មានប្រជាជនជាច្រើនកន្លងមករអ៊ូរឿងធ្វើ ឬ កាត់ ប្លង់ដីនិងផ្ទះគឺស៊ីពេលច្រើន។ ប៉ុន្តែទៅថ្ងៃមុខ តើបច្ចេកវិទ្យានឹងធ្វើអោយរឿងនេះបានស្រួលចិត្តចំពោះប្រជាជនឬទេ? លោកឧបនាយករដ្ឋមន្ដ្រី សាយ សំអាល់ រដ្ឋមន្ដ្រីក្រសួងរៀបចំដែនដី…
មានប្រជាជនជាច្រើនកន្លងមករអ៊ូរឿងធ្វើ ឬ កាត់ ប្លង់ដីនិងផ្ទះគឺស៊ីពេលច្រើន។ ប៉ុន្តែទៅថ្ងៃមុខ តើបច្ចេកវិទ្យានឹងធ្វើអោយរឿងនេះបានស្រួលចិត្តចំពោះប្រជាជនឬទេ?
លោកឧបនាយករដ្ឋមន្ដ្រី សាយ សំអាល់ រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ កាលពីនៅថ្ងៃទី០៥ ខែធ្នូ ឆ្នាំ២០២៤នេះ បានបញ្ជាក់ជាសាធារណៈថា ក្រសួងនឹងរៀបចំប្រែក្លាយសេវាប្រមាណ៥០០មុខ ឲ្យទៅជាសេវាតាមរយៈឌីជីថល ដែលសេវាទាំងនោះគឺមានតាំងពីសូរិយោដីនិងផ្នែកសំណង់។
លោកបានលើកឡើងនៅពេលដែលបានអញ្ជើញជាអធិបតីភាព ក្នុងសន្និបាតបូកសរុបការងារប្រចាំឆ្នាំលើកទី១៤របស់សមាគមអ្នកសាងសង់កម្ពុជានិងពិធីតាំងពិព័រណ៌ឧស្សាហកម្មសំណង់កម្ពុជា-អន្ដរជាតិ ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្យថា ក្រសួងនឹងប្រែក្លាយសេវាប្រមាណ៥០០មុខទាំងផ្នែកសូរិយោដី និង ផ្នែកសំណង់ឲ្យទៅជាតាមរយៈឌីជីថលទាំងអស់។
តាមការពន្យល់របស់លោកឧបនាយករដ្ឋមន្ត្រី នៅពេលដែលសេវាកម្មនេះដំណើរការហើយនោះ នៅពេលដែលពលរដ្ឋចង់លក់ផ្ទះ គឺអាចចូលទៅក្នុងប្រព័ន្ធដែលគេហៅថា App អាចចូលទៅផ្សព្វផ្សាយបាយ ហើយធានាថានឹងមិនមានការលំបាកទេ សំខាន់អោយតែសំណង់ និងលំនៅស្ថាននោះ គឺមានច្បាប់ មានការបង់ពន្ធត្រឹមត្រូវ ។
លោកក៏បានរៀបរាប់ផងដែរថា ការចុះបញ្ជីដីធ្លីនៅពេលឥឡូវនេះ គឺប្រជាពលរដ្ឋត្រូវធ្វើដំណើរទៅការិយាល័យសូរិយោដី ដើម្បីបំពេញបែបបទ ប៉ុន្តែនៅពេលដែលប្រព័ន្ធនេះដំណើរការនោះ គឺពលរដ្ឋ អាចនឹងបំពេញបែបបទតាមទូរស័ព្ទដៃក៏បាន ។
នៅក្នុងករណីដែលក្រសួងអាចរៀបចំបែបនេះបាន វាគឺជារឿងប្រសើរមែនទែន ប៉ុន្តែទោះបីជាយ៉ាងណា ក៏ដោយសូមអោយ App នោះដំណើរការឲ្យបានស្រួលបួលផង ហើយកុំពេលដែលពលរដ្ឋចូលទៅប្រើប្រាស់ វាជួបបញ្ហារអាក់រអូល ។ កន្លងមក មានស្ថាប័នខ្លះប្រកាសបែបនេះដែរ ប៉ុន្តែវានៅតែមានការលំបាក ហើយនៅតែត្រូវការឲ្យពលរដ្ឋ ឫអ្នកដែលមានបំណងស្នើសុំសេវានៅតែត្រូវការទៅរកមន្ត្រីដើម្បីដោះស្រាយអន្តរកម្មនៃការតភ្ជាប់នេះ។
ម្យ៉ាងវិញទៀត អ្វីដែលរំពឹងទុកនោះ នៅក្នុងចំណោមសេវាកម្មទាំងប្រមាណជា ៥០០ នោះ ក៏នឹងអាចរួមបញ្ចូលទាំងសេវាកម្មរត់ការកាត់ប្លង់ និងដំណើរការស្នើសុំសាងសង់ផងដែរ ពីព្រោះកន្លងមក សេវាកម្ម នេះ មានពលរដ្ឋរិះគន់ខ្លះៗដែរ ។ សេវាកម្មទាំងនេះត្រូវបានការពេលវេលាយូរ ចូលខ្ទង់រាប់ខែ បើទោះបីជា ប្លងលំនៅស្ថានឫដីធ្លីដែលរត់នោះ មានប្លងរឹង បង់ពន្ធ និងគោរពតាមគោលការណ៍ច្បាប់គ្រប់ គ្រាន់ក៏ដោយ ។
នៅក្នុងករណីដែលក្រសួងអាចកែប្រែសេវាកម្មនេះបន្ថែមទៀតវាក៏អាចជាចំណុចវិជ្ជមានមួយ ដែលនឹង ជួយសម្រួលនឹងពង្រឹងដល់ការធ្វើឲ្យវិស័យអចលនទ្រព្យនៅកម្ពុជាដែលពេលនេះកំពុងតែមានស្ថានភាព ធាក់ថយ អាចនឹងកែលំអរវិញផងដែរ ។
មកដល់ពេលនេះវិស័យទេសចរណ៍កំពុងតែរើបឡើងវិញហើយ ដូច្នេះមិនយូរទេ វិស័យអចលនទ្រព្យក៏ដូចជាសំណងនឹងអាចប្រសើរឡើងវិញដែរ ហើយប្រសិនបើសេវាកម្មដែលពលរដ្ឋរិះគន់នោះមានការកែលំអរ បន្ថែមទៀតនោះ វាកាន់តែជាកម្លាំងជំរុញបន្ថែមចលនាសម្រាប់គាំទ្រកំណើន ។
នៅពេលនេះវិស័យអចលនទ្រព្យនៅស្ងប់ស្ងាត់ ដំណើរការលក់ក៏ស្ងប់ស្ងាត់ ដូច្នេះប្រសិនបើនៅក្នុងពេល នេះអាចពិនិត្យពិច័យកែសម្រួលសេវាកម្មណាដែលខ្វះខាតឲ្យហើយនៅពេលដែលអ្វីៗប្រសើរឡើងវិញ គឺ សេវាកម្មនឹងដំណើការកាន់តែមានប្រសិទ្ធភាព ។
តាមស្ថិតិដែលសារព័ត៌មាននៅក្នុងស្រុកបានដកស្រង់នៅជិតដំណាច់ឆ្នាំនេះ គម្រោងវិនិយោគក្នុងវិស័យសំណង់ទូទាំងប្រទេសមាន ២.៦៣៣គម្រោងនៅលើ ផ្ទៃក្រឡាសរុបចំនួនជាង១០លានម៉ែត្រក្រឡា និងមានតម្លៃប៉ាន់ស្មានទុនវិនិយោគប្រមាណ៤,៣៣ពាន់លានដុល្លារ។ ស្ថិតិនេះមានការថយចុះ ប្រមាណជា ១៥,១៧ភាគរយ ធៀបនឹងឆ្នាំ ២០២៣ ដែលមាន ២.៩២៤គម្រោង មានផ្ទៃក្រឡាសំណង់ចំនួនជាង ១២លានម៉ែត្រក្រឡា និងមានទុនវិនិយោគប្រមាណ ៥,១ពាន់លានដុល្លារ ។
មកដល់ពេលនេះវិស័យសំណង់និងអចលនទ្រព្យនេះក៏ជាជន្ទល់មួយដ៏សំខាន់សម្រាប់រក្សាកំណើនសេដ្ឋកិច្ចរបស់កម្ពុជាផងដែរ ក្រៅពី កសិកម្ម ទេសចរណ៍ ឧស្សាហកម្មកាត់ដេរ ។ នៅក្នុងករណីដែលសេវាកម្មនានារបស់ក្រសួងមានការកែលំអរ នោះវាក៏នឹងអាចរួមចំណែកនៅក្នុងការធានារប្រក្រតីភាពនិងរីកចំរើននៃវិស័យនេះ ហើយរុញច្រានស្តិតិនៃកំណើនឲ្យកើនឡើងថែមទៀតប្រសិនបើអាច ។ ដូច្នេះ សង្ឃឹមថា ក្រសួងនឹងពិនិត្យមើលនូវរាល់សេវាកម្មដែលអសកម្មហើយកែសម្រួលវា ដើម្បីលុបបំបាត់ការិះគន់របស់ ពលរដ្ឋផង និង ដើម្បីជំរុញល្បឿននៃកំណើនសេដ្ឋកិច្ចរបស់ប្រទេសផង ។
ចែករំលែកព័តមាននេះ