រថយន្តចិន ជាពិសេសរថយន្តអគ្គិសនី បានបង្ហាញវត្តមាននៅតាមដងផ្លូវនានា នៅក្នុងប្រទេសកម្ពុជាកាន់តែច្រើន ទោះបីមិនដល់រថយន្តជជុះ និងរថយន្តថ្មីមកពីប្រទេសផ្សេងក៏ដោយ ។ ប៉ុន្តែប្រសិនបើក្រុមហ៊ុនផលិតរថយន្តដ៏ធំរបស់ចិនមកបើករោងចក្រនៅកម្ពុជា ហើយផ្តល់ជូនជម្រើសដល់ពលរដ្ឋជាមួយនឹងតម្លៃប្រកួតប្រជែងនោះ ចំណែកទីផ្សារថយន្តក្រុមហ៊ុននេះនឹងកាន់តែរីក…
រថយន្តចិន ជាពិសេសរថយន្តអគ្គិសនី បានបង្ហាញវត្តមាននៅតាមដងផ្លូវនានា នៅក្នុងប្រទេសកម្ពុជាកាន់តែច្រើន ទោះបីមិនដល់រថយន្តជជុះ និងរថយន្តថ្មីមកពីប្រទេសផ្សេងក៏ដោយ ។ ប៉ុន្តែប្រសិនបើក្រុមហ៊ុនផលិតរថយន្តដ៏ធំរបស់ចិនមកបើករោងចក្រនៅកម្ពុជា ហើយផ្តល់ជូនជម្រើសដល់ពលរដ្ឋជាមួយនឹងតម្លៃប្រកួតប្រជែងនោះ ចំណែកទីផ្សារថយន្តក្រុមហ៊ុននេះនឹងកាន់តែរីក ។
នៅពេលនេះ បើទោះបីជាប្រជាប្រិយភាព និងទីផ្សាររថយន្តចិននៅមិនទាន់ទូលំទូលាយដូចជា ទីផ្សាររថយន្តជប៉ុន ឬក៏រថយន្តមកពីអឺរ៉ុប និង អាមេរិកក៏ពិតមែន ប៉ុន្តែវត្តមាននៃរថយន្តចិននៅកម្ពុជាកាន់តែច្រើនបានបង្ហាញវត្តមាននៅលើទ្រូងផ្លូវនានា នៅក្នុងប្រទេសជាមួយនឹងយីហោ ជាច្រើន ។ សូមកុំមើលស្រាលចិន ពីព្រោះនៅពេលនេះសូម្បីតែនៅអាមេរិក និង អឺរ៉ុប ក៏បានកំពុងតែរងគ្រោះព្រោះផលិតកម្មរថយន្តចិន ដែលមកដល់ពេលនេះវិសាលភាពនៃផលិតកម្មរថយន្តរបស់ប្រទេសមហាអំណាចទី២ នៅលើពិភពលោកនេះ មួយឆ្នាំអាចផលិតរថយន្តដល់ទៅ៤០ លានគ្រឿង ។
ចំនួនរថយន្តចិននៅកម្ពុជា នៅពេលនេះ ទោះបីជាមិនដឹងចំនួនច្បាស់លាស់ក៏ពិតមែន តែពលរដ្ឋកម្ពុជាជាច្រើននាក់បានទទួលស្គាល់ នូវប្រណីតភាព ផាសុខភាព និងបច្ចេកវិទ្យាទំនើបៗដែលបំពាក់នៅលើរថយន្តទាំងនេះ ។ ដូច្នេះហើយបានជាវាមានការចាប់អារម្មណ៍ និង ទទួលការគាំទ្រដោយពលរដ្ឋខ្លះ ។ កាលពីម្សិលមិញនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានកត់សម្គាល់អំពីវត្តមាននៃរថយន្តចិននៅកម្ពុជាផងដែរ ។
នៅក្នុងពិធីចែកសញ្ញាប័ត្រជូននិស្សិតនៃសាកលវិទ្យាល័យភូមិន្ទភ្នំពេញ សម្តេចមហាបវរធិបតី នាយករដ្ឋមន្ត្រីបាន លើកឡើងថា កម្ពុជាកំពុងតែធ្វើការចរចាជាមួយនឹងក្រុមហ៊ុនផលិតរថយន្តចិនមួយ គឺ ក្រុមហ៊ុន BYD អោយមកបង្កើតរោងចក្រតម្លើងរថយន្តនៅកម្ពុជា ខណៈដែលរថយន្តយីហោនេះមានទីផ្សារនៅក្នុងស្រុកស្រាប់ ។
សម្តេចមហាបវរធិបតីបានបង្ហាញនូវក្តីសង្ឃឹមថា ក្រុមហ៊ុនផលិតរថយន្តចិនមួយនេះនឹងមកបណ្តាក់ទុនបើករោងចក្រដំឡើងរថយន្តនៅកម្ពុជានៅឆ្នាំក្រោយបន្ថែមលើរោងចក្ររថយន្តតូតូយូតារបស់ជប៉ុន និងរថយន្តហ្វត របស់អាមេរិក ដែលមានស្រាប់ ។
ទោះបីជារថយន្ត BYD នេះបានចូលមកកម្ពុជាថ្មីៗនេះក៏ដោយ ពោល គឺក្រោយគេបន្តិចមែន ប៉ុន្តែនៅលើទីផ្សាររថយន្តអគ្គិសនីរបស់ក្រុមហ៊ុនចិនមួយនេះក៏មិនធម្មតាទេ ។ តាមស្ថិតិក្រសួងសាធារណការ និងដឹកជញ្ជូនបានឲ្យដឹងថា នៅក្នុងចំណោមរថយន្តអគ្គិសនីចំនួនជាង ១.៦០០គ្រឿង ដែលបានលក់ចេញនៅកម្ពុជា នៅក្នុងឆមាសទី១ នៃឆ្នាំ២០២៤ រថយន្ត BYD របស់ចិន កាន់កាប់ចំណែកទីផ្សារបានលើសពី ៤០ភាគរយ ពោល គឺលក់ដាច់បានដល់ទៅជាង៦៥០គ្រឿង លើសរថយន្តអគ្គិសនីក្រុមហ៊ុនតូយ៉ូតារបស់ប្រទេសជប៉ុន និងតេស្លារបស់អាមេរិក ។
មកដល់ពេលនេះរបាំងមួយដែលរាំងផ្លូវនៃកំណើនការប្រើប្រាស់រថយន្តអគ្គិសនីដែលចិនកំពុងតែល្បីនោះ គឺស្ថានីយបញ្ចូលថាមពលសាធារណៈ និងគុណភាព ។ ក្រៅពីនោះដូចជា មិនមែនជាកង្វល់ធំនោះទេ ដូច្នេះប្រសិនបើក្រុមហ៊ុនអាចពង្រីក និងរៀបចំបណ្តាញបញ្ជូលថាមពលសាធារណៈច្រើន នោះទីផ្សាររថយន្តអគ្គិសនីនឹងកើនហើយតែពេលណាទីផ្សារថយន្តអគ្គិសនីកើនកំណើនការប្រើប្រាស់ និងប្រជាប្រិយភាពរថយន្តចិននឹងកើនឡើងដោយស្វ័យប្រវត្តិ ។
សរុបទៅ ប្រសិនបើឧស្សាហករផលិតកម្មរថយន្តចិនមានការអត់ធ្មត់ហើយតស៊ូបង្ហាញឧត្តមភាពនៃផលិតផលរថយន្តរបស់ខ្លួននៅកម្ពុជាបន្តទៀត ឬមកបើករោងចក្រនៅកម្ពុជា ហើយអាចផ្តល់រថយន្តទំនើបនិងមានតម្លៃប្រកួតប្រជែង ចំណែកទីផ្សាររថយន្តចិននៅកម្ពុជានឹងរីកធំឡើង ហើយកាន់តែរីកចម្រើន ពីព្រោះកម្ពុជាកំពុងតែលើកទឹកចិត្តឲ្យពលរដ្ឋប្រើប្រាស់រថយន្តអគ្គិសនី ។
ការប្រើរថយន្តអគ្គិសនីជួយបន្ថយការចំណាយទៅលើប្រេងសាំង ។ ដូច្នេះ បើសិនជាវាស្រួលប្រើ ហើយតម្លៃសមរម្យនោះប្រជាជនកម្ពុជានឹងកាន់តែច្រើននឹងងាកមកប្រើរថយន្តអគ្គិសនី ៕
ចែករំលែកព័តមាននេះ