ខេត្តកំពត ៖ ជនជាតិវៀតណាមប្រុស-ស្រីចំនួន២៤នាក់ ត្រូវបានបណ្ដេញចេញតាមច្បាប់អន្តោ ប្រវេសន៍ ចេញពីកម្ពុជាតាមច្រកទ្វារព្រំដែនអន្តរជាតិព្រែកចាក ស្ថិតក្នុងស្រុកកំពង់ត្រាច ខេត្តកំពត កាលពីវេលាម៉ោង១១ព្រឹក ថ្ងៃទី១៨…
ខេត្តកំពត ៖ ជនជាតិវៀតណាមប្រុស-ស្រីចំនួន២៤នាក់ ត្រូវបានបណ្ដេញចេញតាមច្បាប់អន្តោ ប្រវេសន៍ ចេញពីកម្ពុជាតាមច្រកទ្វារព្រំដែនអន្តរជាតិព្រែកចាក ស្ថិតក្នុងស្រុកកំពង់ត្រាច ខេត្តកំពត កាលពីវេលាម៉ោង១១ព្រឹក ថ្ងៃទី១៨ ខែវិច្ឆិកា ឆ្នាំ២០២៤ ។
បើតាមការឱ្យដឹងពីមន្ត្រីនគរបាលប៉ុស្តិ៍ច្រកទ្វារព្រែកចាក បានប្រាប់ឱ្យដឹងថា ជនជាតិវៀតណាមចំនួន២៤នាក់ ក្នុងនោះមានស្រីចំនួន១១នាក់ ត្រូវបានមន្ត្រីនាយកដ្ឋានសើុបអង្កេត និងនីតិវិធីប្រចាំខេត្តព្រះសីហនុ បានរកឃើញថា អ្នកទាំងនេះលួចស្នាក់នៅធ្វើការងារដោយខុសច្បាប់ ហើយត្រូវបានបណ្ដេញចេញតាមច្រកទ្វារព្រំដែនអន្តរជាតិព្រែកចាក ។ ការបញ្ជូនពួកគេឱ្យត្រឡប់ទៅប្រទេសរបស់ខ្លួនវិញនោះ ក៍មានខាងអាជ្ញាធរវៀតណាមមកទទួលយកនៅច្រកទ្វារព្រំដែនផងដែរ ។
កាលពីខែមុន នៅថ្ងៃទី៦ មិថុនា ក៏មានការបណ្ដេញចេញជនជាតិវៀតណាមចំនួន៤៦នាក់ ដែលលួចស្នាក់នៅធ្វើការងារខុសច្បាប់ម្ដងមកហើយដែរ ។ នេះបើតាមរបាយការណ៍របស់អគ្គនាយក ដ្ឋានអន្តោប្រវេសន៍ ដែលផ្សព្វផ្សាយនៅលើទំព័រហ្វេសប៊ុក ។
ការបណ្តេញចេញធ្វើឡើងតាមប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត ក្នុងនោះមានចំនួន៤២នាក់ (ស្រី១៦នាក់) ដែលពាក់ព័ន្ធករណីលួចស្នាក់នៅធ្វើការងារខុសច្បាប់ (Call Center) ទទួលពីស្នងការដ្ឋាននគរបាលខេត្តកំពត និងចំនួន៤នាក់ ភេទប្រុស ពាក់ពន្ធ័ករណីលួចស្នាក់នៅធ្វើការងារខុសច្បាប់ (គ្មានលិខិតឆ្លងដែន) ទទួលបានពីស្នងការដ្ឋាននគរបាលខេត្តព្រះសីហនុ ។
បើតាមនាយឧត្តមសេនីយ៍ សន្តិបណ្ឌិត ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួង មហាផ្ទៃ បានបញ្ជាក់ប្រាប់បណ្តាញព័ត៌មានឱ្យដឹងថា ក្រៅពីជនជាតិវៀតណាម៤៦នាក់ ដែលត្រូវបានបណ្តេញចេញ ក៏មានជនបរទេស១៣នាក់ផ្សេងទៀតដែលត្រូវបានបណ្តេញចេញដែរ ក្នុងនោះមានជនជាតិជប៉ុន១២នាក់ និងជនជាតិចិន១នាក់ ។
កម្ពុជាក៏កំពុងត្រៀមបណ្តេញជនបរទេសដែលធ្វើការខុសច្បាប់ជាង៣០០នាក់ផ្សេងទៀតផងដែរ ក្នុងនោះមានរហូតដល់២០សញ្ជាតិ ។ លោកនាយឧត្តមសេនីយ៍បានបញ្ជាក់បន្ថែមថា ការបណ្តេញចេញនេះ អនុវត្តតាមច្បាប់ចំពោះជនបរទេសទាំងអស់ដែលចូលមកស្នាក់នៅ និងធ្វើការដោយខុសច្បាប់នៅកម្ពុជា ។
កាលពីខែកញ្ញាកន្លងទៅ កម្ពុជាបានបណ្ដេញជនជាតិវៀតណាមសរុប៨១នាក់ចេញពីប្រទេស ក្នុងនោះមានជនជាតិវៀតណាម៦០នាក់ (ស្រី១៥នាក់) ពាក់ព័ន្ធករណីលួចស្នាក់នៅធ្វើការងារខុសច្បាប់ (Call Center) ត្រូវបានបណ្តេញចេញតាមប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត កាលពីថ្ងៃទី០៦ ខែកញ្ញា។ ក្នុងករណីដូចគ្នានេះដែរ ជនជាតិវៀតណាម២១នាក់ (ស្រី២នាក់) ពាក់ព័ន្ធករណីបំពានប្រកាស ស្តីពីការបណ្តេញចេញ លួចឆ្លងដែនខុសច្បាប់ លួចស្នាក់នៅធ្វើការងារខុសច្បាប់ គ្មានលិខិតឆ្លងដែន ត្រូវបានបណ្តេញចេញតាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង កាលពីថ្ងៃទី២០ ខែកញ្ញា ។
តាមការកត់សម្គាល់ ជុំវិញការបណ្ដេញចេញជនជាតិវៀតណាម កាលពីចុងឆ្នាំ២០២៣ អគ្គ នាយកដ្ឋានអន្តោប្រវេសន៍ បានសហការជាមួយអគ្គស្នងការដ្ឋាននគរបាលជាតិ បានសម្រេចបណ្តេញជនជាតិវៀតណាមដ៏ច្រើនប្រមាណជាង២០០នាក់ ក្នុងនោះមានស្រី៥៦នាក់ ចេញពីកម្ពុជា ដោយសារពួកគេជាប់ពាក់ព័ន្ធបទល្មើសឆបោកតាមប្រព័ន្ធអនឡាញ(Online Scam) និងស្នាក់នៅខុសច្បាប់ ។
បើតាមអគ្គនាយកដ្ឋានអន្តោប្រវេសន៍ ជនជាតិវៀតណាម២៥៧នាក់ ត្រូវបានសមត្ថកិច្ចឃាត់ខ្លួនកាលពីថ្ងៃទី១ ធ្នូ នៅសង្កាត់ស្វាយជ្រុំ ក្រុងអរិយក្សត្រ ខេត្តកណ្តាល ។ ពួកគេទាំងនោះ ត្រូវបានបណ្ដេញចេញតាមច្រកទ្វារអន្តរជាតិបាវិត ដោយមានការសម្របសម្រួល និងសហការរវាងសមត្ថកិច្ចកម្ពុជា និងវៀតណាម ៕
ចែករំលែកព័តមាននេះ