ខេត្តសៀមរាប ៖ ថ្លែងក្នុងកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជឿជាក់យ៉ាងមុតមាំថា អ្នកវិនិយោគ…
ខេត្តសៀមរាប ៖ ថ្លែងក្នុងកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជឿជាក់យ៉ាងមុតមាំថា អ្នកវិនិយោគ និងអ្នកទេសចរនឹងមិនមកប្រទេសដែលមានសញ្ញាក្រហម «ប្រយ័ត្នគ្រា.ប់មីន» នោះទេ ។
ក្នុងកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន នៅព្រឹកថ្ងៃទី២៥ ខែវិច្ឆិកា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត បានគូសបញ្ជាក់ថា មីនបានបង្កផលប៉ះពាល់ពីសង្គ្រាមលើសតិអារម្មណ៍ និងស្មារតីមានភាពធ្ងន់ធ្ងរដូចគ្នា ដូច្នេះគ្មានអ្នកណានឹងមកប្រទេសដែលមានសញ្ញាក្រហម «ប្រយ័ត្នគ្រាប់មីន» នោះទេ ។
នៅចំពោះថ្នាក់ដឹកនាំមកពីបណ្តាប្រទេសនានាសម្ដេចបវរធិបតី បានគូសបញ្ជាក់យ៉ាងដូច្នេះថា ៖ «ប្រាកដណាស់ ទាំងអ្នកវិនិយោគ និងអ្នកទេសចរនឹងមិនមកប្រទេសដែលមានសញ្ញាក្រហម ប្រយ័ត្នគ្រាប់មីននោះទេ ផលប៉ះពាល់ពីសង្គ្រាមលើសតិអារម្មណ៍ និងស្មារតីមានភាពធ្ងន់ធ្ងរដូចគ្នា ការរស់នៅជាមួយគ្រាប់មីនបានធ្វើឱ្យប្រជាជនកម្ពុជាជាច្រើនមានភាពលំបាកក្នុងការទទួលយកការពិតនៃសន្តិភាព និងនឹកស្រមៃដល់អនាគតដ៏ភ្លឺស្វាង» ។
សម្ដេចមហាបវរធិបតី បានបន្ថែមទៀតថា ស្លាកស្នាមដែលគ្រា.ប់មីនបានបន្សល់ទុកទាំងផ្លូវកាយ និងផ្លូវចិត្ត គឺជាការរំលឹកប្រចាំថ្ងៃអំពីភាពរន្ធត់កាលពីអតីតកាល ។ ជាមួយគ្នានោះដែរ សម្ដេចបវរធិបតី ក៏បានរំលឹកថា វឌ្ឍនាភាពដ៏ថ្លៃថ្លារបស់កម្ពុជាក្នុងសកម្មភាពដោះមីននឹងមិនអាចសម្រេចបានទេ ប្រសិនបើគ្មានការជួយគាំទ្រពីសហគមន៍អន្តរជាតិតាមរយៈភាពជាដៃគូជាមួយប្រទេស និងអង្គការម្ចាស់ជំនួយដែលបានផ្ដល់នូវកិច្ចគាំទ្រទាំងផ្នែកហិរញ្ញវត្ថុ បច្ចេកទេស និងការលើកទឹកចិត្តយើងបានបោះជំហានដ៏សំខាន់ក្នុងការសម្រេចគោលដៅ ។
សម្ដេចមហាបវរធិបតី ហ៊ុន ម៉ាណែត ក៏បានឲ្យដឹងថា មកទល់បច្ចុប្បន្ននេះកម្ពុជាបានបំផ្លាញមីនប្រឆាំងមនុស្សជាង១លានគ្រា.ប់ និងសំណល់ជាតិផ្ទុះចំនួន៣លានគ្រាប់ ។ កម្ពុជាក៏បានបោសសម្អាតមីនលើផ្ទៃដីជាង៣.០០០ គីឡូម៉ែត្រការ៉េ ដោយបានប្រែក្លាយរាជធានី-ខេត្តចំនួន១៥ ក្នុង ចំណោម២៥ ជារាជធានី-ខេត្តអស់មីន ហើយចំនួនជនរងគ្រោះបានធ្លាក់ចុះពីមធ្យមជាង៤.៣០ ០នាក់ ក្នុងមួយឆ្នាំក្នុងឆ្នាំ១៩៩៦ មកតិចជាង១០០នាក់ ក្នុងមួយឆ្នាំក្នុងរយៈពេលដប់ឆ្នាំចុងក្រោយនេះ ។
សម្ដេចមហាបវរធិបតី នាយករដ្ឋមន្ត្រី ថ្លែងទៅកាន់អង្គវេទិកាទាំងមូលថា សូមអនុវត្តការប្តេជ្ញាចិត្តនេះមិនត្រឹមតែជាគោលដៅសម្រាប់មនុស្សជំនាន់នេះប៉ុណ្ណោះទេ ប៉ុន្តែក៏ជាការសន្យាសម្រាប់អ្នកជំនាន់ក្រោយផងដែរ និងសូមឲ្យសន្និសីទនេះ ក្លាយជាឱកាសដ៏មានអត្ថន័យមួយដោយសេចក្ដីមេត្តា និងគោលបំណងរួមនឹងចូលរួមកសាងពិភពលោកមួយដែលគ្មានគ្រោះថ្នាក់ដោយសារគ្រា.ប់មីន ៕
ចែករំលែកព័តមាននេះ