អន្តរជាតិ ៖ តាមប្រភពពីកាសែត The Sun និង Goal.com កាលពីពេលថ្មីៗនេះ បានឱ្យដឹងថា កំពូលកីឡាករបាល់ទាត់សញ្ជាតិព័រទុយហ្គាល់ Cristiano Ronaldo កំពុងតែជាប់ពាក់ព័ន្ធក្នុងជម្លោះផ្លូវច្បាប់ជាមួយវេជ្ជបណ្ឌិតកែសម្ផស្សដ៏ល្បីឈ្មោះមួយរូប លោក Roshan Ravindran ដែលអះអាងថា កីឡាកររូបនេះបានជំពាក់លុយខ្លួន ៤ម៉ឺនផោន ស្មើនឹង ៥០,២២៧ដុល្លារអាមេរិក ទូទាត់សម្រាប់សេវាកម្មលោកបានផ្តល់ឱ្យ។

កាសែត The Sun រាយការណ៍ថា លោក Ravindran ដែលត្រូវបានស្គាល់ឈ្មោះហៅក្រៅថា វេជ្ជបណ្ឌិត Rosh បានចោទប្រកាន់ Ronaldo មិនបានបង់ប្រាក់ទូទាត់សេវាកម្មដែលលោកផ្តល់ អំឡុងពេលកីឡាកររូបនេះលេងឱ្យក្លិបអង់គ្លេស Manchester United ក្នុងឆ្នាំ ២០២១ និង ២០២២ ។ លើសពីនេះ វេជ្ជបណ្ឌិត Rosh បានអះអាងថា លោកមិនត្រឹមតែបម្រើសេវាកម្មដល់ Ronaldo ប៉ុណ្ណោះ ប៉ុន្តែរួមទាំងសមាជិកគ្រួសារ និងអ្នកជិតស្និតបំផុតរបស់កីឡាកររូបនេះផងដែរ នៅក្នុងគ្លីនិកលោកស្ថិតនៅតំបន់ Cheshire ភាគពាយព្យប្រទេសអង់គ្លេស។

ប្រភពដដែលបានបន្តថា ពាក្យបណ្តឹងមិនបានបញ្ជាក់ពីសេវាកម្មវេជ្ជបណ្ឌិត Rosh ផ្តល់ឱ្យ Ronaldo នោះទេ ប៉ុន្តែជាទូទៅគ្លីនិកវេជ្ជបណ្ឌិតរូបនេះ ត្រូវបានដឹងថា ផ្តល់សេវាកម្មព្យាបាលផ្តោតលើផ្នែកកែសម្ផស្ស រួមមាន Botox, Fillers, Skin Care និង Eyelifting។ ហើយនៅពេលត្រូវបានសាកសួរសម្រាប់ព័ត៌មានលម្អិតបន្ថែម វេជ្ជបណ្ឌិត Rosh បានបដិសេធការអត្ថាធិប្បាយ ដោយលើកឡើងពីដំណើរការផ្លូវច្បាប់កំពុងតែបន្ត។ លោកថា «វាគឺជាបញ្ហាផ្លូវច្បាប់កំពុងដំណើរការ ហើយក្នុងនាមជាអ្នកជំនាញ ខ្ញុំមិនពិគ្រោះពិភាក្សាអំពីអ្នកជំងឺខ្ញុំនោះទេ»។

ដូចត្រូវបានពណ៌នាដោយប្រភពពីកាសែត The Sun លោក Ravindran ត្រូវបានទទួលស្គាល់យ៉ាងច្បាស់ពីភាពជោគជ័យក្នុងវិស័យកែសម្ផស្ស ដែលត្រូវបានកត់សម្គាល់ចំពោះជំនាញរបស់លោក និងការផ្តល់ជូនសេវាកម្មដល់អតិថិជនគឺជាបុគ្គលល្បីឈ្មោះ ទាំងអ្នកនយោបាយ សែរាជវង្ស អត្តពលិក និងតារាហូលីវូដផងដែរ។

ក្រឡេកមកកាន់កីឡាករ Cristiano Ronaldo ឯណេះវិញ បច្ចុប្បន្នឈានដល់វ័យ៣៩ឆ្នាំហើយ និងត្រូវបានចាត់ទុកជាកីឡាករបាល់ទាត់ដ៏អស្ចារ្យបំផុតក្នុងប្រវត្តិសាស្ត្រ ដោយបានពានរង្វាន់ជាច្រើនទាំងឯកត្តិជន ក៏ដូចជាមួយក្លិបអាជីព និងក្រុមជម្រើសជាតិព័រទុយហ្គាល់។ ហើយបើយោងតាមទស្សនាវដ្ដីពាណិជ្ជកម្មអាមេរិក Forbes បច្ចុប្បន្ន Ronaldo គឺជាកីឡាករបាល់ទាត់មានថ្លៃពលកម្មខ្ពស់បំផុតលើពិភពលោករហូតដល់២០០លានអឺរ៉ូក្នុងមួយឆ្នាំ ជាមួយក្លិប Al Nassr សមាជិកលីគកំពូលអារ៉ាប៊ីសាអូឌីត៕ ប្រភព ៖ The Sun និង VnExpress