រាជធានីភ្នំពេញ ៖ ឆ្លើយតបទៅនឹងលោក អឹម នី នៅខេត្តពោធិ៍សាត់ ក្រោយអះអាងថា «ខ្លួនធ្លាប់ជួយសម្តេច នៅសម័យប៉ុលពត» សម្ដេចតេជោ…
រាជធានីភ្នំពេញ ៖ ឆ្លើយតបទៅនឹងលោក អឹម នី នៅខេត្តពោធិ៍សាត់ ក្រោយអះអាងថា «ខ្លួនធ្លាប់ជួយសម្តេច នៅសម័យប៉ុលពត» សម្ដេចតេជោ ហ៊ុន សែន ប្រធានព្រឹទ្ធសភា បានបញ្ជាក់ថា សម្ដេចពុំធ្លាប់បានស្គាល់លោក អឹម នី រស់នៅខេត្តពោធិ៍សាត់ឡើយ ហើយសម្ដេចមិនដែលភ្លេចគុណអ្នកណានោះទេ ។
សម្ដេចតេជោ ហ៊ុន សែន បានឆ្លើយតបភ្លាមៗ ទៅកាន់បុរសម្នាក់ឈ្មោះ អឹម នី ក្រោយអះអាងថា «ខ្លួនធ្លាប់ស្គាល់ និងធ្លាប់បានជួយសម្ដេច នៅសម័យប៉ុលពត» ។
យោងតាមសារសំឡេងរបស់សម្ដេចតេជោ ហ៊ុន សែន មានរយៈពេលជិត០៤នាទី នៅយប់ថ្ងៃទី២ ខែធ្នូ ឆ្នាំ២០២៤នេះ សម្ដេចតេជោ ហ៊ុន សែន បានលើកឡើថា សម្ដេច ពុំមានប្រវត្តិផ្ទាល់ខ្លួនច្រើនឡើយ គឺមានតែមួយប៉ុណ្ណោះ ហើយប្រវត្តិនោះដែរ ក៏ត្រូវបានលើកយកមកផលិតជាខ្សែភាពយន្ដនោះ គឺរឿងកូនប្រុស ក្រោមពន្លឺព្រះចន្ទពេញបូណ៍មី ។
សម្ដេចតេជោ ហ៊ុន សែន មានប្រសាសន៍ថា «ខ្ញុំសូមផ្ញើជូនចំពោះលោក អ៊ឹម នី ក៏ដូចជាអ្នកសារព័ត៌មាន ក៏ដូចជាបងប្អូនទាំងអស់ ដែលបានចូលមើលតេឡេក្រាមនេះ។ តាមការរៀបរាប់របស់លោក អ៊ឹម នី ដែលខ្ញុំហៅថាប្អូន ឬក៏បង តែតាមមើលប្រហែលជាអាយុ មិនច្រើនជាងខ្ញុំទេ ខ្ញុំសូមបញ្ជាក់ថា ៖ ទី១ ខ្ញុំគ្មានប្រវត្តិច្រើនទេ ខ្ញុំមានប្រវត្តិតែ១គត់ គឺប្រវត្តិដែលបានថតជាខ្សែភាពតយន្តរឿងកូនប្រុសក្រោមពន្លឺព្រះច័ន្ទពេញបូរមី រួចមកហើយនេះ គឺជាប្រវត្តិពិតរបស់ខ្ញុំ ហើយខ្ញុំក៏បានធ្វើបាឋកថា ថ្ងៃមុនអស់រយៈពេល២ម៉ោង ខ្ញុំបាននិយាយច្រើនហើយ ហើយរឿងរបៀបនេះ កើតឡើងមិនតិចជាង៥០ដងទេ ។
សម្ដេចតេជោ បន្ដថា «ចាប់តាំងពីឆ្នាំ១៩៧៩ រហូតមកដល់បច្ចុប្បន្ន អ្នកនេះ អះអាងថា ជួយខ្ញុំបែបនេះ ជួយខ្ញុំបែបនោះ មិនមែនជារឿងត្រឹមត្រូវទេ គ្មាននរណាជួយខ្ញុំទេ មានតែខ្ញុំជួយអ្នកដទៃ អាហ្នឹង ខ្ញុំសូមបញ្ជាក់» ។
សម្ដេចតេជោ បន្ថែមថា «ខ្ញុំមិនដឹងថា ខ្ញុំរកពាក្យពេជន៍ បែបម្ត៉េច សារព័ត៌មានយកមកចុះផ្សាយបែបនេះ ហើយខ្ញុំសូមបញ្ជាក់ថា ខ្ញុំមិនដែលភ្លេចគុណនរណាទេ ក៏ប៉ុន្តែ សូមឱ្យអ្នកដទៃ គោរពគោលការណ៍ និយាយត្រង់ និយាយពិត ព្រោះមិនអាចយកភាពកាឡៃ ហើយរឿង ដែលមិនដែលស្គាល់គ្នាប្អូនប្រុសនៅខេត្តពោធិ៍សាត់ ហើយខេត្តពោធិ៍សាត់ ពេលនោះ នៅភូមិភាគពាយព្យ នៅឆ្ងាយណាស់ ជាមួយជ្រុងម្ខាង នៃភូមិភាគបូព៌ាទិស ដែលនៅស្រុកមេមត់ ឯណោះ អ៊ីចឹង វាទៅមិនរួច ទៅមិនរួច» ។
សូមជម្រាបថា ការលើកឡើងរបស់សម្តេចតេជោ បន្ទាប់ពីបុរសខាងលើ អះអាងថា បានជួយសម្រេចឲ្យរួចពីការចាប់ខ្លួនតាមបទបញ្ជារបស់ តា ម៉ុក ជាមេខ្មែរក្រហម ៕
ចែករំលែកព័តមាននេះ