រាជធានីភ្នំពេញ ៖ នៅពេលគេសួរថា តើស្នេហាជាអ្វីនោះ គឺពិបាកនឹងរកបាននូវចម្លើយរួមខ្លាំងណាស់ ។ យ៉ាងណាមិញ យើងតែលឺពាក្យមួយឃ្លាពោលថា «ស្នេហាធ្វើឱ្យមនុស្សខ្វាក់ភ្នែក»។ តើពិត…
រាជធានីភ្នំពេញ ៖ នៅពេលគេសួរថា តើស្នេហាជាអ្វីនោះ គឺពិបាកនឹងរកបាននូវចម្លើយរួមខ្លាំងណាស់ ។ យ៉ាងណាមិញ យើងតែលឺពាក្យមួយឃ្លាពោលថា «ស្នេហាធ្វើឱ្យមនុស្សខ្វាក់ភ្នែក»។ តើពិត ឬយ៉ាងណា? នៅពេលដែលយើងស្រឡាញ់នរណាម្នាក់ យើងប្រាកដជាមិនបានគិតទេថា ការស្រឡាញ់ នឹងបង្កើតឱ្យមានកំហុស រហូតដល់ថ្នាក់ធ្វើឱ្យខ្លួនឯង ក្លាយជាមនុស្សខ្វាក់ភ្នែក ព្រោះតែស្នេហា។ ខ្វាក់ភ្នែកត្រង់នេះ ចង់សំដៅថា ពេលស្រលាញ់ងប់ខ្លាំង ទោះភាគីម្ខាងប្រព្រឹត្តកំហុសឆ្គងយ៉ាងណា ក៏ឱ្យអភ័យបាន មិនប្រកាន់ទោសអូសដំណើរឡើយ។
សេ្នហា ឬការស្រឡាញ់ នឹងធ្វើឱ្យយើងហ៊ានលះបង់គ្រប់បែបយ៉ាង ដើម្បីមនុស្សម្នាក់នោះ ប៉ុន្តែ យើងបែរជាមិនដែលទទួលបានអ្វីសោះត្រឡប់មកវិញ ។ ការលះបង់ដើម្បីមនុស្សដែលយើងស្រឡាញ់ មិនគួរណាគិតចង់បានអ្វីត្រឡប់មកវិញទេ ។ ប៉ុន្តែយើងខុសខ្លាំង បើយើងគិតតែលះបង់ដើម្បីគេ ទាំងដែលគេមិនដែលគិតចង់បាន ឬចង់ធ្វើអ្វីសោះដើម្បីយើង ។ ហេតុដូច្នេះ ក៏មានពាក្យមួយឃ្លាថ្មីអំពីស្នេហាលើកឡើងថា «ស្នេហាប្រភេទខ្លះធ្វើឱ្យមនុស្សខ្វាក់ភ្នែក ប៉ុន្តែស្នេហាប្រភេទខ្លះទៀតធ្វើឱ្យមនុស្សបានភ្លឺភ្នែក ហើយមានហេតុផលគ្រប់គ្រាន់ដើម្បីដើរចេញពីស្នេហាក្លែងក្លាយមួយនេះ» ។
យ៉ាងណាមិញ ទំនាក់ទំនងសេ្នហាខ្លះ មិនត្រឹមពាក់ព័ន្ធមនោសញ្ចេតនាផ្លូវអារម្មណ៍ និងផ្លូវកាយនោះទេ ករណីខ្លះ ក៏មានជាប់ពាក់ព័ន្ធនឹងរឿងលុយកាក់ មាសប្រាក់ និងទ្រព្យសម្បត្តិផ្សេងៗផងដែរ។ ដល់ចំណុចនេះ បើសិនជាស្នេហារបស់បុរសស្ត្រីមួយគូ រួមរស់ជាមួយគ្នាក្នុងនាមជាប្តី-ប្រពន្ធស្របច្បាប់ ដោយមានការចុះសំបុត្រអាពាហ៍ពិពាហ៍ត្រឹមត្រូវ នោះគឺហៅថា សហព័ទ្ធ អាចនឹងមិនមានបញ្ហាច្រើនទេ នៅពេលបែកបាក់ ឬលែងលៈ ព្រោះច្បាប់នឹងការពារថា ត្រូវបែងចែកទ្រព្យសម្បត្តិរួមយ៉ាងណា។
ក៏ប៉ុន្តែសម្រាប់ចំណងស្នេហាអនីតិសង្វាស ឬការរួមរស់មានសេ្នហាដោយមិនបានចុះសំបុត្រអាពាហ៍ពិពាហ៍ ឬក៏ទំនាក់ទំនងស៊ីជម្រៅត្រឹមគូសង្សារ តែងតែទិញកាដូ ឬរបស់មានតម្លៃផ្សេងៗជូនដៃគូស្នេហា ខ្លះក៏ឆ្លៀតខ្ចីលុយពីដៃគូសង្សារផងដែរ នៅពេលដែលចំណងស្នេហានៅផ្អែមល្អែម អ្វីៗក៏បងអាចឱ្យអូន ឬអ្វីៗក៏បងអាចឱ្យអូន។
យ៉ាងណាមិញ ទំនាក់ទំនងសេ្នហា ពុំមាននរណាបានដឹងថាអាចនឹងបញ្ចប់យ៉ាងណានោះទេ។ គូខ្លះបញ្ចប់ដោយសន្តិវិធី ហើយគូខ្លះ ក៏ត្រូវបង្ខំចិត្តតាមទារយកលុយដែលបានខ្ចីទៅផងដែរ។ ទើបមានចំណោទមួយលើកឡើងថា «ពេលស្រលាញ់គ្នាឡើងផ្អែមល្អែម សុំខ្ចីលុយ! អ៊ីចឹងយើងអាចទារលុយពីអតីតមិត្តប្រុស ឬមិត្តស្រីបានទេ ក្រោយការបែកបាក់គ្នានោះ?
យោងតាមអត្ថបទមួយដែលមានចំណងជើងថា «Can I get my money back from an ex?» ឬ ប្រែសម្រួលថា «តើខ្ញុំអាចទារលុយពីអតីតគូស្នេហ៍បានទេ?» ដែលបានចុះផ្សាយលើសារព័ត៌មានដ៏ល្បីមួយឈ្មោះ «theguardian» ដែលចុះផ្សាយរាងយូរឆ្នាំដែរហើយ តែវាមានអត្ថន័យដ៏ល្អដែលបានបង្ហាញពីនារីម្នាក់លើកឡើងថា អតីតមិត្តប្រុសរបស់នាងធ្លាប់បានខ្ចីលុយពីនាងចំនួន ២០០០ ផោន ឬប្រមានជាង២៥០០ដុល្លារនៅពេលមិនទាន់បែកបាក់គ្នា។
តែក្រោយបែកបាក់គ្នាជាងមួយឆ្នាំ បុរសរូបនោះទោះមានការងារល្អ តែមិនព្រមសងលុយនាងនោះទេ ដូច្នេះនាងក៏ចោទសួរថា តើនាងអាចទារលុយដែលបានខ្ចីនាងនោះ ពីអតីតសង្សារនាងដែរ ឬទេ? ក្នុងអត្ថបទបានលើកយកយោបល់អ្នកជំនាញជាច្រើនមកពន្យល់ «ថាគួរតែទារលុយដែលបានខ្ចីនោះមកវិញ។ ខ្លះក៏ផ្តល់ជាគតិថា តើពេលខ្ចីនោះមានសរសេរជាលាយលក្ខណ៍អក្សរដែរ ឬទេ? អ្នកខ្លះក៏លើកឡើងថា «បើគាត់ជាបុរសពិតប្រាកដ និងជាមនុស្សស្មោះត្រង់ គាត់ប្រាកដជាសងលុយដែលបានខ្ចីនោះ!។
តែអ្នកជំនាញខ្លះបានចោទសួរផងដែរពន្យល់ថា នាងនឹងទទួលបានប្រាក់ត្រឡប់មកវិញអាស្រ័យលើរឿងត្រូវពិចារណា។ ទី១- ថាតើលុយទាំងនោះត្រូវបានធ្វើឡើងយ៉ាងច្បាស់ថាជាប្រាក់កម្ចី ។ ត្រូវប្រាកដថា តើបុរសនោះអាចនឹងត្រៀមខ្លួនរួចជាស្រេចដើម្បីកុហកថា លុយនោះ គឺវាជាលុយអំណោយ ឬអត់? ខ្លះក៏ឱ្យមតិថា គួរប្តឹងទៅតុលាការដើម្បីទារលុយខ្ចីនោះមកវិញ បើសិនជាប្រើវិធីលួងលោម ឬវិធីត្រជាក់មិនដំណើរការ។
យ៉ាងណាមិញ យើងសូមលើកយកចំណុចពីរ ដែលគួរពិចារណាពាក់ព័ន្ធនឹងផ្លូវច្បាប់នៅប្រទេសកម្ពុជាយើងវិញ នោះគឺភាពខុសគ្នារវាង «អំណោយ និងការខ្ចីប្រាក់» ព្រោះជារឿង២ ខុសគ្នាដាច់ស្រឡៈ។ ១- ពាក្យថា «អំណោយ» គឺជាភាសាសាមញ្ញមួយ ដែលត្រូវបានគេប្រើប្រាស់ជាទូទៅ មានន័យថាជាការឱ្យ ឬប្រគល់នូវវត្ថុ ឬទ្រព្យសម្បត្តិ ដោយស្ម័គ្រចិត្តទៅ បុគ្គលម្នាក់ទៀត។ ប៉ុន្តែក្នុងន័យច្បាប់ អំណោយត្រូវបានកំណត់ថា ជាការផ្តល់ឱ្យដោយមានឆន្ទៈឯកតោភាគី ចំពោះបុគ្គលដែលបានកំណត់ជាក់លាក់ ហៅថា «ប្រទានកម្ម» ។
មាត្រា៥៦៨ នៃក្រមរដ្ឋប្បវេណីនៃព្រះរាណាចក្រកម្ពុជា «ប្រទានកម្ម» សំដៅដល់កិច្ចសន្យាមួយ ដែលត្រូវមានអានុភាព ដោយភាគីម្ខាងបង្ហាញឆន្ទៈផ្តល់ទៅឱ្យភាគីម្ខាងទៀតនូវទ្រព្យសម្បត្តិ ដោយមិនយកថ្លៃ ហើយភាគីម្ខាងទៀតយល់ព្រមទទួល។ «ប្រទានកម្ម» ត្រូវបានបង្កើតឡើង ដោយមានការព្រមព្រៀងរវាង អ្នកធ្វើអំណោយ ហៅថា «ទាយក» និង អ្នកទទួលអំណោយ ហៅថា «បដិគ្គាហក»។
២- កិច្ចសន្យាខ្ចីបរិភោគ ( ឬហៅថា កិច្ចសន្យាខ្ចីប្រាក់)
យោងតាមមាត្រា៥៧៨ កិច្ចសន្យាខ្ចីបរិភោគ គឺសំដៅលើកិច្ចសន្យាមួយប្រភេទ ដែលភាគីម្ខាង ហៅថាអ្នកឲ្យខ្ចី ដែលមានករណីកិច្ចប្រគល់ការប្រើប្រាស់ដោយសេរី នូវប្រាក់ ស្បៀងអាហារ ឬវត្ថុជំនួសផ្សេងទៀត ក្នុងអំឡុងពេលកំណត់ណាមួយឲ្យទៅភាគីម្ខាងទៀត ដែលយើងហៅថាអ្នកខ្ចី ។ ដោយឡែកអ្នកខ្ចីមានករណីកិច្ចត្រូវប្រគល់សងទៅ អ្នកឲ្យខ្ចីវិញនូវវត្ថុដែលមានប្រភេទ គុណភាព និង ចំនួនស្មើគ្នានឹងវត្ថុដែលទទួលបានពីអ្នកឲ្យខ្ចី៕
ចែករំលែកព័តមាននេះ