រាជធានីភ្នំពេញ ៖ តារាចម្រៀងលោកព្រាប សុវត្ថិ បានសម្រេចលាលែងចេញពីក្របខណ្ឌនៃកងយោធពលខេមរភិន្ទហើយ បន្ទាប់ពីលោកបានកាន់តួនាទី និងឋានន្តរស័ក្តិជាវរសេនីយ៍ឯក និងជានាយរងការិយាល័យទី៥នៃកងទ័ពជើងគោកអស់ជាច្រើនឆ្នាំមកនេះ ។ យ៉ាងណា…
រាជធានីភ្នំពេញ ៖ តារាចម្រៀងលោកព្រាប សុវត្ថិ បានសម្រេចលាលែងចេញពីក្របខណ្ឌនៃកងយោធពលខេមរភិន្ទហើយ បន្ទាប់ពីលោកបានកាន់តួនាទី និងឋានន្តរស័ក្តិជាវរសេនីយ៍ឯក និងជានាយរងការិយាល័យទី៥នៃកងទ័ពជើងគោកអស់ជាច្រើនឆ្នាំមកនេះ ។
យ៉ាងណា តារាចម្រៀងរូបនេះបានលាលែងពីក្របខណ្ឌមន្ត្រីរាជការប៉ុណ្ណោះ ក្នុងពេលដែលគោរមងារជាឧកញ៉ារបស់លោកគឺនៅតែរក្សាដដែល ។ បើយោងតាមអនុក្រិតរបស់រាជរដ្ឋាភិបាលដែលត្រូវបានចុះហត្ថលេខាដោយរដ្ឋមន្ត្រីក្រសួងការពារជាតិ និងត្រូវបានផ្សព្វផ្សាយតាមបណ្តាញសង្គមនោះបានឲ្យដឹងថា លោកជាវរសេនីយ៍ឯក ព្រាប សុវត្ថិ អត្តលេខ០៤៨៦៩៤ ជានាយរងការិយាល័យទី៥ នៃកងទ័ពជើងគោក ត្រូវបានលាលែងពីក្របខណ្ឌនៃកងយោធពលខេមរភិន្ទ ដោយសុំរក្សាទុកគោរមងារជាឧកញ៉ា ។
ទោះជាយ៉ាងណា ការលាលែងពីក្របខណ្ឌរបស់តារាចម្រៀងលោក ព្រាប សុវត្ថិ នាពេលនេះ គឺជាការត្រឹមត្រូវ ព្រោះច្បាប់បានតម្រូវឲ្យជ្រើសរើសយកមុខងារតែមួយប៉ុណ្ណោះ រវាងក្របខណ្ឌជាមន្ត្រីរាជការ ឬមុខងារឧកញ៉ា ។
ជាការកត់សម្គាល់មុន សុំលាលែងពីក្របខណ្ឌជាមន្ត្រីនៃកងយោធពលខេមរភូមិន្ទរបស់តារាចម្រៀងលោក ព្រាប សុវត្ថិ នាពេលនេះ កន្លងមកមហាជនតិចណាស់ដែលបានដឹង ដោយសារតែតារារូបនេះហាក់មិនសូវបង្ហាញខ្លួនក្នុងសម្លៀកបំពាក់ជាទាហាននោះឡើយ ។
ជាការកត់សម្គាល់ កន្លងមកគេក៏ធ្លាប់បានប្រទះឃើញរូបភាពរបស់លោកមួយសន្លឹកនៅលើបណ្តាញសង្គម នៅក្នុងអំឡុងពេលលោកប្រជុំជួរ ដោយតារារូបនេះបានគ្រងសម្លៀកបំពាក់ឈុតទាហានពាក់ស័ក្តិ៥ ។
ជាងនេះទៅទៀត កាលពីអំឡុងដែលប្រទេសកម្ពុជាកំពុងរាតត្បាតនូវជំងឺកូវីដ១៩នោះ នៅក្នុងលិខិតមួយរបស់លោក ព្រាប សុវត្ថិ ផ្ញើជូនរដ្ឋមន្ត្រីក្រសួងសុខាភិបាល ដើម្បីចូលរួមបរិច្ចាគថវិកាចូលរួមបេសកកម្មប្រយុទ្ធប្រឆាំងនឹងជំងឺរាតត្បាតដ៏កាចសាហាវមួយនេះ តារារូបនេះក៏បានប្រើប្រាស់ឋានន្តរស័ក្តិ និងតួនាទីក្នុងក្របខណ្ឌនៃកងយោធិពលខេមរភូមិន្ទនេះផងដែរ ។
តាមរយៈលិខិតនោះបានបញ្ជាក់ថា «ខ្ញុំបាទវរសេនីយ៍ឯក ព្រាប សុវត្ថិ នាយរងការិយាល័យទី៥ កងទ័ពជើងគោក សូមគោរពជូន ឯកឧត្តម វេជ្ជបណ្ឌិតសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ជាទីគោរពដ៏ខ្ពង់ខ្ពស់! ដើម្បីចូលរួមចំណែកជាមួយរាជរដ្ឋាភិបាល ក្នុងការប្រយុទ្ធប្រឆាំងនឹងការរាតត្បាតនៃជំងឺកូវីដ១៩(Covid-19)ខ្ញុំបាទបានស្ម័គ្រចិត្តបរិច្ចាគប្រាប់បៀវត្សផ្ទាល់ខ្លួនរបស់ខ្ញុំបាទចំនួន ៤០០,០០០ ៛ (សែសឹបម៉ឺនរៀល) ចំនួន០៦ខែ (ប្រាំមួយខែ) ដោយរាប់គិតចាប់ពីខែឧសភា សល់ខែ តុលា ឆ្នាំ២០២០ ជូនទៅគណៈកម្មាធិការជាតិប្រយុទ្ធនឹងជំងឺកូវីដ១៩ ដើម្បីប្រើប្រាស់ក្នុងបេសកកម្មដ៏ឧត្តុងឧត្តមរបស់ខ្លួន »។
គួរបញ្ជាក់ថា ក្រៅពីលោកព្រាប សុវត្ថិ មានតួនាទីក្នុងក្រសួងការពារជាតិនោះ កូនប្រុសទាំង៣ របស់តារាចម្រៀងរូបនេះក៏ជាទាហានក្នុងជួរទ័ពផងដែរ ក្នុងនោះ លោក សុវត្ថិ មុនីនាគ មានឋានន្តរស័ក្តិជាពលទោ មានតួនាទីជាជំនួយការផ្នែកចម្រៀងសម័យយោធាភិរម្យការិយាល័យទី៥ លោក សុវត្ថិ មុនីវណ្ណ មានឋានន្តរស័ក្តិជាព្រិន្ទបាលឯក មានតួនាទីជាជំនួយការការិយាល័យទី៥ នៃកងទ័ពជើងគោក និងពលទោ សុវត្ថិ សិរីវុឌ្ឍ មានតួនាទីជាជំនួយការផ្នែកចម្រៀងសម័យយោធាភិរម្យការិយាល័យទី៥ផងដែរ ៕
ចែករំលែកព័តមាននេះ