ទីក្រុងប៊ែឡាំង៖ អង្គការសុខភាពពិភពលោកត្រៀមបញ្ជូនក្រុមអ្នកជំនាញទៅប្រទេសកុងហ្គោដើម្បីស៊ើបអង្កេតករណីផ្ទុះជំងឺដ៏ចម្លែកមួយដែលគេមិនទាន់ដឹងថាតើវាជាជំងឺអ្វី ឬបង្កឡើងដោយមេរោគអ្វីពិតប្រាកដទេ។ គ្រាន់តែដឹងថាវាជាជំងឺដ៏កាចសាហាវ និងចម្លែក។ អ្នកដែលឆ្លងមេរោគនេះបានស្លាប់អស់ជាច្រើននាក់ហើយត្រឹមតែ១ប៉ប្រិចភ្នែកតែប៉ុណ្ណោះនៅតំបន់ដាច់ស្រយាល។
ក្រុមអ្នកជំនាញរបស់អង្គការសុខភាពពិភពលោកកំពុងធ្វើដំណើរទៅតំបន់ផាន់ហ្ស៊ី (Panzi)ស្ថិតនៅខេត្តក្វាន់ហ្គោ (Kwango) ប្រទេសកុងហ្គោ។ នៅពេលទៅដល់ទីនោះ ពួកគេនឹងចែកថ្នាំពេទ្យ និងឧបករណ៍ធ្វើតេស្តឆាប់រហ័សដើម្បីវិភាគថាតើជំងឺនេះបង្កឡើងដោយមេរោគអ្វីពិតប្រាកដ។ គ្រូពេទ្យក៏កំពុងធ្វើតេស្តសំណាកឈាមរបស់ជនរងគ្រោះនៅក្នុងមន្ទីរពិសោធផងដែរ។
នៅពេលទទួលបានលទ្ធផលថ្មីៗ អង្គការសុខភាពពិភពលោកនឹងចែករំលែកព័ត៌មាននេះជាបន្ទាន់ទៅកាន់សាធារណៈជនដើម្បីជ្រាបជាព័ត៌មាន។ ប្រធានសាខាអង្គការសុខភាពពិភពលោកប្រចាំតំបន់អាហ្វ្រិកថ្លែងថាអ្វីដែលជាចំណុចអាទិភាពរបស់យើងគឺខិតខំផ្ដល់ការគាំទ្រប្រកបដោយប្រសិទ្ធភាពចំពោះក្រុមគ្រួសារជនរងគ្រោះ និងសហគមន៍ដែលពួកគេរស់នៅ។
យើងកំពុងខិតខំប្រឹងប្រែងតាមគ្រប់មធ្យោបាយដើម្បីកំណត់ភិនភាគជំងឺនេះ, ដើម្បីសិក្សាស្វែងយល់អំពីរបៀបឆ្លងរបស់វា និងដើម្បីធានាថាយើងចាត់វិធានការត្រឹមត្រូវទៅតាមសភាពនៃជំងឺបានទាន់ពេលវេលា។ អង្គការសុខភាពពិភពលោកថ្លែងថារហូតមកដល់ពេលនេះ មនុស្ស៣៩៤នាក់បានឆ្លងជំងឺចម្លែកនេះ។ ក្នុងនោះ អ្នកជំងឺ៣០នាក់បានស្លាប់ហើយ។
ទ្វីបអាហ្វ្រិកឧស្សាហ៍កើតមានជំងឺប្លែកៗ។ កាលពីដប់ឆ្នាំមុនធ្លាប់ផ្ទុះជំងឺអេបូឡា សម្លាប់មនុស្សជាច្រើននាក់ម្ដងហើយ។ អាជ្ញាធរមូលដ្ឋាននិយាយកាលពីប៉ុន្មានថ្ងៃមុននេះថាជំងឺចម្លែក១ទៀតបានសម្លាប់មនុស្ស១៤៣នាក់នៅទីតាំងដដែលនេះកាលពីខែវិច្ឆកា។ អ្នកដែលឆ្លងជំងឺនេះមានរោគសញ្ញាដូចជាឈឺក្បាល, ក្អកស្ងួត, គ្រុនក្ដៅ, ដកដង្ហើមថប់ៗ និងខ្វះគ្រាប់ឈាមក្រហម៕
ចែករំលែកព័តមាននេះ