ខេត្តត្បូងឃ្មុំ ៖ ក្រុមក្មេងទំនើងមានគ្នាជាច្រើននាក់ បានធ្វើសកម្មភាពវាយតប់ និងអុកឡុកក្នុងកម្មវិធីមង្គលការគេមួយនៅភូមិដារផ្សារ ឃុំដារ ស្រុកមេមត់ ដោយធ្វើសកម្មភាពយ៉ាងគគ្លើនធាក់ទម្លាយទ្វារផ្ទះកូនក្រមុំ និងបានវាយកូនកំលោះខៀវភ្នែក និងកាប់ត្រូវរបួសស្មា…
ខេត្តត្បូងឃ្មុំ ៖ ក្រុមក្មេងទំនើងមានគ្នាជាច្រើននាក់ បានធ្វើសកម្មភាពវាយតប់ និងអុកឡុកក្នុងកម្មវិធីមង្គលការគេមួយនៅភូមិដារផ្សារ ឃុំដារ ស្រុកមេមត់ ដោយធ្វើសកម្មភាពយ៉ាងគគ្លើនធាក់ទម្លាយទ្វារផ្ទះកូនក្រមុំ និងបានវាយកូនកំលោះខៀវភ្នែក និងកាប់ត្រូវរបួសស្មា ហើយអ្នកកំដកូនកំលោះម្នាក់ក៏បានរងរបួសក្បាលមួយកាំបិតផងដែរ។
ក្រោមបញ្ជាពីលោកឧត្តមសេនីយ៍ទោ ចិន នី ស្នងការនគរបាលខេត្ត កម្លាំងព្រហ្មទណ្ឌបើកប្រតិបត្តិការតាមប្រមាញ់ក្រុមក្មេងទំនើងបានពីរនាក់ ដោយរហូតបានកាំបិតចំនួនពីរផងដែរ ។ សមត្ថកិច្ចមូលដ្ឋានបានប្រាប់ឲ្យដឹង កាលពីព្រឹកថ្ងៃទី៣ ធ្នូ ថា នៅភូមិដាផ្សារ ឃុំដា កាលពីថ្ងៃទី០២ ធ្នូ គឺបានរៀបចំមង្គលការកូនក្រមុំកូនកំលោះតាមប្រពៃណីសាសនារបស់ខ្មែរយើង គ្រានោះគឺមានមនុស្សម្នាចូលរួមច្រើនកុះករទៀតផងនាពេលល្ងាច។
ហើយនៅពេលយប់ មានការរាំកំសាន្តលេងសប្បាយ ស្របពេលនោះ ភ្ញៀវដែលមកចូលរួមបាននាំគ្នាត្រឡប់ទៅផ្ទះវិញសឹងតែអស់ ក៏ស្រាប់តែមានក្រុមក្មេងទំនើងមួយក្រុមនៅដាផ្សារ មានគ្នាជាច្រើននាក់បានចូលទៅវាយតប់ជាមួយភាគីខាងភ្ញៀវកូនកំលោះ គឺមានការវាយតប់គ្នាទៅវិញទៅមក ។ សមត្ថកិច្ចមូលដ្ឋានបន្តឲ្យដឹងទៀតថា លោករហូតមកដល់វេលាម៉ោង១១ និង២០នាទីយប់ថ្ងៃទី២ ធ្នូ ឆ្នាំ២០២៤ក្រុមតន្ត្រីបានបិទអស់ទៅហើយ ។ ចំណែកកូនក្រមុំកូនកំលោះបាននាំគ្នាបិទទ្វារដេក ។ ស្រាប់តែរំពេចនោះ ក្រុមទំនើងបានឡើងមកធាក់ទ្វារទម្លាយចូលដល់លើផ្ទះ ទោះបីមានចាស់ទុំជួយឃាត់យ៉ាងណាក៏មិនស្ដាប់ទៀត។
ក្រុមនេះ បានយកកាំបិតចុងស្រួចនិងកាំបិតប៉័ងតោកាប់ទៅលើកូនកំលោះ និងអ្នកកំដ ជាហេតុបណ្ដាលឲ្យរងរបួស ។ ក្រោយពីប្រព្រឹត្តនៅសកម្មភាពហិង្សាដោយចេតនា ក្រុមក្មេងទំនើងក៏នាំគ្នារត់គេចបាត់អស់ តែដោយទទួលបញ្ជាពីលោកឧត្តមសេនីយ៍ស្នងការនគរបាលខេត្តបានចាត់ឱ្យកម្លាំងប៉ុស្តិ៍រដ្ឋបាលមូលដ្ឋាន សហការជាមួយជំនាញព្រហ្មទណ្ឌស្រុកបើកប្រតិបត្តិការរយៈពេលមួយម៉ោងក្រោយមកតាមប្រមាញ់ចាប់ខ្លួនក្មេងទំនើងបានចំនួនពីរនាក់ ។
សូមបញ្ជាក់ថា ហេតុការណ៍នេះ បានកើតឡើងនៅចំណុចផ្ទះរបស់ឈ្មោះសុទ្ធ សុភាព ភេទប្រុស ស្ថិតនៅភូមិដារផ្សារឃុំដារ ស្រុកមេមត់ ខេត្តត្បូងឃ្មុំ មានករណីហិង្សាដោយចេតនាមួយកើតឡើងបង្កឡើងដោយជនសង្ស័យ៖
១-ឈ្មោះ ភាន់ សុខៃ ភេទប្រុស អាយុ១៩ឆ្នាំ រស់នៅភូមិដារកណ្តាល ឃុំដារ ស្រុកមេមត់ ខេត្តត្បូង
ឃ្មុំ។ ២-ឈ្មោះ ហ៊ួត សៀងហ៊ីម ភេទប្រុស អាយុ២៤ឆ្នាំ ជាតិខ្មែររស់នៅភូមិដារផ្សារ ឃុំដារ ស្រុកមេមត់ ខេត្តត្បូងឃ្មុំ និងបក្សពួកបានធ្វើសកម្មភាពយកកាំបិតបុ័ងតោចំនួន០១, កាំបិតចុងស្រួចចំនួន០១និងឧបករណ៍រឹងវាយនិងកាប់ទៅលើជនរងគ្រោះ ១-ឈ្មោះសៀត ពីសិទ្ធ ភេទប្រុស អាយុ២៥ឆ្នាំ រស់នៅភូមិសង្កែចាស់ ឃុំមេមង ស្រុកមេមត់ ខេត្តត្បូងឃ្មុំ រងរបួសរយះដាច់លើក្បាលមួយកន្លែង (អ្នកកំដកូនកំលោះ) ២-ឈ្មោះ ហ៊ង ម៉េងហួរ ភេទប្រុស អាយុ២៤ឆ្នាំ រស់នៅភូមិត្បូងវត្ត ឃុំមេមត់ ស្រុកមេមត់ ខេត្តត្បូងឃ្មុំ រងរបួសហើមជាំលើរង្វង់ភ្នែកខាងឆ្វេងមួយកន្លែងរយះដាច់លើស្មាខាងឆ្វេងផ្នែកខាងក្រោយមួយកន្លែងរយះដាច់លើកំភួនដៃខាងឆ្វេងមួយកន្លែង និងស្នាមកន្ទួលក្រហមមួយកន្លែ( កូនកំលោះ) ។
ចំពោះមូលហេតុគឺក្រុមជនសង្ស័យធ្លាប់មានទំនាស់ជាមួយក្រុមជនរងគ្រោះ ហើយបានជួបគ្នាក្នុងពិធីមង្គលការ (ហ៊ង ម៉េងហួរ)ទើបធ្វើសកម្មភាពតែម្តង ។ ពេលទទួលបានព័ត៌មានភ្លាម កម្លាំងប៉ុស្តិ៍នគរបាលរដ្ឋបាលដារ និងកម្លាំងជំនាញផ្នែកយុត្តិធម៌នៃអធិការដ្ឋាននគរបាលស្រុកមេមត់ បានចុះទៅដល់កន្លែងកើតហេតុបង្ក្រាបបានជនសង្ស័យទាំងពីរនាក់ខាងលើ បញ្ជូនមកអធិការដ្ឋាននគរបាលស្រុកមេមត់ចំណែកបក្សពួករត់គេចខ្លួនអស់។
ការឃាត់ខ្លួនជនសង្ស័យទាំង០២នាក់ខាងលើតាមបញ្ជារបស់លោកឧត្តមសេនីយ៍ទោ ស្នងការខេត្តត្បូងឃ្មុំ ដោយបានការអនុញ្ញាតពីលោក សួន ទី ព្រះរាជអាជ្ញារងអមសាលាដំបូងខេត្តត្បូងឃ្មុំ ។ មូលហេតុដោយសារតែក្រុមទំនើងធ្លាប់ជិះម៉ូតូទៅលេងទីរួមស្រុកមេមត់ ហើយចោទមកលើក្រុមអ្នកកំដរកូនកំលោះថា បានដេញវាយពួកគេតែភាគីកូនកំលោះបានបដិសេធថា មិនដែលស្គាល់ក្រុមនេះទេ ។
សូមបញ្ជាក់ថា ក្រុមក្មេងទំនើងទាំងពីរនាក់នេះ ត្រូវបានបញ្ជូនដល់ស្នងការដ្ឋាននគរបាលខេត្ត និងបញ្ជូនទៅឲ្យតំណាងអយ្យការអមសាលាដំបូងខេត្តចាត់ការតាមនីតិវិធី និងស្រាវជ្រាវតាមចាប់បក្សពួកមួយចំនួនទៀតមកផ្ដន្ទាទោសតាមច្បាប់។
ចែករំលែកព័តមាននេះ