ខេត្តកែប ៖ កាលពីព្រឹកថ្ងៃទី២៤ ខែវិច្ឆិកា ឆ្នាំ២០២៤កន្លងទៅ នៅលើផ្ទៃដីសហគមន៍១កន្លែង មានរៀបចំការដាំកូនកោងកាងចំនួន៣ពាន់ដើមបន្ថែមទៀត ដោយមានការចូលរួមពីក្រុមហ៊ុន សហការជាមួយក្រសួងបរិស្ថាន ព្រមទាំងអាជ្ញាធរខេត្ត…
ខេត្តកែប ៖ កាលពីព្រឹកថ្ងៃទី២៤ ខែវិច្ឆិកា ឆ្នាំ២០២៤កន្លងទៅ នៅលើផ្ទៃដីសហគមន៍១
កន្លែង មានរៀបចំការដាំកូនកោងកាងចំនួន៣ពាន់ដើមបន្ថែមទៀត ដោយមានការចូលរួមពីក្រុមហ៊ុន សហការជាមួយក្រសួងបរិស្ថាន ព្រមទាំងអាជ្ញាធរខេត្ត ។
លោក អុិន សៅ ប្រធានមន្ទីរបរិស្ថានខេត្តថ្លែងថា ការដាំកូនកោងកាងនៅលើផ្ទៃដីក្នុងសមុទ្រថ្ងៃនេះមានចំនួន៣ពាន់ដើម ដោយមានការចូលរួមពីក្រុមហ៊ុនឯកជននានា ។ កូនកោងកាងរាប់មុឺនដើមទៀត យើងមានគម្រោងដាំនៅតាមដីសហគមន៍នានានៅក្នុងខេត្តកែប ។
សហគមន៍នេសាទក្នុងខេត្តកែប ដែលបានក្លាយខ្លួនជាតំបន់ទេសចរណ៍មួយ បានដាក់ផែន
ការដាំដើមកោងកាងបន្ថែមចំនួន១០ម៉ឺនដើម ដើម្បីជួយការពារជីវចម្រុះដ៏សម្បូរបែបក្នុងតំបន់នេះ និងផ្តល់ជូនភ្ញៀវទេសចរនូវបរិយាកាសស្ងប់ស្ងាត់ ក្នុងការសម្រាកលំហែ ។
ដើមកោងកាងជាង១០ម៉ឺនដើម នឹងត្រូវដាំនៅសហគមន៍នេសាទភូមិថ្មី ក្នុងខេត្តកែប ដើម្បីលើកកម្ពស់ការការពារប្រព័ន្ធអេកូឡូស៊ីឆ្នេរសមុទ្រប្រកបដោយនិរន្តរភាព និងការពារធនធានជីវចម្រុះ ទន្ទឹមនឹងនេះ ក៏ជាការទាក់ទាញភ្ញៀវទេសចរកាន់តែច្រើន ។
សហគមន៍នេះ ត្រូវបានបង្កើតឡើងក្នុងឆ្នាំ២០០១ ដើម្បីការពារប្រព័ន្ធអេកូឡូស៊ីឆ្នេរសមុទ្រ និងផ្សព្វផ្សាយការអភិរក្សព្រៃកោងកាង ដែលជាជម្រកដ៏សំខាន់សម្រាប់ជីវិតក្នុងសមុទ្រ ។ចាប់តាំងពីពេលនោះមក វាបានក្លាយជាកន្លែងទាក់ទាញទេសចរ ដែលមានមនុស្សប្រហែល៧ពាន់នាក់មកទស្សនាជារៀងរាល់ឆ្នាំ ។
សហគមន៍នេះ មានផ្ទៃដីសរុប ១៩៨ហិកតា គ្របដណ្តប់ដោយព្រៃកោងកាង ស្មៅសមុទ្រ និង
ផ្កាថ្ម ដែលធ្វើឱ្យវាសម្បូរទៅដោយធនធានជីវចម្រុះ ។ នៅពេលដាំដើមកោងកាងកាន់តែច្រើន វានឹងមានផលវិជ្ជមានបន្ថែមទៀតលើជីវចម្រុះក្នុងទឹក ព្រមទាំងចូលរួមក្នុងការការពារបរិស្ថានផង
ដែរ ។
«យើងក៏មានសេវាកម្មដូចជា ទូកទេសចរណ៍ ភេសជ្ជៈ និងតូបលក់អាហារ ការជួលខ្យូស បន្ទប់
ស្អាត និងស្ពានប្រវែង ៣០០ម៉ែត្រសម្រាប់ដើរតាមព្រៃកោងកាង ដែលអាចឱ្យអ្នកទេសចរយកស្រូបខ្យល់អាកាសត្រជាក់ស្រស់ស្រាយ និងស្តាប់សំឡេងរលក ព្រមទាំងសត្វយំ ក៏ដូចជាអាចមើលថ្ងៃលិចបានថែមទៀតផង» ។
ព្រៃកោងកាងជារបៀងយុទ្ធសាស្ត្រតភ្ជាប់ប្រព័ន្ធអេកូឡូស៊ី ពីតំបន់ដីគោក ឆ្នេរ និងសមុទ្រ ហើយក៏ជារនាំងប្រឆាំងនឹងគ្រោះធម្មជាតិ និងការប្រែប្រួលអាកាសធាតុ ។ មិនតែប៉ុណ្ណោះបានចូលរួមចំណែកក្នុងការអភិវឌ្ឍសេដ្ឋកិច្ចជាតិ និងចូលរួមចំណែកក្នុងការកាត់បន្ថយភាពក្រីក្រ ដោយមានតួនាទីយ៉ាងសំខាន់ ជាកន្លែងរក្សាផលស្តុក ជាដែនជម្រក និងជាប្រភពមេពូជនៃមច្ឆជាតិ ដែលជាប្រភពធនធានសមុទ្រដ៏សម្បូរបែប ហើយចាំបាច់យើងត្រូវការពារ អភិរក្ស និងដាំស្តារព្រៃកោងកាងឡើងវិញ ។
ដើមកោងកាងផ្តល់នូវការបន្សាំុធម្មជាតិ ទៅនឹងផលប៉ះពាល់នៃការប្រែប្រួលអាកាសធាតុ និងប្រឆាំងនឹងការប្រែប្រួលអាកាសធាតុ និងចូលរួមចំណែកកាត់បន្ថយការបំភាយឧស្ម័នផ្ទះកញ្ចក់ ៕
ចែករំលែកព័តមាននេះ