ទីក្រុងញូយ៉ក៖ អគ្គលេខាធិការអង្គការសហប្រជាជាតិ លោកហ្គូតេរ៉េ សង្ឃឹមថាកិច្ចព្រមព្រៀងនៃបទឈប់បាញ់រវាងអ៊ីស្រាអែល និងក្រុមហេសបូឡានៅប្រទេសលីបង់អាចក្លាយជាពន្លឺនៃសេចក្ដីសង្ឃឹមជាលើកដំបូងថាទៅថ្ងៃអនាគតតំបន់មជ្ឈិមបូព៌ាអាចនឹងស្គាល់ពន្លឺសន្តិភាពជាក់ជាមិនខានឡើយ។ បទឈប់បាញ់នេះបានចូលជាធរមានចាប់តាំងពីព្រឹកថ្ងៃពុធតទៅ។
ប្រជាជនលីបង់ដែលផ្លាស់ប្ដូរទីលំនៅដើម្បីគេចចេញពីសង្គ្រាមមានចិត្តសប្បាយរីករាយរកអ្វីប្រៀបផ្ទឹមពុំបាន។ ពួកគេចាប់ផ្ដើមធ្វើដំណើរតាមរថយន្ត ឬមធ្យោបាយដទៃទៀតដើម្បីវិលត្រឡប់ទៅផ្ទះវិញ។ លោកហ្គូតេរ៉េយល់ថាវាជារឿងសំខាន់ដែលភាគីហត្ថលេខីនៅក្នុងកិច្ចព្រមព្រៀងនៃបទឈប់បាញ់នេះប្ដេជ្ញាគោរព និងអនុវត្តតាមកិច្ចព្រមព្រៀងយ៉ាងពេញទំហឹង។
នៅពេលនេះ លោកហ្គូតេរ៉េកំពុងបំពេញទស្សនកិច្ចនៅស្រុកកំណើតរបស់លោកឯទីក្រុងលីសស្បូន (Lisbon) ប្រទេសព័រទុយហ្កាល់។ ប៉ុន្តែលោកត្រូវតែឆ្លៀតថ្លែងសុន្ទរកថាសង្ខេបដូចខាងលើនេះផ្ញើជូនសហគមន៍អន្តរជាតិ និងភាគីពាក់ព័ន្ធទាំងអស់ដោយសារតែវាជាព្រឹត្តិការណ៍ដ៏សំខាន់ និងជារបត់នយោបាយថ្មីនៅមជ្ឈិមបូព៌ា។
អ្នកខ្លះសង្ឃឹមថាទៅថ្ងៃខាងមុខក៏អាចនឹងមានកិច្ចព្រមព្រៀងស្រដៀងគ្នានេះរវាងអ៊ីស្រាអែល និងក្រុមហាម៉ាស់នៅតំបន់ហ្កាហ្សាផងដែរ។ តិចឬច្រើន កិច្ចព្រមព្រៀងនៅលីបង់ជាច្រកផ្លូវឆ្ពោះទៅរកការកសាងសន្តិភាពនៅមជ្ឈិមបូព៌ា។ លោកហ្គូតេរ៉េថ្លែងថាកងរក្សាសន្តិភាពរបស់អង្គការសហប្រជាជាតិត្រៀមខ្លួនដើម្បីតាមដានការអនុវត្តឱ្យបានត្រឹមត្រូវតាមលក្ខខណ្ឌនៃបទឈប់បាញ់។
ឆ្លៀតនៅក្នុងឱកាសនេះ លោកក៏សូមអំពាវនាវឱ្យមានបទឈប់បាញ់នៅតំបន់ហ្កាហ្សាផងដែរ។ លោកថ្លែងថាលោកបានទទួលដំណឹងស្ដីពីបទឈប់បាញ់នៅលីបង់កាលពីមួយថ្ងៃមុននេះ។ លោកថ្លែងថានៅទីបំផុតស្បៃអន្ធកាដ៏ខ្មៅងងឹតដែលគ្របដណ្ដប់ទៅលើប្រទេសលីបង់អស់រយៈពេលជាច្រើនខែកន្លងមកនេះចាប់ផ្ដើមមានពន្លឺឡើងវិញហើយជាលើកដំបូង។
លោកហ្គូតេរ៉េចាត់ទុកថាកិច្ចព្រមព្រៀងនេះជាមហាព្រឹត្តិការណ៍ដ៏សំខាន់ក្រៃលែង។ ជាពិសេស រឹតតែសំខាន់ខ្លាំងសម្រាប់ប្រជាជនស៊ីវិលដែលបានបង់នូវតម្លៃដ៏ខ្ពស់បំផុតនៅក្នុងជម្លោះប្រដាប់អាវុធដ៏បង្ហូរឈាមនេះ។ ចំពោះសំណួរថាតើបទឈប់បាញ់នេះអាចឋិតថេរចីរកាលយូរអង្វែងជារៀងរហូតឬយ៉ាងណា។ អ្នកខ្លះនៅមិនទាន់មានទំនុកចិត្ត១០០%នៅឡើយទេ។
ប៉ុន្តែប្រេសិតពិសេសរបស់អាមេរិក លោកអាម៉ូស ហូសស្តែន (Amos Hochstein) ថ្លែងថាបទឈប់បាញ់នេះមានលក្ខណៈអចិន្ត្រៃយ៍ ហើយមិនមែនជាបទឈប់បាញ់ត្រឹមតែរយៈពេល៦០ថ្ងៃនោះទេ។ លោកជាអ្នកចូលរួមនៅក្នុងការចរចា។ លោកចង់សង្កត់ធ្ងន់ថាគេត្រូវតែអនុវត្តតាមលក្ខខណ្ឌនៃបទឈប់បាញ់ដោយសន្សឹមៗ ជាជាងធ្វើឡើងទាំងប្រញាប់ប្រញាល់។
លោកថ្លែងបន្តទៀតថាយើងមិនចង់ឱ្យប្រវត្តិសាស្ត្រច្រំដែលដូចករណីឆ្នាំ២០០៦នៅពេលក្រុមហេសបូឡា និងអ៊ីស្រាអែលសម្រេចបានកិច្ចព្រមព្រៀងស្រដៀងគ្នានេះ។ ភាគីទាំង២ពិតជាបានផ្អាកប្រយុទ្ធគ្នាមែន ប៉ុន្តែឈប់បានតែមួយភ្លែតប៉ុណ្ណោះ។ មូលហេតុដោយសារភាគីទាំង២ឯកភាពគ្នានៅលើតែបបូរមាត់។ ប៉ុន្តែជាក់ស្ដែងពួកគេមិនបានអនុវត្តឱ្យបានត្រឹមត្រូវ និងពេញលេញទៅតាមកិច្ចព្រមព្រៀងទេ៕
ចែករំលែកព័តមាននេះ