ខេត្ត​បន្ទាយមានជ័យ ៖ រថយន្តម៉ាកកាមរីមួយគ្រឿងបើកគេច​រថយន្តធុនធំមួយគ្រឿងទៀត បណ្តាល​ឱ្យ​ធ្លាក់ចូលទឹកប្រឡាយមុខសំណង់ស្ពានតាផាន់ ជួយសង្គ្រោះបាន២នាក់ និង​ស្លាប់អ្នកបើកបរម្នាក់ ។

ហេតុការណ៍ខាងលើនេះ​​បានកើតឡើងកាលពីវេលារំលងអធ្រាត្រឈានចូលថ្ងៃទី១ ខែធ្នូ ឆ្នាំ២០២៤ តាមផ្លូវជាតិលេខ៥ ស្ថិតភូមិក្បាលស្ពាន សង្កាត់ព្រៈពន្លា ក្រុងសិរីសោភ័ណ។

ជនរងគ្រោះដែលស្លាប់មានឈ្មោះ រ៉ាយ ពិសិដ្ឋ ភេទប្រុស អាយុ២៦ឆ្នាំ ។ ចំណែក​ជនរង​គ្រោះ​ដែលត្រូវគេជួយ​សង្គ្រោះបាន២នាក់ក្នុងនោះម្នាក់​ឈ្មោះ រើន ភេទប្រុស អាយុ២៥ឆ្នាំ និងម្នាក់ទៀត​ឈ្មោះ ឆាត រ៉ា ភេទប្រុស អាយុ១៧ឆ្នាំរស់នៅក្រុងសិរីសោភ័ណ។

មន្ត្រីនគរបាលចរាចរណ៍ខេត្តបន្ទាយមានជ័យបានប្រាប់ថា ​មុនពេលកើតហេតុ មានយុវជន​៣នាក់ជិះរថយន្តមួយគ្រឿង​ម៉ាកកាមរី ចង្កូតស្តាំ ស៊េរីឆ្នាំ១៩៩៥ ពណ៌ទឹកប្រាក់ ពាក់ផ្លាកលេខ​សៀមរាប 2A-1461 ដែលជិៈកៅអីខាងមុខ២នាក់ និងខាងក្រោយ១នាក់ ហើយ​រថយន្តនោះបានធ្វើដំណើរក្នុង​ទិសដៅពីជើងមកត្បូង លុះ​មក​ដល់ចំណុចស្ពានតាផាន់ ស្រាប់តែ​មានរថយន្តធុនធំមួយគ្រឿងទៀត​​ធ្វើដំណើរក្នុងទិសដៅបញ្ច្រាស​គ្នា ​រួមនឹង​ម៉ូតូ១គ្រឿងផ្សេងទៀត​ ​ទើបបើក​គេច បណ្តាល​ឱ្យ​ធ្លាក់ចូលប្រឡាយខាងកើតផ្លូវ ។

មន្ត្រីនគរបាលបានបញ្ជាក់ថា៖ក្រោយរថយន្តធ្លាក់ភ្លាមៗអ្នកធ្វើដំណើរនិងនៅជិតខាងឃើញបានជួយសង្គ្រោះដោយយកដុំថ្មដំកញ្ចក់ឡានបែកជួយបាន២នាក់ហើយរថយន្តលិចចូលក្នុងទឹករួមទាំងអ្នកបើកបរម្នាក់លិចបាត់រកមិនឃើញហើយសាច់ញាតិនិងកម្លាំងនគរបាលព្យាយាមជួយរកដែលបានតាំងពីម៉ោង២ឈានចូលព្រឹក​ថ្ងៃទី១ ខែធ្នូ ឆ្នាំ២០២៤ រហូតដល់ព្រឹក ទើបរករថយន្តឃើញដែលលិចទឹកក្បែរក្បាលស្ពានខាងប្រមាណ៥០ម៉ែត្រហើយបានយករថយន្តសន្ទូចយកឡើងគោកឃើញសាកសពជនរងគ្រោះអ្នកបើកបរបានស្លាប់ក្នុងរថយន្តត្រូវបានយកប្រគល់ជូនសាច់ញាតិ។

មន្ត្រីនគរបាលជំនាញបានបញ្ជាក់ថា ជនរងគ្រោះដែលបើករថយន្តធ្លាក់ប្រឡាយទឹកស្ពានតាផាន់ស្លាប់១នាក់និងជួយសង្គ្រោះបាន២នាក់ នៅពេលគ្រោះជនរងគ្រោះបើករថយន្តគេចរថយន្តធុនធំនិងម៉ូតូ បណ្តាលធ្លាក់ចូលប្រឡាយបានជួយសង្គ្រោះបាន២នាក់និងស្លាប់ម្នាក់ ។ ក្រោយពេលកើតហេតុ រថយន្តជនរងគ្រោះត្រូវបានយកទៅរក្សាទុកនៅស្នងការដ្ឋាននគរបាលខេត្តបន្ទាយមានជ័យ ៕