រាជធានីភ្នំពេញ ៖ ក្រុមប្រឹក្សារាជធានីភ្នំពេញ សូមឱ្យជួយពន្លឿនការតទឹកស្អាត ជូនប្រជាពលរដ្ឋប្រើប្រាស់នៅក្នុងសង្កាត់ ចំនួន៣ ក្នុងខណ្ឌកំបូល និងសូមបន្តការផ្សព្វផ្សាយច្បាប់ចរារណ៍ អោយបានច្រើន ពិសេសនៅតាមសាលារៀន…
រាជធានីភ្នំពេញ ៖ ក្រុមប្រឹក្សារាជធានីភ្នំពេញ សូមឱ្យជួយពន្លឿនការតទឹកស្អាត ជូនប្រជាពលរដ្ឋប្រើប្រាស់នៅក្នុងសង្កាត់ ចំនួន៣ ក្នុងខណ្ឌកំបូល និងសូមបន្តការផ្សព្វផ្សាយច្បាប់ចរារណ៍ អោយបានច្រើន ពិសេសនៅតាមសាលារៀន ដើម្បីអោយសិស្សានុសិស្ស បានយល់ និងចូលរួមអនុវត្តច្បាប់ចរាចរណ៍ផ្លូវគោក ខណៈដែលនៅក្នុងមួយខែវិច្ឆិកា ឆ្នាំ២០២៤នេះ គ្រោះថ្នាក់ចរាចរណ៍ បានកើនឡើងរហូតដល់១០លើក ។
ការស្នើនេះ បានធ្វើឡើងនាព្រឹកថ្ងៃទី១២ ខែធ្នូ ឆ្នាំ២០២៤នេះ ក្នុងកិច្ចប្រជុំសាមញ្ញ លើកទី៧ របស់ក្រុមប្រឹក្សារាជធានីភ្នំពេញ ឆ្នាំទី១ អាណត្តិទី៤ នៅសាលារាជធានីភ្នំពេញ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ឆាយ វីរៈ អភិបាលរង តំណាងលោក ឃួង ស្រេង អភិបាលរាជធានីភ្នំពេញ ។
លោក ម៉ប់ សារិន ក្នុងឱកាសនោះ បានមានប្រសាសន៍កោតសរសើរចំពោះរដ្ឋបាលរាជធានីភ្នំពេញ និងកងកម្លាំងមានសមត្ថកិច្ច ដែលបានយកអស់កម្លាំងកាយចិត្តក្នុងកិច្ចការពារសន្តិសុខ សណ្តាប់ធ្នាប់ ក្នុងរយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២៤ បានយ៉ាងល្អប្រសើរ បង្កលក្ខណៈឱ្យបងប្អូនប្រជាពលរដ្ឋខ្មែរ និងជនបរទេស ចូលរួមដើរលេងកម្សាន្តប្រកបដោយទឹកមុខសប្បាយរីករាយ ប្រមាណជាង ៦លាននាក់ ។
បន្ថែមពីនេះ សមាជិកក្រុមប្រឹក្សារាជធានីភ្នំពេញ ក៏បានសម្តែងពីការកោតសរសើរកងកម្លាំងមានសមត្ថកិច្ចផងដែរ ដែលបានខិតខំបំពេញភារកិច្ចរហូតធ្វើអោយបទល្មើស ក្នុងខែវិច្ឆិកានេះ បានថយចុះ ប៉ុន្តែបែរជាគ្រោះថ្នាក់ចរាចរណ៍ បានកើនឡើងរហូត១០ករណី ដូច្នេះស្នើឱ្យរដ្ឋបាលរាជធានីភ្នំពេញ បន្តការផ្សព្វផ្សាយច្បាប់ចរារណ៍ អោយបានច្រើន ពិសេសនៅតាមសាលារៀន ដើម្បីអោយសិស្សានុសិស្ស បានយល់ និងចូលរួមអនុវត្តច្បាប់ចរាចរណ៍ផ្លូវគោក និងសូមជួយពន្លឿនការតទឹកស្អាត ជូនប្រជាពលរដ្ឋប្រើប្រាស់ នៅក្នុងសង្កាត់ ចំនួន៣ ក្នុងខណ្ឌកំបូល ។
ចំពោះការសំណូមពរខាងលើនេះ លោក ឆាយ វីរៈ ក៏ដូចជាតំណាងរដ្ឋាករទឹកស្វយ័តក្រុងភ្នំពេញ បានលើកឡើងថា នៅសង្កាត់ស្នោ កាលពីឆ្នាំ២០២២ ឫ២០២៣ គឺពិតជាមានការខ្វះទឹកស្អាតប្រើប្រាស់ ប៉ុន្តែឆ្នាំនេះ អាចនៅខ្វះតិចតួចទេ។ យើងអាចដោះស្រាយបានល្អ លើការផ្គត់ផ្គង់ទឹកស្អាតនេះ ដោយនៅថ្ងៃទី១៦ ខែធ្នូ ឆ្នាំ២០២៤នេះ យើងនឹងសម្ពោធអនុស្ថានីយផលិតទឹកស្អាតបឹងធំ ដែលមានសមត្ថភាពផលិតទឹកស្អាត បានប្រមាណ៦,០០០មែត្រគូបក្នុង១ថ្ងៃ ជាមួយនឹងការតភ្ជាប់បំពង់មេធំ បានសម្រេចមុនផែនការ ដែលគ្រោងអនុវត្តនៅឆ្នាំ២០២៥ ។
លោក ឆាយ វីរៈ អភិបាលរងរាជធានីភ្នំពេញ បានបន្តថា ការកោតសរសើរចំពោះរដ្ឋបាលរាជធានីភ្នំពេញ និងកងកម្លាំងមានសមត្ថកិច្ច ជាការជម្រុញលើកទឹកចិត្តឱ្យរដ្ឋបាលរាជធានីភ្នំពេញ បន្តបំពេញការងារជូនរាជរដ្ឋាភិបាល និងប្រជាពលរដ្ឋ កាន់តែល្អថែមទៀត ៕
ចែករំលែកព័តមាននេះ