ខេត្តព្រៃវែង ៖ ឯកឧត្តម សួន សុម៉ាលីនអភិបាលខេត្ត បានថ្លែងថា ព្រំដែនរវាងខេត្តព្រៃវែង និងខេត្តទាំង៣នៃសាធារណរដ្ឋសង្គមនិយមវៀតណាម ត្រូវបានបោះបង្គោលសីមាព្រំដែនរួចរាល់ជាស្ថាពរ សរុបចំនួន១៩៦បង្គោល…
ខេត្តព្រៃវែង ៖ ឯកឧត្តម សួន សុម៉ាលីនអភិបាលខេត្ត បានថ្លែងថា ព្រំដែនរវាងខេត្តព្រៃវែង និងខេត្តទាំង៣នៃសាធារណរដ្ឋសង្គមនិយមវៀតណាម ត្រូវបានបោះបង្គោលសីមាព្រំដែនរួចរាល់ជាស្ថាពរ សរុបចំនួន១៩៦បង្គោល ។ឯកឧត្តមបន្តថា ក្នុងនោះបង្គោលខ្នាតធំមានចំនួន២២បង្គោល(ខាងកម្ពុជា៧បង្គោល ខាងវៀតណាម៧បង្គោល និងបង្គោលរួម៨បង្គោល)ស្មើនឹង១៣ទីតាំង ។
ចំណែកបង្គោលបំពេញបន្ថែមមានចំនួន១៤៤បង្គោល (ខាងកម្ពុជា ៦៥បង្គោល ឯខាងវៀតណាម៦៨បង្គោល និងបង្គោលរួម១១បង្គោល) ស្មើនឹង ៧០ទីតាំង ។ បង្គោលតំរុយមានចំនួន៣០បង្គោល ស្មើនឹង ៣០ទីតាំង ។ឯកឧត្តមអភិបាលខេត្ត បានថ្លែងបែបនេះ ក្នុងឱកាសអញ្ជើញជាអធិបតីភាពជាមួយឯកឧត្តម ទ្បាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន នៅក្នុងសិក្ខាសាលាផ្សព្វផ្សាយស្តីពី «កិច្ចការព្រំដែននៃព្រះរាជាណាចក្រកម្ពុជា»ដែលប្រព្រឹត្តទៅនៅសាលប្រជុំធំ«A»សាលាខេត្ត កាលពីថ្ងៃទី១៨ ខែវិច្ឆិកា ឆ្នាំ២០២៤កន្លងទៅ ។
ឯកឧត្តមអភិបាលខេត្តបានបន្ថែមថា លើការងារគ្រប់គ្រងព្រំដែន ខេត្តព្រៃវែងមានស្រុកចំនួន៤ ឃុំចំនួន៨ និងភូមិចំនួន១៧ ជាប់ព្រំដែនជាមួយសាធារណរដ្ឋសង្គមនិយមវៀតណាម ដែលមានខ្សែបន្ទាត់ព្រំដែនប្រវែងសរុប៨៤,២គីឡូម៉ែត្រ និងមានច្រកទ្វារព្រំដែនចំនួន៦រួមមាន ៖១-ច្រកទ្វារព្រំដែនអន្តរជាតិបន្ទាយចក្រី ស្ថិតនៅក្នុងឃុំបន្ទាយចក្រី ស្រុកព្រះស្ដេច ទល់នឹងឃុំយិនបា ស្រុកតឹងហុង ខេត្តដុងថាប ប្រទេសវៀតណាម ។២-ច្រកទ្វារព្រំដែនអន្តរជាតិកោះរកា ស្ថិត នៅក្នុងឃុំកោះរកា ស្រុកពាមជរ ទល់នឹងឃុំធឿងភឿក ស្រុកហុងនី ខេត្តដុងថាប ប្រទេសវៀតណាម ។៣-ច្រកទ្វារព្រំដែនអន្តរជាតិម៉ឺនជ័យ ស្ថិតនៅក្នុងឃុំក្របៅ ស្រុកកំចាយមារ ទល់នឹងឃុំតាំងចិន ស្រុកតាំងបៀង ខេត្តតៃនិញ ប្រទេសវៀតណាម ។
៤-ច្រកទ្វារព្រំដែនទ្វេភាគីកោះសំពៅ ស្ថិតនៅក្នុងឃុំកោះសំពៅ ស្រុកពាមជរ ទល់នឹងឃុំឆៀងហាវ A និងឃុំឆៀងហាវ B ស្រុកហុងងឺ ខេត្តដុងថាប ប្រទេសវៀតណាម ។៥-ច្រកទ្វារតំបន់ព្រំដែនពាមមន្ទារ ស្ថិតនៅក្នុងឃុំពាមមន្ទារ ស្រុកកំពង់ត្របែក ទល់នឹង ឃុំចុងប៊ិន ស្រុកតឹងហុង ខេត្តដុងថាប ប្រទេសវៀតណាម ។៦-ច្រកទ្វារតំបន់ព្រំដែនស្វាយអាង៉ោង ស្ថិតនៅឃុំចាម ស្រុកកំពង់ត្របែក ទល់នឹងឃុំហឹងបៀន ស្រុកតឹងហ្នឹង ខេត្តឡុងអាន ប្រទេសវៀតណាម ។
ឯកឧត្តមអភិបាលខេត្ត បានបញ្ជាក់ថា លើកិច្ចសហប្រតិបត្តិការល្អរវាងខេត្តព្រៃវែង និងខេត្តទាំង៣របស់វៀតណាមជាប់ព្រំដែន កងកម្លាំងការពារព្រំដែនភាគីទាំងសងខាង តែងតែផ្លាស់ប្តូរព័ត៌មានជាប្រចាំ ផ្តល់កិច្ចសហការត្រួតពិនិត្យសកម្មភាពតាមព្រំដែន និងសហការចុះល្បាតទ្វេភាគីការពារសន្តិសុខសណ្តាប់ធ្នាប់តំបន់ព្រំដែន ការពារខ្សែបន្ទាត់បង្គោលព្រំដែន សហការរៀបចំពិនិត្យដោះស្រាយបានទាន់ពេលវេលា រាល់ករណីដែលកើតមានបញ្ហាផ្សេងៗនៅតំបន់ព្រំដែន ។
ការប្រយុទ្ធប្រឆាំង បង្ការទប់ស្កាត់ កាត់បន្ថយបទល្មើសគ្រប់ប្រភេទ និងបានបន្តពង្រឹងកិច្ចសហការការងារផ្សព្វផ្សាយ ចលនាប្រជាជនព្រំដែនទាំងសងខាង ឱ្យបានយល់ដឹងគោរពអនុវត្តត្រឹមត្រូវតាមការកំណត់ ដែលមានចែងនៅ ក្នុងបណ្តាសន្ធិសញ្ញា អនុសញ្ញា កិច្ចព្រមព្រៀង បទប្បញ្ញត្តិពាក់ព័ន្ធនានា រវាងរដ្ឋាភិបាលប្រទេសទាំង២ ស្តីពីព្រំដែន អធិបតេយ្យភាពព្រំដែនដីគោក រួមចំណែកកសាងខ្សែបន្ទាត់ព្រំដែនមានសន្តិភាព មិត្តភាព ស្ថិរភាព និងការអភិវឌ្ឍប្រកបដោយនិរន្តរភាព ។
ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន បានគូសបញ្ជាក់ថា សិក្ខាសាលានេះពិតជាមានសារៈសំខាន់ណាស់ដោយធ្វើឡើងក្នុងគោលបំណងផ្សព្វផ្សាយឲ្យបានទូលំទួលាយអំពីកិច្ចការព្រំដែន ទាំងទិដ្ឋភាពច្បាប់ និងបច្ចេកទេស លើការងារខណ្ឌសីមា និងបោះបង្គោលព្រំដែនជាមួយប្រទេសជិតខាង ដែលរដ្ឋលេខាធិការដ្ឋានកិច្ចការព្រំដែន រៀបចំសិក្ខាសាលាផ្សព្វផ្សាយជូនដល់មន្ត្រីរាជការ និងអាជ្ញាធរពាក់ព័ន្ធគ្រប់លំដាប់ថ្នាក់ក្នុងខេត្តព្រៃវែងនាពេលនេះ ៕
ចែករំលែកព័តមាននេះ