង ឃាត់ខ្លួនតែម្ដង ។
ការឃាត់ខ្លួនជនជនសង្ស័យនោះបានធ្វើឡើង កាលពីវេលាម៉ោង៦និង៣០នាទីល្ងាច ថ្ងៃទី១០ ខែធ្នូ ឆ្នាំ២០២៤ នៅតាមផ្លូវជាតិលេខ១ នៅត្រង់ចំណុចតូបលក់អំបុក ស្ថិតនៅក្នុងភូមិដូនលែប ឃុំគោកព្រីង ស្រុកស្វាយជ្រុំ ខេត្តស្វាយរៀង ។
ជនសង្ស័យខាងលើឈ្មោះ អ៊ូច ចាន់រិទ្ធ ភេទប្រុស អាយុ៣៨ឆ្នាំ ជនជាតិខ្មែរ ស្នាក់នៅក្នុងភូមិម្ភៃបួន សង្កាត់ព្រៃស ខណ្ឌដង្កោ រាជធានីភ្នំពេញ (មានសារធាតុញៀ.ន)បានធ្វើសកម្មភាពលួចម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០២៤ ពាក់ស្លាកលេខភ្នំពេញ1KJ-5466 ។ ដែលជារបស់អ្នកស្គាល់គ្នាឈ្មោះ ឯម វុទ្ធី ភេទប្រុស អាយុ៤២ឆ្នាំ ជនជាតិខ្មែរ មុខរបរសន្តិសុខរោងចក្រ ទីលំនៅផ្ទះលេខ46 ផ្លូវបេតុង ភូមិព្រៃធំ សង្កាត់ព្រៃស ខណ្ឌដង្កោ រាជធានីភ្នំពេញ ។
នគរបាលបានប្រាប់ឲ្យដឹងថា វេលាម៉ោង៣និង៣០នាទីរសៀល ថ្ងៃ១០ ខែធ្នូ ឆ្នាំ២០២៤ មានបុរសម្នាក់ឈ្មោះ រិន សារុន ហៅតោ អាយុ២៩ឆ្នាំ ទូរស័ព្ទហៅជនរងគ្រោះឲ្យទៅផ្ទះរបស់ខ្លួន ស្ថិតនៅភូមិព្រៃធំខាងលើដែរ ។ ខណៈនោះជនរងគ្រោះក៏បានជិះម៉ូតូខាងលើ ទៅផ្ទះរបស់ឈ្មោះ រិន សារុន នោះហើយក៏បានជួបជនសង្ស័យឈ្មោះ អ៊ូច ចាន់រិទ្ធ កំពុងស្ថិតនៅទីនោះដែរ ។ ជនសង្ស័យក៏បានពឹងឲ្យជនរងគ្រោះជូនទៅដាក់បញ្ជាំទូរស័ព្ទដៃ នៅម្ដុំផ្សារទួលពង្រ ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ហើយជនរងគ្រោះក៏បានឌុបជូនទៅ ។
នគរបាលបានប្រាប់ឲ្យដឹងបន្តទៀតថា ក្រោយបញ្ចាំរួចជនរងគ្រោះក៏បានឌុបជនសង្ស័យត្រឡប់ទៅផ្ទះស្ថិតនៅភូមិម្ភៃបួន សង្កាត់ព្រៃស ខណ្ឌដង្កោវិញ ប៉ុន្តែនៅពេលទៅដល់ផ្ទះដូរលុយវីងមួយកន្លែង នៅក្នុងភូមិនោះដែរ ជនសង្ស័យក៏បានឲ្យជនរងគ្រោះឈប់ ។ បន្ទាប់មកបានឲ្យជនរងគ្រោះទៅដាក់លុយចំនួន០៥ដុល្លារ ចូលគណនីវីងរបស់ឈ្មោះ រិន សារុន ហៅតោ ហើយខ្លួនចាំនៅកន្លែងទុកម៉ូតូ ពេលនោះជនរងគ្រោះក៏បានទៅ ហើយដោយអាងថា ជាអ្នកស្គាល់គ្នាទើបអត់ដកសោម៉ូតូចេញឡើយ ។ លុះពេលជនរងគ្រោះចូលទៅកន្លែងវីងបាត់បន្តិច ស្រាប់តែជនសង្ស័យឆ្លៀតឱកាសល្អ ឃើញម៉ូតូមានសោជាប់ស្រាប់ក៏បានធ្វើសកម្មភាពលួចយកម៉ូតូជិះគេចខ្លួនទៅបាត់ស្រមោលតែម្ដង ។
នគរបាលខាងលើបានបញ្ជាក់ប្រាប់ទៀតថា ក្រោយពេលចេញមកពីផ្ទះវីងវិញបាត់មិនឃើញទាំងម៉ូតូ និងជនសង្ស័យ បែបនេះជនរងគ្រោះដឹងច្បាស់ថា ជនសង្ស័យលួចយកម៉ូតូរបស់ខ្លួន ក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រៃស ឲ្យជួយអន្តរាគមន៍ ឆែកជីភីអេស ដែលបំពាក់នៅជាប់ម៉ូតូ ។
ពេលនោះកម្លាំងនគរបាលខណ្ឌដង្កោ ដឹកនាំដោយលោកវរសេនីយ៍ឯកជឹម ស៊ីថា អធិការនគរបាលខណ្ឌ និងក្រុមការងារបានធ្វើការស្រាវជ្រាវតាមរយៈប្រព័ន្ធតាមដានសុវត្ថិភាពGPS ដែលបំពាក់នៅជាប់ម៉ូតូ ក៏បានដឹងពីពីទីតាំងជនសង្ស័យកំពុងស្ថិតនៅតាមផ្លូវជាតិលេខ១ ស្ថិតនៅភូមិដូនលែប ឃុំគោកព្រីង ស្រុកស្វាយជ្រុំ ខេត្តស្វាយរៀង ។
នគរបាលបានប្រាប់ឲ្យដឹងបន្ថែមផងដែរថា បន្ទាប់មកនៅវេលាម៉ោង១៨និង៣០នាទីល្ងាចថ្ងៃខែឆ្នាំដដែល នគរបាលខាងលើបានសហការណ៍ជាមួយសមត្ថកិច្ចនគរបាលស្រុកស្វាយជ្រុំ ខេត្តស្វាយរៀង ធ្វើការឃាត់ខ្លួនជនសង្ស័យខាងលើ រួមទាំងម៉ូតូដែលលួចយកពីជនរងគ្រោះ ។
ក្រោយមកបាននាំយកមកកាន់អធិការដ្ឋាននគរបាលខណ្ឌដង្កោ ដើម្បីធ្វើការសាកសួរ និងកសាងសំណុំរឿងបញ្ចូនទៅកានសាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ