អាជ្ញាធរក្រុងព្រះសីហនុចុះហាមឃាត់ការដ្ឋានសំណង់មួយកន្លែងសង់លើដីចំណីសមុទ្រ
- ព្រះសីហនុ
ខេត្តព្រះសីហនុ ៖ រដ្ឋបាលក្រុងព្រះសីហនុ កាលពីព្រឹកថ្ងៃទី២៣ វិច្ឆិកា ឆ្នាំ២០២៤ កន្លងមកថ្មីៗនេះ លោក ឃន ម៉ន…
ខេត្តព្រះសីហនុ ៖ រដ្ឋបាលក្រុងព្រះសីហនុ កាលពីព្រឹកថ្ងៃទី២៣ វិច្ឆិកា ឆ្នាំ២០២៤ កន្លងមកថ្មីៗនេះ លោក ឃន ម៉ន នាយករងរដ្ឋបាលសាលាក្រុងព្រះសីហនុ បានដឹកនាំមន្ត្រីជំនាញចុះពិនិត្យការដ្ឋានសាងសង់សំណង់លើចំណីឆ្នេរសមុទ្រមួយកន្លែងដែលមានទីតាំងស្ថិតនៅភូមិ៣ (ទំនប់រលក) សង្កាត់លេខ១ ក្រុងព្រះសីហនុ ខេត្តព្រះសីហនុ ។
បន្ទាប់ពីក្រុមការងារមន្ត្រីជំនាញចុះដល់ទីតាំងជាក់ស្ដែងពិនិត្យឃើញថា នៅក្នុងទីតាំងការដ្ឋានកំពុងមានសកម្មភាពជួសជុលសំណង់ចាស់ដែលមានស្រាប់មានទំហំ៤,៦ម៉ែត្រ គុណ១២ម៉ែត្រ និងកម្ពស់២ជាន់(ជាន់ផ្ទាល់ដី និងជាន់ទី១) ។
ជាមួយគ្នានេះ នៅលើទីតាំងក៏មានការសាងសង់សំណង់ពង្រីកបន្ថែមអំពីបេតុង មានទំហំ៥,៥ម៉ែត្រគុណ ២២,៤ម៉ែត្រដោយបានបណ្តុះសសរបេតុង និងមានកម្ពស់៣ជាន់ (ជាន់ទី១ ជាន់ទី២ និងជាន់ទី៣) ក្នុងនោះបានចាក់ប្លង់សេរួច និងរៀបឥដ្ឋជញ្ជាំងបានមួយចំនួន ស្ថិតនៅលើដីចំណីឆ្នេរសមុទ្រទាំងស្រុងតែម្តង ។
ស្របពេលចុះត្រួតពិនិត្យក្រុមការងារមន្ត្រីជំនាញបានជួប និងសាកសួរឈ្មោះ សុខ គឹម ភេទស្រី មានទីលំនៅបច្ចុប្បន្នផ្ទះ១៦អឺ០អឺ១អឺ២ ផ្លូវ២៩៩ ភូមិ១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ជាអ្នកមើលការខុសត្រូវទីតាំងការដ្ឋានសំណង់ខាងលើ ក្រុមការងារបានបញ្ជាក់ឲ្យដឹងថា ទីតាំងសង់សំណង់ខាងលើនេះពុំមានលិខិតអនុញ្ញាតសាងសង់ទេ ។
ស្ត្រីខាងលើបានឲ្យដឹងថា គាត់និងក្រុមជាងចំនួន៤នាក់ទៀត មកមើលការខុសត្រូវនិងសង់សំណង់នេះតាមរយៈមេការ (មិនស្គាល់ឈ្មោះ) ។ រូបគាត់ទាំង០៥នាក់ សូមធ្វើការសន្យាចំពោះមុខក្រុមការងារមន្ត្រីជំនាញថា នឹងបញ្ឈប់សកម្មភាពសាងសង់សំណង់លើចំណីសមុទ្រដោយពុំមានលិខិតអនុញ្ញាតចាប់ពីថ្ងៃផ្ដិតស្នាមមេដៃនេះតទៅ។ ក្រុមការងារចុះត្រួតពិនិត្យទីតាំងជាក់ស្ដែង ពុំបានជួបជាមួយម្ចាស់សំណង់ខាងលើនេះទេ ។
នៅក្នុងកំណត់ហេតុចុះបិទការដ្ឋាសាងសង់សំណង់រំលោភលើដីចំណីឆ្នេរសមុទ្រក្រុមការងារតម្រូវឱ្យម្ចាស់សំណង់ និងក្រុមជាងបញ្ឈប់រាល់សកម្មភាពសាងសង់សំណង់លើដីចំណីសមុទ្រ និងត្រូវធ្វើការរុះរើសំណង់ចេញពីដីចំណីឆ្នេរសមុទ្រជាបន្ទាន់និងបានដកហូតយកសម្ភារសាងសង់រួមមាន ម៉ូទ័រកាត់ដែក១គ្រឿង, ប៉ែលជីកចំនួន ២ដើម, ម៉ូទ័រស្វាន១គ្រឿង, ម៉ែត(៧,៥ម)១គ្រឿង, ស្លាបព្រាកំបោរចំនួន៣ដើម, ដែកដក១ដើម, ញញួរចំនួន៣ដើម, នីវ៉ូថ្លឹង១ដើម និងម៉ូទ័រយោង១គ្រឿង យកទៅរក្សាទុកនៅសាលាក្រុងព្រះសីហនុជាបណ្តោះអាសន្ន ដោយមិនទទួលខុសត្រូវលើការខូចខាត ឬបាត់បង់ឡើយ ក្នុងករណីម្ចាស់សំណង់ និងក្រុមជាងមិនអនុវត្តតាមការណែនាំរបស់ក្រុមការងារ នោះក្រុមការងារនឹងចាត់វិធានការតាមនីតិវិធីច្បាប់ ៕
ចែករំលែកព័តមាននេះ