ខេត្តមណ្ឌលគិរី ៖ កូនដំរីព្រៃដ៏អភ័ព្វមួយក្បាលដែលមានអាយុប្រមាណ៥ខែ ត្រូវបានជួយសង្គ្រោះដោយមន្ត្រីឧទ្យានុរក្សនៅឯស្រុកកោះញែក នាល្ងាចថ្ងៃទី០៨ ខែធ្នូ ឆ្នាំ២០២៤ ក្រោយវាខំដើរទាំងជើងឈឺមានរបួស បណ្តាលមកពីអន្ទាក់ព្រានព្រៃ ។…
ខេត្តមណ្ឌលគិរី ៖ កូនដំរីព្រៃដ៏អភ័ព្វមួយក្បាលដែលមានអាយុប្រមាណ៥ខែ ត្រូវបានជួយសង្គ្រោះដោយមន្ត្រីឧទ្យានុរក្សនៅឯស្រុកកោះញែក នាល្ងាចថ្ងៃទី០៨ ខែធ្នូ ឆ្នាំ២០២៤ ក្រោយវាខំដើរទាំងជើងឈឺមានរបួស បណ្តាលមកពីអន្ទាក់ព្រានព្រៃ ។
សេចក្តីរាយការណ៍បានឲ្យដឹងថា នៅវេលាម៉ោង១៧ និង១៧នាទី ថ្ងៃទី០៨ ខែធ្នូ ឆ្នាំ២០២៤ មន្ត្រីឧទ្យានុរក្សដែនជម្រកសត្វព្រៃលំផាត់ ខេត្តមណ្ឌលគិរី បានប្រទះឃើញកូនសត្វដំរីព្រៃ (ឈ្មោល) ចំនួន០១ក្បាល អាយុប្រហែល០៥ខែ ទម្ងន់២០០គីឡូក្រាម រត់តាមបណ្តោយផ្លូវលំ ហាក់កំពុងស្វែងរកជំនួយសង្គ្រោះបន្ទាន់ពីមន្ត្រីឧទ្យានុរក្សស្នាក់ការកណ្តាលរយ៉លើ ដែនជម្រកសត្វព្រៃលំផាត់ ស្ថិតក្នុងភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី ។
សេចក្តីរាយការណ៍បន្តថា ភ្លាមៗនោះមន្ត្រីឧទ្យានុរក្សជាច្រើននាក់បាននាំគ្នាស្ទាក់ព័ទ្ធចាប់ ដើម្បីពិនិត្យមើលក៏ប្រទះឃើញមានស្នាមរបួសនៅត្រង់ចំណុច ក ជើងមុខ ខាងស្តាំ ។
ក្រោយពីមន្ត្រីឧទ្យានុរក្សពិនិត្យលើមុខរបួសដោយយកចិត្តទុកដាក់ រួចធ្វើសេចក្តីសន្និដ្ឋានបានថា គឺរបួសដោយសារជាប់អន្ទាក់ តែសុខភាពកូនសត្វដំរីឈ្មោល០១ក្បាលនេះ គឺនៅមានកម្លាំងមាំមួននៅឡើយ ។
បច្ចុប្បន្នមន្ត្រីឧទ្យានុរក្សដែនជម្រកសត្វព្រៃលំផាត់ កំពុងមើលថែរក្សានៅទីស្នាក់ការកណ្ដាលរយ៉លើ ដែនជម្រកសត្វព្រៃលំផាត់ ភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី ដោយកំពុងមានការទំនាក់ទំនងទៅការអន្តរាគមន៍បន្តដើម្បីថែរក្សាកូនដំរីព្រៃនេះ ៕
ចែករំលែកព័តមាននេះ