រាជធានីភ្នំពេញ ៖ អគ្គស្នងការដ្ឋាននគរបាលជាតិ បានចេញសេចក្តីណែនាំ ស្តីពីការប្រើប្រាស់ឯកសណ្ឋាននគរបាលជាតិលើបណ្តាញទំនាក់ទំនងសង្គម ។ យោងតាមសេចក្តីណែនាំរបស់អគ្គស្នងការដ្ឋានគបាលជាតិ នៅថ្ងៃទី៩ ខែធ្នូ ឆ្នាំ២០២៤…
រាជធានីភ្នំពេញ ៖ អគ្គស្នងការដ្ឋាននគរបាលជាតិ បានចេញសេចក្តីណែនាំ ស្តីពីការប្រើប្រាស់ឯកសណ្ឋាននគរបាលជាតិលើបណ្តាញទំនាក់ទំនងសង្គម ។
យោងតាមសេចក្តីណែនាំរបស់អគ្គស្នងការដ្ឋានគបាលជាតិ នៅថ្ងៃទី៩ ខែធ្នូ ឆ្នាំ២០២៤ បានលើកឡើងថា ការប្រើប្រាស់ឯកសណ្ឋាននគរបាលជាតិ ត្រូវស្របតាមអនុក្រឹត្យលេខ១៤ អនប្រ.បក ចុះថ្ងៃទី២៩ ខែមីនា ឆ្នាំ២០០០ ស្តីពីការកែសម្រួលឯកសណ្ឋាន និងផ្លាកសញ្ញារបស់នគរបាលជាតិ។ ត្រូវបានរឹតបន្តឹងលើការប្រើប្រាស់ឯកសណ្ឋាននគរបាលជាតិ ក្នុងការថតសម្តែងជាវីដេអូកំសាន្តតាមរយៈបណ្តាញសង្គមនានា ដើម្បីចៀសវាងការភាន់ច្រឡំណាមួយពីសាធារណជន ។
ស្នងការដ្ឋាននគបាលជាតិ បានលើកឡើងទៀតថា ការបង្ហោះរូបភាពផ្សេងៗ លើបណ្តាញសង្គម ដែលប្រើប្រាស់ឯកសណ្ឋាននគរបាលជាតិ, សាមីខ្លួនត្រូវពិចារណាឱ្យបានម៉ត់ចត់ពីសេចក្តីថ្លៃថ្នូរ និងកិត្តិយសរបស់មន្ត្រីនគរបាលជាតិ ។
ត្រូវប្រើប្រាស់ឯកសណ្ឋាននគរបាលជាតិ ឱ្យបានត្រឹមត្រូវតាមច្បាប់កំណត់ក្នុងពេលបំពេញការងារ ក្នុងពេលបំពេញប្រតិបត្តិការ សន្និសីទសារព័ត៌មាន ជាពិសេស មន្ត្រីនគរបាលជាតិ ដែលប្រើប្រាស់ឯកសណ្ឋានស៊ីវិល មិនត្រូវចូលរួមថតរូបជាមួយកម្លាំងប្រតិបត្តិការ និងមិនត្រូវឈរថតពីក្រោយជនល្មើស ឬជនសង្ស័យ ។
លើសពីនេះ អគ្គស្នងការដ្ឋាននគបាលជាតិ បានលើកឡើងទៀតថា ប្រធាននាយកដ្ឋាន-អង្គភាព ស្នងការដ្ឋាននគរបាលរាជធានី-ខេត្ត ត្រូវធ្វើការណែនាំចំពោះមន្ត្រីក្រោម ឱវាទលើការបង្ហោះវីដេអូផ្សេងៗ ដែលមានលក្ខណៈជាប្រតិបត្តិការ ឬការប្រើប្រាស់កម្លាំងរួម លើបណ្តាញសង្គម ដោយត្រូវមានការអនុញ្ញាតពីប្រធាននាយកដ្ឋាន-អង្គភាព ឬស្នងការនគរបាលសាមីជាមុន ៕
ចែករំលែកព័តមាននេះ