ខេត្តមណ្ឌលគិរី ៖ ជាលើកទីមួយដែលខេត្តមណ្ឌលគិរីធ្វើពិធីប្រណាំងទូក ដើម្បីទាក់ទាញភ្ញៀវទេសចរជាតិ-អន្តរជាតិ ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក។ ពិធីប្រណាំងទូកងខ្នាតតូច នឹងធ្វើឡើងនៅទំនប់សែនសុខដុម…
ខេត្តមណ្ឌលគិរី ៖ ជាលើកទីមួយដែលខេត្តមណ្ឌលគិរីធ្វើពិធីប្រណាំងទូក ដើម្បីទាក់ទាញភ្ញៀវទេសចរជាតិ-អន្តរជាតិ ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក។
ពិធីប្រណាំងទូកងខ្នាតតូច នឹងធ្វើឡើងនៅទំនប់សែនសុខដុម ជាទំនប់ទឹកមួយ ក្នុងចំណោមទំនប់ទឹកទាំងបី ដែលសម្ដេចមហាបវរធិបតី ហ៊ុន ម៉ាណែត ទើបអញ្ជើញមកសម្ពោធដាក់ឲ្យប្រើប្រាស់កាលពីពេលថ្មីៗនេះ ។ ទន្ទឹមនេះដែរ ក្នុងថ្ងៃនៃពិធីបុណ្យអុំទូក រដ្ឋបាលបាលខេត្តមណ្ឌលគិរី ក៏បានរៀបចំនូវពិធីកម្សាន្តនានាជាច្រើន ត្រៀមលក្ខណៈទទួលភ្ញៀវទេសចរ មិនធ្វើឲ្យខកបំណងនោះឡើយ ។
អភិបាលរងខេត្តមណ្ឌលគិរី លោក ហ៊ាញ ប៊ុណ្ណា បានឲ្យដឹងថា ក្រោមការចង្អុរបង្ហាញពីលោក ថង សាវុន អភិបាលខេត្តមណ្ឌលគិរី ពិធីប្រណាំងទូក នឹងធ្វើឡើងចំនួន០៣ថ្ងៃ ស្របជាមួយថ្ងៃបុណ្យអុំទូកតែម្ដង ដោយទូកប្រណាំងទាំងអស់ មាន៣២គូ ស្មើ៣៣ទូក ហើយត្រូវប្រកួតជម្រុះ ឲ្យសល់ត្រឹម១៤គូ ដើម្បីប្រកួតនៅថ្ងៃផ្ដាច់ព្រ័ត្រ។
លោកអភិបាលរងខេត្តមណ្ឌលគិរី បានបន្តថា សម្រាប់រូបលោកផ្ទាល់ក៏បានស្ម័គ្រចិត្តធ្វើជាកីឡាករប្រណាំងទូក ដើម្បីជួបជុំសប្បាយកម្សាន្តជាមួយប្រជាពលរដ្ឋទូទាំងខេត្តមណ្ឌលគិរី ។ លោកថា ឆ្នាំនេះពិតជាអស្ចារ្យណាស់សម្រាប់ខេត្តមណ្ឌលគិរី ដែលមានពិធីប្រណាំងទូក ខណៈដែលក្រុងសែនមនោរម្យមិនមានទន្លេ ប៉ុន្តែមានទំនប់ទឹកសែនសុខដុមយ៉ាងស្រស់ស្អាត ដែលជាសមទ្ធិផលថ្មី របស់ប្រមុខរាជរដ្ឋាភិបាលកម្ពុជាខិតខំបង្កើតឡើង។
លោក ហ៊ាញ ប៊ុណ្ណា បន្ថែមថា ពិធីប្រណាំងទូកក៏នឹងធ្វើភ្ញៀវទេសចរទាំងឡាយដែលមកកម្សាន្តខេត្តមណ្ឌលគិរីប្លែកអារម្មណ៍ ពីព្រោះថាក្រៅតែពីគយគន់ទេសភាពធម្មជាតិរបស់ខេត្តមណ្ឌលគិរី ថែមទាំងអាចមកទស្សនាការប្រណាំងទូក ដែលជាប្រពៃណីវប្បធម៌របស់ដូនតាបន្សល់ទុកតាំងពីបូរាណមក។
សូមបញ្ជាក់ថា កាលពីពេលកន្លងទៅសម្រាប់ខេត្តមណ្ឌលគិរី ក្នុងពិធីបុណ្យអុំទូក បានរៀបចំកម្មវិធីប្រណាំងទូកលក្ខណៈកម្សាន្តតិចតួចប៉ុណ្ណោះនៅស្រុកកោះញែក ដែលជាប់ទន្លេស្រែពក ប៉ុន្តែឆ្នាំនេះខុសប្លែកពីបណ្ដាឆ្នាំមុនៗ ត្បិតខេត្តមណ្ឌលគិរីមានទំនប់ទឹកសែនសុខដុម អាចប្រារព្ធពីធីប្រណាំងទូកចំកណ្ដាលក្រុង បង្កើនភាពទាក់ទាញ និងបង្កើនភាពសប្បាយរីករាយកាន់តែខ្លាំងឡើង៕
ចែករំលែកព័តមាននេះ