ខេត្តកណ្តាល ៖ ទិដ្ឋភាពស្តែងៗក្នុងកាមេរ៉ាសុវត្ថិភាព ដោយម៉ូតូក៏បើកលឿន រថយន្តប្រមូលសំរាមក៏បើកលឿន លុះមកដល់ចំណុចផ្លូវកោង ក៏បុកគ្នាយ៉ាងពេញទំហឹង ដោយរថយន្តកិនអូសហុយដីសំពោង បណ្តាលឱ្យស្លាប់បុរសម្នាក់ជាអ្នកបើកបរម៉ូតូយ៉ាងរន្ធត់ ។…
ខេត្តកណ្តាល ៖ ទិដ្ឋភាពស្តែងៗក្នុងកាមេរ៉ាសុវត្ថិភាព ដោយម៉ូតូក៏បើកលឿន រថយន្តប្រមូលសំរាមក៏បើកលឿន លុះមកដល់ចំណុចផ្លូវកោង ក៏បុកគ្នាយ៉ាងពេញទំហឹង ដោយរថយន្តកិនអូសហុយដីសំពោង បណ្តាលឱ្យស្លាប់បុរសម្នាក់ជាអ្នកបើកបរម៉ូតូយ៉ាងរន្ធត់ ។
ហេតុការណ៍ខាងលើនេះបានកើតឡើងកាលពីវេលាម៉ោង ០៩ និង ៥៣នាទីព្រឹក ថ្ងៃទី២០ ខែវិច្ចិកា ឆ្នាំ ២០២៥ នៅលើកំណាត់ផ្លូវលេខ៧០បេ ស្ថិតក្នុងភូមិព្រែកក្របៅទី៣ សង្កាត់ព្រែកអំពិល ក្រុងអរិយក្សត្រ ខេត្តកណ្តាល ។
សមត្ថកិច្ចនគរបាលក្រុងអរិយក្សត្រ បានឲ្យដឹងថា ភាគីខាងម៉ូតូ០១គ្រឿងខាងលើម៉ាក Honda Scoopy-I ពណ៌ស ពាក់ផ្លាកលេខ ភ្នំពេញ1IS-4083 បើកបរដោយឈ្មោះ អែម ចំរើន ភេទ ប្រុស អាយុ ៣៥ ឆ្នាំ មានទីលំនៅភូមិបន្ទាយ ឃុំបារាយណ៍ ស្រុកស្រីសន្ធរ ខេត្តកំពង់ចាម បានស្លាប់បាត់បង់ជីវិតនៅនឹងកន្លែងកើតហេតុ ។ ចំណែកភាគីខាងរថយន្តម៉ាក NISSAN DIESEL ពណ៌លឿង ប្រភេទដឹកសម្រាម គ្មានផ្លាកលេខ បើកបរ ឈ្មោះ ហ៊ន សុផុន ភេទ ប្រុស អាយុ ៣៩ ឆ្នាំ (គ្មានប័ណ្ណបើកបរ គ្មានជាតិស្រវឹង 0,00m/l សារធាតុញៀនវិជ្ជមាន មានទីលំនៅភូមិអញ្ជែងលើ ឃុំពុកឬស្សី ស្រុកខ្សាច់កណ្ដាល ខេត្តកណ្តាល និងអ្នករួមដំណើរ ចំនួន២នាក់ ៖ ១. ឈ្មោះ ព្រំ យ៉េត ភេទ ប្រុស អាយុ ៥០ ឆ្នាំ , ២. ឈ្មោះ ជា ភេទ ប្រុស អាយុ ៥៤ ឆ្នាំ មានទីលំនៅភូមិឃុំជាមួយអ្នកបើកបរ ។
សមត្ថកិច្ចនគរបាលក្រុងអរិយក្សត្រ បានឲ្យដឹងថា មុនពេលកើតហេតុ មានម៉ូតូ១គ្រឿងខាងលើ បើកបរក្នុងទិសដៅពីជើងទៅ ត្បូង ពេលបើកមកដល់ចំណុចកើតហេតុដែលជាផ្លូវកោង ក៏បានបើកវ៉ារថយន្តដឹកដី១គ្រឿង តែវ៉ាមិនផុតក៏ជ្រុលចូលទៅបុកជាមួយរថយន្តប្រមូលសំរាម ដែលកំពុងបើកបរក្នុងទិសដៅបញ្ច្រាស់គ្នាយ៉ាងពេញទំហឹង កិនអូសហ៊ុយដីសំពោង ស្លាប់បុរសអ្នកជិះម៉ូតូយ៉ាងរន្ធត់បំផុត ។
ក្រោយកើតហេតុ សមត្ថកិច្ចនគរបាលក្រុងអរិយក្សត្រ សហការជាមួយនគរបាលជំនាញផ្នែកចរាចរណ៍ ចុះមកធ្វើការវាស់វែង ឃាត់ខ្លួនអ្នកបើកបររថយន្ត យករថយន្តនិងម៉ូតូទៅរក្សាទុក រង់ចាំដោះស្រាយគ្នាតាមច្បាប់ជាបន្តទៀត ។ ចំណែកសាកសពត្រូវបានប្រគល់ជួនក្រុមគ្រួសារយកទៅធ្វើបុណ្យតាមប្រពៃណី ។
សមត្ថកិច្ចបានបញ្ជាក់ទៀតថា តាមការសន្និដ្ឋានបឋម បណ្តាលមកពីអ្នកបើកបរម៉ូតូបើកចូលចំណែកផ្លូវរថយន្តក្នុងស្ថានភាពផ្លូវកោង ចំណែករថយន្តបើកបរប្រើប្រាស់ល្បឿនក្នុងទីប្រជុំជនហើយក្នុងស្ថានភាពផ្លូវកោង ៕
ចែករំលែកព័តមាននេះ