លោកយាយទុរគតដែលរស់ក្នុងខ្ទមរហែករយ៉ៃ ពេលនេះទទួលបានផ្ទះស្នាក់នៅសមរម្យហើយ
- កំពង់ឆ្នាំង
ខេត្តកំពង់ឆ្នាំង ៖ លោកជំទាវ កែ ចន្ទ័មុនី អ្នកតំណាងរាស្ត្រមណ្ឌលកំពង់ឆ្នាំង អមដំណើរដោយលោក សេង វិចិត្រ អភិបាលស្រុករលាប្អៀរ…
ខេត្តកំពង់ឆ្នាំង ៖ លោកជំទាវ កែ ចន្ទ័មុនី អ្នកតំណាងរាស្ត្រមណ្ឌលកំពង់ឆ្នាំង អមដំណើរដោយលោក សេង វិចិត្រ អភិបាលស្រុករលាប្អៀរ នៅព្រឹកថ្ងៃទី៧ ខែធ្នូ ឆ្នាំ២០២៤ បាននាំអំណោយនិងធ្វើពិធីប្រគល់ផ្ទះ១ខ្នង ជូនលោកយាយ ម៉ៅ គឺន រស់នៅភូមិថ្មី ឃុំក្រាំងលាវ ស្រុករលាប្អៀរ។ សូមរំលឹកថា ៖ ស្ត្រីទុរគតរស់ក្នុងខ្ទមដ៏រខាកស្រែកសុំជំនួយខណៈសប្បុរសជនកំពុងកសាងផ្ទះជូន
នៅក្នុងឱកាសនោះ លោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង មានប្រសាសន៍ថា ផ្ទះមួយខ្នងនេះបានមកដោយសារកម្លាំងសាមគ្គី ជាច្រើន ទើបសម្រេចបានផ្ទះមួយខ្នងនេះជូនលោកយាយម៉ៅ គឺន ដែលជាទុរគុណជន រស់នៅក្នុងខ្ទមធ្លុះធ្លាយ និងស្ទើរតែរលំ ។ ដែលនេះបានស្ដែងឲ្យឃើញថា ទីណាមានទុក្ខលំបាកគឺមានក្រុមការងារ និងក្រុមមនុស្សធម៌មកជួយ ស្របតាមគោលនយោបាយរបស់រាជរដ្ឋាភិបាល មិនទុកឲ្យនរណាម្នាក់ ជួបការលំបាកឬស្លាប់ដោយការអត់បាយឡើយ។ ជាក់ស្ដែងថ្ងៃនេះមិនត្រឹមតែលោកយាយទទួលបានផ្ទះស្នាក់នៅយ៉ាងសមរម្យមួយខ្នងនោះទេ លោកយាយនូវបានទទួលអំណោយជាច្រើនទៀត មានដូចជាពូក ខ្នើយ មុង ភួយ អង្ករ មី ទឹកត្រី ទឹកស៊ីអ៊ីវ ចានឆ្នាំង រួមនិងថវិកាមួយចំនួនទៀតដែលសុទ្ឋសឹងតែបានមកពីសប្បុរសជន មកជួយដល់លោកយាយដើម្បីបានរស់នៅសមរម្យហើយមានអាហារហូបចុកសមរម្យ សម្រាប់មួយរយៈធំទៀត។
លោកជំទាវអ្នកតំណាងរាស្ត្រក៏បាន ថ្លែងអំណរគុណដល់អ្នកសារព័ត៌មានដែលបានផ្សព្វផ្សាយធ្វើឲ្យដឹងដល់ថ្នាក់ដឹកនាំ ក៏ដូចជាសប្បុរសជនចុះមកជួយដល់មូលដ្ឋាន។ ហើយក៏សូម សំណូមពរ អាជ្ញាធរមូលដ្ឋានក៏ដូចជាក្រុមការងារមនុស្សធម៌ សូមផ្ដល់ព័ត៌មានទៅដល់ថ្នាក់ដឹកនាំ ដើម្បីចុះជួយទាន់ពេលវេលា ។
លោក សេង វិចិត្រ អភិបាលស្រុករលាប្អៀរ មានប្រសាសន៍ថា ដោយទទួលបានព័ត៌មានស្ដីពីទុក្ខលំបាករបស់លោកយាយ ម៉ៅ គឺន គ្មានទីជម្រកស្នាក់នៅសមរម្យ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានចាត់តាំងក្រុមការងារចុះមកមើលនិងនាំយកនូវអំណោយក៏ផ្ដល់ជូនជាបន្តបន្ទាប់ ។
សម្រាប់ផ្ទះថ្មីមួយខ្នង ដែលប្រគល់ជូននៅថ្ងៃនេះគឺបានមកពីការឧបត្ថម្ភរួមសាមគ្គីគ្នា ដូចជា ស័ង្កសីបានមកពីតំបន់ប្រតិបត្តិការសឹករងកំពង់ឆ្នាំង ដែលនាំយកនូវអំណោយរបស់សម្ដេចមហាបវរធិបតី ហ៊ុន ម៉ាណែត ។គ្រោងដែកនិងឈ្នួលជាងគឺបានពីក្រុមកង់កំពង់ឆ្នាំង និងក្រុមកង់ លី លី ចាក់សាបក្នុងផ្ទះនិងបង្គន់ គឺរូបលោកបានចូលរួមឧបត្ថម្ភ ។ក្រៅពីនោះក៏នៅមានជាសម្ភារៈ ផ្សេងៗដូចជាចានឆ្នាំង មកប្រគល់ជូនលោកយាយថ្ងៃនេះ បានមកពីព្រះអង្គច័ន្ទមុនី និងនៅមានសប្បុរសជនជាច្រើនទៀត ដែលរៀបរាប់មិនអស់ដូចជា ចលនាយុវជនក្រុម 157 ស្រុករលាប្អៀរ ជាដើម។
បើតាមការបញ្ជាក់របស់លោក សៀង ប៊ុនណាត ប្រធានក្រុងកង់កំពង់ឆ្នាំងបានបញ្ជាក់ដែរថា ថវិកាមូលនិធិរបស់ក្រុមកងកំពង់ឆ្នាំង ដែលបានចូលរួមជួយក្នុងការកសាងទិញដែកនិងឈ្នួលជាងជូនលោកយាយមានចំនួន២លាន៦ម៉ឺនរៀល និងគ្រឿងឧបភោគបរិភោគជាបន្តបន្ទាប់ផងដែរ ។
ចែករំលែកព័តមាននេះ