ឃាត់ខ្លួនចៅសង្កាត់ចោមចៅទី២ និងស្ត្រីដែលចរចារឿងលុយ ពាក់ព័ន្ធគ្រឿ.ង.ញៀ.ន
- ភ្នំពេញ
រាជធានីភ្នំពេញ ៖ លោកវ៉ា សារ៉ង ចៅសង្កាត់ចោមចៅទី២ ខណ្ឌពោធិ៍សែនជ័យ និងស្ត្រីម្នាក់ឈ្មោះ ស៊ុយ ជីវ៉ា ហៅកុត…
រាជធានីភ្នំពេញ ៖ លោកវ៉ា សារ៉ង ចៅសង្កាត់ចោមចៅទី២ ខណ្ឌពោធិ៍សែនជ័យ និងស្ត្រីម្នាក់ឈ្មោះ ស៊ុយ ជីវ៉ា ហៅកុត ដែលត្រូវបានកម្លាំងនគរបាលការិយាល័យប្រឆាំងគ្រឿងញៀននៃស្នងការនគរបាលរាជធានីភ្នំពេញឃាត់ខ្លួន និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ នៅព្រឹកថ្ងៃទី២៩ ខែវិច្ឆិកា ឆ្នាំ២០២៤ នេះ បន្ទាប់ពីបែកធ្លាយសារសំឡេងចរចាទារលុយ១លានរៀលជាថ្នូរនឹងការមិនចាប់ខ្លួនពាក់ព័ន្ធបទល្មើសគ្រឿងញៀន ។
លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានឱ្យដឹងថា ជនសង្ស័យទាំងពីរនាក់ ត្រូវបានកម្លាំងជំនាញនៃស្នងការដ្ឋាននគបាលរាជធានីភ្នំពេញឃាត់ខ្លួន កាលពីថ្ងៃទី២៧ ខែវិច្ឆិកាឆ្នាំ ២០២៤។ លោកវរសេនីយ៍ឯក សំ វិច្ឆិកា បានឲ្យដឹងទៀតថា ការឃាត់ខ្លួនជនសង្ស័យទាំងពីរនាក់នេះ គឺធ្វើឡើងតាមបញ្ជារបស់លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការដ្ឋាននគរបាលរាជធានីភ្នំពេញ និងលោក ឃួង ស្រេង អភិបាលរាជធានីភ្នំពេញ ។
បន្ទាប់ពីឃាត់ខ្លួនលោក វ៉ា សារ៉ង ចៅសង្កាត់ចោមចៅទី២ បានសារភាពកំហុស និងបញ្ជាក់ថា សារសំឡេងនោះ ពិតជាសំឡេងរបស់លោកពិតប្រាកដមែន។ ចំណែកស្ត្រីជាម្ចាស់សំឡេងដែលនិយាយចរចាជាមួយលោកចៅសង្កាត់ចោមចៅទី២ ក៏បានសារភាពដែរថា ខ្លួនធ្លាប់ចែកចាយគ្រឿងចំនួនពីរលើកមកហើយ។
ជនសង្ស័យឈ្មោះ ស៊ុយ ជីវ៉ា បានបំភ្លឺថា កាលពីថ្ងៃទី៣០ ខែតុលា ឆ្នាំ២០២៤ ខ្ខ្លួនត្រូវបានចាប់ និងដោះលែងវិញ ដោយសារមិនពាក់ព័ន្ធនឹងបទល្មើសគ្រឿងញៀន ។ បន្ទាប់ពីដោះលែងលោកចៅសង្កាត់ចោមចៅ២ បានទូរស័ព្ទមកគំរាមកំហែងទារប្រាក់ខ្លួនចំនួន១លានរៀលជាច្រើនលើកច្រើនសារ ហើយខ្លួនមានការភិតភ័យ ក៏លួចថតសំឡេងលោកចៅសង្កាត់ទុក រួចផ្ញើទៅអ្នកស្គាល់គ្នា ហើយគេក៏បង្ហោះក្នុងបណ្តាញសង្គម ។
គួរបញ្ជាក់ថា កាលពីថ្ងៃទី២៦ ខែវិច្ឆិកា ឆ្នាំ២០២៤ បានបែកធ្លាយវីឌីអូរសារសម្លេងឆ្លងឆ្លើយគ្នាតាមទូរស័ព្ទរវាងលោក វ៉ា សាវ៉ង ចៅសង្កាត់ចោមចៅទី២ ខណ្ឌពោធិ៍សែនជ័យ ជាមួយស្ត្រីម្នាក់បានចរចាគ្នារឿងលុយកាក់ពាក់ព័ន្ធ និងគ្រឿងញៀន។ នៅក្នុងសារសំឡេងនោះ លោកចៅសង្កាត់ចោមចៅ២ក៏បានចរចាទារលុយពីស្ត្រីជាមុខសញ្ញាគ្រឿងញៀនរូបនោះ ហើយស្ត្រីរូបនោះថា មានតែ១០,២០ម៉ឺនរៀល ក្រោយមកលោកចៅសង្កាត់បង្ខំឱ្យ១០០ដុល្លារសិន ហើយគាត់នឹងចេញអោយគេហូបបាយ១៥០ដុល្លារសិនជាថ្នូរនឹងការមិនចាប់ខ្លួនពាក់ព័ន្ធបទល្មើសគ្រឿងញៀន។
បន្ទាប់ពីបែកធ្លាយសារសម្លេងនោះ ត្រូវបានអ្នកលេងបណ្ដាញសង្គមបង្ហោះចែកចាយបន្តព្រោងព្រាត។ទន្ទឹមនឹងនោះលោកចៅសង្កាត់ចោមចៅទី២ក៏បានធ្វើការបំភ្លឺថា សារសំឡេងនោះពិតជារបស់គាត់ពិតប្រាកដមែន ។ នៅក្នុងសារសំឡេងនោះលោកចៅសង្កាត់ទំនងជាស្ថិតនៅក្នុងស្ថានភាពស្រវឹងផងដែរ៕
ចែករំលែកព័តមាននេះ