ប្រទេសអារ៉ាប៊ីសាអូឌីត ៖ ជំនួបសងសឹករវាងអតីតស្តេចប្រដាល់សកលទម្ងន់ធ្ងន់ពិភពលោក ម៉ៃ ថៃសាន់ (Mike Tyson) និងយុវជនជាតារាយូធូបប្រែខ្លួនជាកីឡាករប្រដាល់សកលអាជីព ជេក ផូល (Jake Paul) ហាក់ដូចជាផ្ទុះការចាប់អារម្មណ៍ខ្លាំងជាទីបំផុត កាលពីពេលថ្មីៗនេះ បន្ទាប់ពីលេចចេញដំណឹងដ៏ភ្ញាក់ផ្អើលមួយបានអះអាងថា មហាសេដ្ឋីអារ៉ាប៊ីសាអូឌីតម្នាក់ បង្ហាញឆន្ទៈផ្តល់ប្រាក់រង្វាន់ដ៏មហាសាលចំនួន ៧០០លានដុល្លារអាមេរិក សម្រាប់ការប្រកួតដ៏ទាក់ទាញនេះ ក្រោមលក្ខខណ្ឌពិសេសមួយ។ នេះបើតាមប្រភពពីសារព័ត៌មាន Sportskeeda កាលពីថ្ងៃទី៣០ ខែវិច្ឆិកា ឆ្នាំ២០២៤។

លោក Jack Lombardi អតីតបេក្ខភាពសភាអាមេរិក វាគ្មិន អ្នកអត្ថាធិប្បាយ និងជាអ្នកជំនួញដ៏ល្បីមួយរូបផងនោះ បានបង្កការភ្ញាក់ផ្អើលខ្លាំងជាទីបំផុយ តាមរយៈសំណេរនៅលើគណនីបណ្តាញទំនាក់ទំនងសង្គម X ថា មហាសេដ្ឋីអារ៉ាប៊ីសាអូឌីត លោក Turki Alalshikh ប្រកាសនឹងផ្តល់ប្រាក់ ៧០០លានដុល្លារដល់ ម៉ៃ ថៃសាន់ ប្រសិនបើវីរបុរសប្រដាល់សកលអាមេរិកវ័យ៥៨រូបនេះ យល់ព្រមឡើងសង្វៀនប្រកួតសងសឹកតារាយូធូបក្រអឺតក្រទម ជេក ផូល ហើយផ្តួលយុវជនវ័យ២៧ឆ្នាំរូបនេះ ក្នុងរយៈពេល៣នាទីដំបូង នៃការប្រកួតដែលត្រូវបានស្នើឡើងដោយមហាសេដ្ឋីរូបនេះ។

លោក Turki Alalshikh គឺជាមហាសេដ្ឋីអារ៉ាប៊ីសាអូឌីត បានក្លាយជាតួអង្គដ៏សំខាន់នៅក្នុងវិស័យកីឡាប្រដាល់ដ៏លេចធ្លោមួយរូបក្នុងប៉ុន្មានឆ្នាំថ្មីៗនេះ តាមរយៈការជះលុយមិនសំចៃដៃ និងបង្កើតការប្រកួតប្រដាល់ដ៏អស្ចារ្យជាច្រើន ដែលអ្នកគាំទ្រមិនធ្លាប់បានឃើញពីមុនមក។ លោកគឺជាទីប្រឹក្សាអារ៉ាប៊ីសាអូឌីតនៅតុលាការរាជវាំងក្រោមឋានៈជារដ្ឋមន្ត្រី និងបច្ចុប្បន្នក៏ជាប្រធានអាជ្ញាធរគ្រប់គ្រងឧស្សាហកម្មកម្សាន្ត។ ហើយនៅក្នុងតំណែងជាប្រធាននេះ លោក Alalshikh ត្រូវបានផ្តល់កិត្តិយសដល់ការអភិវឌ្ឍន៍សំខាន់ៗ នៅក្នុងប្រទេសអារ៉ាប៊ីសាអូឌីត រួមទាំងវិស័យកីឡា និងវប្បធម៌ផងដែរ។ បើតាមប្រភពពីសារព័ត៌មានអន្តរជាតិមួយចំនួនរាយការណ៍ថា ទ្រព្យសម្បត្តិរបស់លោក Alalshikh ត្រូវបានប៉ាន់ប្រមាណថាមានចំនួន ២.៨ពាន់លានដុល្លារ។

សាររបស់លោក Jack Lombardi កំពុងតែទាក់ទាញចំណាប់អារម្មណ៍បណ្តាអ្នកនិយមលេងបណ្តាញសង្គមជុំវិញពិភពលោក ជាពិសេសបណ្តាញសង្គមដោយអ្នកខ្លះបញ្ចេញមតិថា «អ្នកឈ្នះក្នុងទឹកជុំទី១ គួរទទួលបាន ៧០០លានដុល្លារ។ ហើយបើឈានដល់ទឹកទី២ គួរបាន ៦០០លានដុល្លារ ហើយបន្តបន្ទាប់ទៅតាមទឹកផ្សេងទៀត ខណៈអ្នកចាញ់មិនបានសូម្បីតែ១សេន»។ អ្នកខ្លះទៀតលើកឡើងថា «មនុស្សដែក ម៉ៃ គួរតែឆ្លើយយល់ព្រម»។

គួររំលឹកជូនថា យុវជន ជេក ផូល បានយកឈ្នះពិន្ទុជាឯកច្ឆន្ទ័លើ ម៉ៃ ថៃសាន់ ក្នុងការប្រកួតអាជីព៨ទឹកដ៏កក្រើកសហរដ្ឋអាមេរិក រៀបចំឡើងនៅឯកីឡដ្ឋាន AT&T រដ្ឋតិចសាស់ ក្រោមក្រសែភ្នែកអ្នកទស្សនាផ្ទាល់ប្រមាណ ៧២,៣០០នាក់ កាលពីថ្ងៃទី១៥ ខែវិច្ឆិកា ឆ្នាំ២០២៤ ក្នុងលទ្ធផល ៨០ទល់៧២ ៧៩ទល់៧៣ និង ៧៩ទល់៧៣។ ហើយនៅក្នុងការប្រកួតអាជីព៨ទឹក ១ទឹក២នាទី និងពាក់ហ្គង់ទម្ងន់ ០.៤គីឡូក្រាម ដ៏កក្រើកពិភពលោក ដែលត្រូវបានផ្សាយផ្ទាល់ក្នុងកម្មវិធី Netflix មួយនេះ យុវជន ជេក ផូល អ្នកឈ្នះទទួលបានប្រាក់ចំនួន ៤០លានដុល្លារអាមេរិក។ ចំណែកលោក ម៉ៃ ថៃសាន់ ទទួលបានប្រាក់ចំនួន ២០លានដុល្លារអាមេរិក៕