ខេត្តសៀមរាប ៖ លោកស្រី លិ ស៊ីវទាន ចៅក្រមស៊ើបសួរសាលាដំបូងខេត្ត បានចេញដីកាកោះហៅបុគ្គលជាសាក្សីចំនួន២នាក់តាមសំណើរបស់មេធាវីរាជរដ្ឋាភិបាល ដែលកំពុងទទួលជួយការពារក្តីជូនពល រដ្ឋរងគ្រោះ ពាក់ព័ន្ធនឹងក្រុមហ៊ុនប្រ៊ីលាន…
ខេត្តសៀមរាប ៖ លោកស្រី លិ ស៊ីវទាន ចៅក្រមស៊ើបសួរសាលាដំបូងខេត្ត បានចេញដីកាកោះហៅបុគ្គលជាសាក្សីចំនួន២នាក់តាមសំណើរបស់មេធាវីរាជរដ្ឋាភិបាល ដែលកំពុងទទួលជួយការពារក្តីជូនពល រដ្ឋរងគ្រោះ ពាក់ព័ន្ធនឹងក្រុមហ៊ុនប្រ៊ីលាន ស៊ីធីវើល របស់អតីតឧកញ៉ា ឡេងចាន់ណា ។ បុគ្គលទាំង២រូបដែលត្រូវបានកោះហៅនេះគឺ ៖១-លោក ស៊ាន បូរ៉ាត់ រដ្ឋលេខាធិការក្រសួងអប់រំ យុវជននិងកីឡា ។ ២-លោក ស ថាវី អនុរដ្ឋលេខាធិការក្រសួងការពារជាតិ ។
ដីកាកោះចូលបំភ្លឺទី១-ឈ្មោះ ស៊ាន បូរ៉ាត់ ភេទប្រុស កើតថ្ងៃទី១១ ខែមេសា ឆ្នាំ១៩៧០ ជនជាតិខ្មែរ មានទីលំនៅបច្ចុប្បន្នផ្ទះលេខ១៤៣ E០ ផ្លូវលេខ៩៩ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ឱ្យចូលមកកាន់សាលាដំបូងខេត្តសៀមរាបនៅថ្ងៃទី១៨ ខែធ្នូ ឆ្នាំ២០២៤ វេលាម៉ោង៨ និង៣០នាទីព្រឹក បន្ទប់លេខ «ខ១២» ដើម្បីមកបំភ្លឺពីដំណើររឿងករណីឆបោកមានស្ថានទម្ងន់ទោស ជាក្រុមមានការចាត់តាំងប្រព្រឹត្តនៅបរិវេណរបស់ក្រុមហ៊ុនប្រ៊ីលាន ស៊ីធីវើលអតីតឧកញ៉ា ឡេង ចាន់ណា ក្នុងភូមិតាវៀន សង្កាត់សាលាកំរើក ក្រុងសៀមរាប កាលពីអំឡុងឆ្នាំ២០២២ ។
ក្នុងដីកាដដែលបានកំណត់បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា៣៧៧ និងមាត្រា៣៨០ កថាខណ្ឌ១ ចំណុច៥នៃក្រមព្រហ្មទណ្ឌពីបទសម្អាតប្រាក់ ប្រព្រឹត្តនៅក្នុងខេត្តសៀមរាប និងទីតាំងផ្សេងទៀតក្នុងព្រះរាជាណាចក្រកម្ពុជា កាលពីអំឡុងឆ្នាំ២០១៨ រហូតដល់បច្ចុប្បន្ន បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា៣៨នៃច្បាប់ស្តីពីការប្រឆាំងការសម្អាតប្រាក់និងហិរញ្ញភេរវកម្មពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ប្រព្រឹត្តនៅភូមិតាវៀនសង្កាត់សាលាកំរើក ក្រុងសៀមរាប កាលពីថ្ងៃទី១៣ ខែធ្នូ ឆ្នាំ២០២៣ បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា២៣១នៃច្បាប់ស្តីពីឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់ ។
ចំពោះដីកាកោះហៅចូលបំភ្លឺទី២-ឈ្មោះ ស ថាវី ភេទប្រុស អតីតអភិបាលខេត្តឧត្តរមានជ័យ កើតថ្ងៃទី១៤ ខែមករា ឆ្នាំ១៩៦៦ ជនជាតិខ្មែរ មានទីលំនៅបច្ចុប្បន្នភូមិទ្រាំង សង្កាត់ស្លក្រាម ក្រុងសៀមរាប ឱ្យចូលមកកាន់សាលាដំបូងខេត្តសៀមរាប នៅថ្ងៃទី១១ ខែធ្នូ ឆ្នាំ២០២៤ វេលាម៉ោង៨និង៣០នាទីព្រឹក បន្ទប់លេខ«ខ១២» ដើម្បីមកបំភ្លឺពីដំណើររឿង ករណីឆបោកមានស្ថានទម្ងន់ទោស ជាក្រុមមានការចាត់តាំង ប្រព្រឹត្តនៅបរិវេណរបស់ក្រុមហ៊ុនប្រ៊ីលាន ស៊ីធីវើលរបស់អតីតឧកញ៉ា ឡេង ចាន់ណា ក្នុងភូមិតាវៀន សង្កាត់សាលាកំរើក ក្រុងសៀមរាប កាលពីអំឡុងឆ្នាំ២០២២ បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា៣៧៧ និងមាត្រា៣៨០ កថាខណ្ឌ១ ចំណុច៥នៃក្រមព្រហ្មទណ្ឌ ពីបទសម្អាតប្រាក់ ប្រព្រឹត្តនៅក្នុងក្រុងសៀមរាប និងទីតាំងផ្សេងទៀត ក្នុងព្រះរាជាណាចក្រកម្ពុជា កាលពីអំឡុងឆ្នាំ២០១៨ រហូតដល់បច្ចុប្បន្ន ។
បទល្មើសព្រហ្មទណ្ឌនេះ មានចែងឱ្យផ្តន្ទាទោសតាមបញ្ញត្តិមាត្រា៣៨នៃច្បាប់ស្តីពីការប្រឆាំងការសម្អាតប្រាក់និងហិរញ្ញប្បទាន ភេរវកម្មពីបទ មិនបំពេញកាតព្វកិច្ច ចំពោះឧបករណ៍ដែលអាចជួញដូរបានប្រព្រឹត្តនៅភូមិតាវៀន សង្កាត់សាលាកំរើក ក្រុងសៀមរាប កាលពីថ្ងៃទី១៣ ខែធ្នូ ឆ្នាំ២០២៣ បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា២៣១នៃច្បាប់ស្តីពីឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់ ។ ដីការបស់សាលាដំបូងខេត្តសៀមរាបនេះ ត្រូវបានបង្ហោះចែកចាយជាសាធារណៈនៅថ្ងៃអាទិត្យទី១ ខែធ្នូ ឆ្នាំ២០២៤ ដោយមហាជនសង្ឃឹមថា សាលាដំបូងខេត្តសៀមរាប ប្រហែលមិនទុកជនណាម្នាក់ដែលបានពាក់ព័ន្ធនឹងករណីឆបោកក្នុងសំណុំរឿងរបស់ក្រុមហ៊ុនអតីតឧកញ៉ាឡេង
ចាន់ណា រួចខ្លួនពីសំណាញ់ច្បាប់បានឡើយ ។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំបន្តរបស់ក្រសួងរៀបចំដែនដីនគរូបនីយកម្ម និងសំណង់ កាលពីសប្តាហ៍មុន សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា បញ្ហានេះ(ការឆបោក)មិនមានវិធីអ្វីផ្សេងក្រៅពីប្រើយន្តការច្បាប់ដើម្បីដោះស្រាយនោះទេ ។
សាលាដំបូងខេត្តសៀមរាប និងមេធាវីរាជរដ្ឋាភិបាលបាន និងកំពុងបន្តការងារនេះ ដើម្បីជួយដោះស្រាយជូនពលរដ្ឋទាំងនោះ ដែលសំណុំរឿងនេះត្រូវការពេលវេលាច្រើន ។ សម្តេចបវរធិបតីមានប្រសាសន៍ថា «តាមការសួរចម្លើយ គាត់ប្រាប់អ៊ីចឹងៗ យើងត្រូវច្បាមបន្ថែម…អុីចឹងកិច្ចការងារនេះ យើងធ្វើ ហើយមេធាវីរាជរដ្ឋាភិបាលបានស្នើដីកា ដើម្បីកោះហៅអ្នកបន្តបន្ទាប់យកមកស៊ើបសួរបន្ថែម» ។
សម្ដេចប្រមុខរាជរដ្ឋាភិបាលបានបន្តថា «ខ្ញុំមើលតាមការប្រកាសរបស់តុលាការ ឃាត់ខ្លួនប្រហែលជា២០នាក់ ហើយរៀបចំស្រាវជ្រាវបន្ថែមដើម្បីកំណត់ ហើយបានចេញគោលការណ៍បង្កកទ្រព្យសម្បត្តិអ្នកពាក់ព័ន្ធមួយចំនួន ។ រឿងនេះ អត់ស្រួលទេ បើគាត់ដាក់ទ្រព្យទាំងអស់នេះនៅមួយឃ្លាំង ស្រួលណាស់ ។ បើកឃ្លាំងយកមកចែកគ្នាតែម្តង ។ តែវាអត់នៅក្នុងឃ្លាំងតែមួយ» ។ក្រុមមេធាវីរាជរដ្ឋាភិបាល បានធ្វើការជាមួយក្រសួងការបរទេសនិងសហប្រតិបត្តិការអន្តរជាតិដើម្បីឱ្យពលករខ្មែរដែលកំពុងធ្វើការនៅក្រៅប្រទេស ហើយជាជនរងគ្រោះដែរនោះ អាចប្រគល់សិទ្ធិជូនមេធាវី ដើម្បីការពារជូនពួកគាត់ផងដែរ ។
ទាក់ទងនឹងសំណុំរឿងក្រុមហ៊ុនប្រ៊ីលាន ស៊ីធីវើលដ៍ ឯ.ក អ្នកនាំពាក្យសាលាដំបូងខេត្តសៀមរាប លោក យិន ស្រាង មិនចង់ទម្លាយមុនចេញដីកាកោះថា លោកមិនបានចាំទេថា មានមនុស្សផ្សេងទៀតប៉ុន្មាននាក់ ដែលត្រូវបានកោះហៅទៅបំភ្លឺនោះ ។
សំណុំរឿងក្រុមហ៊ុនប្រ៊ីលាន ស៊ីធីវើលដ៍ របស់អតីតឧកញ៉ា ឡេង ចាន់ណា នៅក្នុងខេត្តមរាប មានជនរងគ្រោះ៤៩២៩នាក់ បានប្រគល់សិទ្ធិឱ្យមេធាវីរាជរដ្ឋាភិបាលការពារក្ដីនៅតុលាការ លោក គី តិច ប្រធានក្រុមមេធាវីរាជរដ្ឋាភិបាលឱ្យដឹងក្នុងសន្និសីទសារព័ត៌មាន បង្ហាញពីលទ្ធផលនៃជំនួបរវាងមេធាវីរាជរដ្ឋាភិបាលជាមួយជនរងគ្រោះ កាលពីថ្ងៃទី៣ ខែតុលា ២០២៤កន្លងមក ។បើតាម លោក គី តិច នេះជាជំនួបលើកទី១៤ ដែលក្រុមមេធាវីរាជរដ្ឋាភិបាល បានចុះជួបជាមួយជនរងគ្រោះ ដែល១២លើកនៅភ្នំពេញ និង២លើកនៅខេត្តសៀមរាប ។
លោក គី តិច បានលើកឡើងក្នុងសន្និសីទសារព័ត៌មានថា «ជំនួបទាំង១៤លើកនេះ មានជនរងគ្រោះសរុបចំនួន៤៩២៩នាក់ បានស្ម័គ្រចិត្តប្រគល់សិទ្ធិដោយស្របច្បាប់ជូនមេធាវី ដើម្បីដំណើរការ ការពារក្ដីតាមផ្លូវតុលាការ» ។ ជនរងគ្រោះនៅក្នុងសំណុំរឿងរបស់ក្រុមហ៊ុន ប្រ៊ីលាន ស៊ីធីវើលដ៍ របស់អតីតឧកញ៉ា ឡេង ចាន់ណា មិនមែនមានតែនៅក្នុងប្រទេសនោះទេ ពោលគឺពលរដ្ឋរស់ក្រៅប្រទេសមួយចំនួនក៏ចាញ់កល ធ្លាក់ខ្លួនជាជនរងគ្រោះដែរ ។
ពាក់ព័ន្ធនឹងសំណុំរឿងក្រុមហ៊ុនប្រ៊ីលានស៊ីធីវើល របស់អតីតឧកញ៉ា ឡេង ចាន់ណា សាលាដំបូងខេត្តសៀមរាបកន្លងមក បានសម្រេចឃុំខ្លួនជនត្រូវចោទមួយចំនួន និងបង្កកគណនីធនាគារចំនួន១៨៣ រួមទាំងទ្រព្យសម្បត្តិផ្សេងៗរបស់អតីតឧកញ៉ា ឡេង ចាន់ណា ផង ។កន្លងមក ពលរដ្ឋប្រមាណ ៤ទៅ៥ពាន់នាក់ បានអះអាងថា បានចាញ់បោកក្រុមហ៊ុនប្រ៊ីលានស៊ីធី ក្រោមរូបភាពដាក់ប្រាក់វិនិយោគ ដោយទទួលបានការប្រាក់ប្រចាំខែ ។ ប៉ុន្តែការប្រាក់ដែលក្រុមហ៊ុនទូទាត់ឱ្យពលរដ្ឋ មិនបានប៉ុន្មានផង ក្រុមហ៊ុនក៏ឈប់ទូទាត់ ហើយក្រោយមកក៏ប្រកាសថា មិនមានលទ្ធភាពទូទាត់ឱ្យពលរដ្ឋក្រោមហេតុផលវិបត្តិសេដ្ឋកិច្ចសកល ។
សូមបញ្ជាក់ថា អតីតឧកញ៉ា ឡេង ចាន់ណា ប្រធានក្រុមហ៊ុន «ប្រ៊ីនលាន ស៊ីធីវើលដ៍» ត្រូវបានកម្លាំងនគរបាលខេត្តសៀមរាបចាប់ខ្លួននៅរសៀលថ្ងៃទី១២ ខែមីនា ឆ្នាំ២០២៤ តាមពាក្យបណ្តឹងរបស់ប្រជាពលរដ្ឋ ពាក់ព័ន្ធនឹងបទល្មើសឆបោក រំលោភលើទំនុកចិត្ត និងចេញមូលប្បទានបត្រគ្មានសាច់ប្រាក់ ក្នុងរូបភាពទិញដី ផ្ទះ និងការវិនិយោគដោយបានការប្រាក់ខ្ពស់ ដោយអ្នកខ្លះបានការប្រាក់ស៊ីតែប៉ុន្មានខែ ក៏លែងបានរហូត ។
ការចាប់ខ្លួននេះ បក្ខពួកជាច្រើននាក់ក៏ត្រូវបានចាប់ខ្លួនជាបន្តបន្ទាប់ដែរ ។ប្រជាពលរដ្ឋរាប់ពាន់នាក់ បានចាញ់បោកអតីតឧកញ៉ា ឡេង ចាន់ណា ដោយខ្លះខ្ចីលុយពីធនាគារ ដើម្បីមកវិនិយោគជាមួយនឹងក្រុមហ៊ុនខាងលើ ហើយពួកគាត់ត្រូវសងធនាគារវិញយ៉ាងលំបាកលំបិនបំផុត ក៏ព្រោះតែចាញ់ការលួងលោមឆបោករបស់អតីតឧកញ៉ា រួមទាំងបក្ខពួក។ តាមទំហំទឹកប្រាក់ដែលត្រូវបានគេដឹងមិនទាន់ជាផ្លូវការនៅឡើយនោះ គឺមានទឹកប្រាក់ដែលឆបោកបានប្រមាណជាង៣០០លានដុល្លារ ៕
ចែករំលែកព័តមាននេះ