ខេត្តបាត់ដំបង ៖ លំនៅឋានយ៉ាងធំមួយខ្នងដែលធ្វើអំពីឈើ ត្រូវបានអគ្គិភ័យដែលគេអះអាងថា កើតឡើងដោយការទុស្សេខ្សែចរន្តអគ្គិសនី បានលេបត្របាក់អស់គ្មានសល់ កាលពីវេលាម៉ោង៩និង៥០នាទីយប់ថ្ងៃទី១០ ធ្នូ នៅចំណុចភូមិលកោះតូច ឃុំសំពៅលូន…
ខេត្តបាត់ដំបង ៖ លំនៅឋានយ៉ាងធំមួយខ្នងដែលធ្វើអំពីឈើ ត្រូវបានអគ្គិភ័យដែលគេអះអាងថា កើតឡើងដោយការទុស្សេខ្សែចរន្តអគ្គិសនី បានលេបត្របាក់អស់គ្មានសល់ កាលពីវេលាម៉ោង៩និង៥០នាទីយប់ថ្ងៃទី១០ ធ្នូ នៅចំណុចភូមិលកោះតូច ឃុំសំពៅលូន ស្រុកសំពៅលូន លើកលេងតែម៉ូតូមួយគ្រឿងប៉ុណ្ណោះ ដែលម្ចាស់រំដោះរួចផុតពីចំណីភ្លើង ។
របាយការណ៍ការិយាល័យបង្ការ និងពន្លត់អគ្គិភ័យបានឲ្យដឹងថា លំនៅឋានដែលអគ្គិភ័យលេប
យកអស់គ្មានសល់ ធ្វើពីឈើតម្កល់ប្រក់ស័ង្កសី មានទំហំ០៨x០៩ម៉ែត្រ ដែលមានម្ចាស់ឈ្មោះ អ៊ុង ហ៊ល ភេទប្រុស អាយុ៥៤ឆ្នាំ ។ បើតាមរបាយការណ៍ដដែលបានបញ្ជាក់ថា ម្ចាស់ផ្ទះអះអាងថា អគ្គិភ័យនោះកើតឡើងដោយសារការទុស្សេខ្សែចរន្តអគ្គិសនីត្រង់ «បារ៉ែតភ្លើង» ហើយក៏ឆាបឆេះរាលដាល និងលេបយកផ្ទះទាំងស្រុងភ្លាមៗតែម្ដង ។
អធិការស្រុកសំពៅលូន លោក ទឹម វិឆ័យ បានប្រាប់កោះសន្តិភាពថា នៅយប់កើហេតុ មានតែប្រពន្ធទេដែលនៅចាំផ្ទះ រីឯប្ដីគាត់ទៅដេកនៅចម្ការ ។ លោកថា បើតាមប្រពន្ធជនរងគ្រោះបាននិយាយថា អគ្គិភ័យនោះបានចាប់ផ្ទើមឆេះខាងលើមុន ។ ពេលនោះគាត់នៅលើផ្ទះ ស្រាប់តែត្រង់«បារ៉ែតភ្លើង» បានទុស្សេបែកផ្កាភ្លើង បង្កជាអគ្គិភ័យឆាបឆេះរាលដាលភ្លាមៗរំពេច ។
លោកអធិការបានបញ្ជាក់ថា រថយន្តពន្លត់អគ្គិភ័យបានចេញអន្តរាគមន័ភ្លាមៗដែរ តែដោយសារអគ្គិភ័យខ្លាំង និងលឿនពេក ទើបមិនអាចជួយសង្គ្រោះបាន ។ ប៉ុន្តែគេបានជួយរំដោះម៉ូតូចេញពីចំណីភ្លើងបានតែមួយគ្រឿងប៉ុណ្ណោះ ។ បើតាមរបាយការណ៍ការិយាល័យជំនាញ ដែលបានរាយការណ៍ពីការខូចខាត រួមមាន៖ ក្រៅពីអស់ផ្ទះឈើដ៏ធំមួយខ្នង នៅមានគ្រែចំនួន០៤ តុឈើចំនួន០៣ ប្លង់ដីចំនួន០៧ប្លង់ និងទូរទស្សន៍០១គ្រឿង។
តែជនរងគ្រោះមិនទាន់បានប៉ាន់ស្មានជាទឹកប្រាក់ តើខាតបង់ប៉ុន្មាននៅឡើយទេ ? យ៉ាងណាក្ដី បើតាមលោក ទឹម វិឆ័យ បានបញ្ជាក់ថា អគ្គិភ័យនេះលេបយកតែផ្ទះ និងទ្រព្យសម្បត្តិទាំងអស់ តែមិនបង្កគ្រោះថ្នាក់ដល់មនុស្សទេ ។
លោកបានបន្ថែមថា រថយន្តអន្លត់អគ្គិភ័យបានជួយបាញ់ទឹកពន្លត់ភ្លើង និងទប់ស្កាត់មិនឲ្យឆ្លងរាលដាល តែមិនអាចជួយសង្គ្រោះលំនៅឋាននេះបានឡើយ ព្រោះអគ្គិភ័យឆេះខ្លាំង និងលឿនពេក។ ពេលនេះ មន្ត្រីជំនាញ និងអាជ្ញាធរ កំពុងចុះពិនិត្យនៅឡើយ៕
ចែករំលែកព័តមាននេះ