រាជធានីភ្នំពេញ ៖ ជំនឿ ឬការជឿទៅលើហុងស៊ុយ គឺជាសិទ្ធបុគ្គល តែសូមជឿដោយបញ្ញា និងប្រើការគិតឲ្យបានត្រឹមត្រូវ ចៀសវាងកើតរឿងមិនល្អដោយប្រការណាមួយ តួយ៉ាងដូចជារឿងប្រសូត្របុត្រ ក៏ត្រូវមើលគ្រូហុងស៊ុយ…
រាជធានីភ្នំពេញ ៖ ជំនឿ ឬការជឿទៅលើហុងស៊ុយ គឺជាសិទ្ធបុគ្គល តែសូមជឿដោយបញ្ញា និងប្រើការគិតឲ្យបានត្រឹមត្រូវ ចៀសវាងកើតរឿងមិនល្អដោយប្រការណាមួយ តួយ៉ាងដូចជារឿងប្រសូត្របុត្រ ក៏ត្រូវមើលគ្រូហុងស៊ុយ និងរើសថ្ងៃហុងស៊ុយដែរនោះ វាពិតជាគ្រោះថ្នាក់ខ្លាំងមែនទែន ខណៈព្រះអង្គ គូ សុភាព ស្នើសុំរឿងមួយទៅកាន់គ្រូហុងស៊ុយ ។
ជាការពិតណាស់ ឃើញថា បច្ចុប្បន្នកំពុងមានការកើនឡើងគួរឲ្យកត់សម្គាល់ រឿងមើលគ្រូហុងស៊ុយ ដោយបងប្អូនប្រជាពលរដ្ឋមួយចំនួនធំ មានជំនឿជឿជាក់ថា ការដែលធ្វើអ្វីមួយ ទៅតាមហុងស៊ុយតែងតែទទួលបានមកវិញនូវភាពល្អប្រសើរ រកស៊ីមានបាន មានសុខសុភមង្គល ភាពរីកចម្រើន ទ្រព្យសម្បត្តិហូរចូល ។
ជំនឿហុងស៊ុយ ភាគច្រើនតែងតែ គោរពធ្វើតាមដូចជា ការរៀបចំផ្ទះ ទិញរបស់របរអ្វីមួយ ពេលវេលាសង់ផ្ទះ រៀបការ មើលពីទិសផ្ទះ ក៏ដូចជា ការសម្រេចចិត្តយកកូនក៏គិតលើហុងស៊ុយដែរ
រហូតមានអ្នកខ្លះជឿហួសប្រមាណដល់ថ្នាក់ សម្រេចចិត្តវះកូនមុនខែ ព្រោះតែគិតលើរឿងហុងស៊ុយ ឬ អ្នកខ្លះទៀតយកកូនចេញព្រោះខ្លាចឆុង តែការធ្វើដូចនេះអាច បណ្តាលឲ្យមានគ្រោះថ្នាក់ដល់អាយុជីវិត នាំឲ្យមានវិប្បដិសារី ទៅថ្ងៃក្រោយថែមទៀតផង ។
យ៉ាងណាមិញ ថ្មីៗនេះ ព្រះភិក្ខុ វជិរប្បញ្ញោ គូ សុភាព គឺជាព្រះសង្ឃខ្មែរមួយអង្គ ដែលមានឈ្មោះដ៏ល្បីល្បាញយ៉ាងខ្លាំងនៅក្នុងប្រទេសកម្ពុជាយើង បានមានសង្ឃដីកាសុំចិត្តគ្រូហុងស៊ុយរើសថ្ងៃអ្វីរើសចុះ តែសូមកុំដាក់ថ្ងៃប្រសូត្របុត្រឲ្យគេ បាបកម្មខ្លាំងណាស់ ។
តាមរយៈសំណេរ ដែលបង្ហោះនៅលើហ្វេសប៊ុកផេកផ្លូវការ ព្រះអង្គបានមានសង្ឃដីកាថា «សុំចិត្តគ្រូហុងស៊ុយ១ រើសថ្ងៃធ្វើអី ក៏រើសចុះ តែសូមកុំដាក់ថ្ងៃប្រសូត្របុត្រឱ្យគេ មិនគួរទេ ប្រថុយគ្រោះថ្នាក់ណាស់។ គេមានបញ្ហាបាបកម្មធ្លាក់លើលោកគ្រូ» ។
ជាមួយគ្នានេះផងដែរ បន្ទាប់ពីការបង្ហោះសំណេរពាក់ព័ន្ធនិងរឿងគ្រូហុងស៊ុយខាងលើ យើងសង្កេតឃើញថា មានបងប្អូនអ្នកប្រើប្រាស់បណ្ដាញសង្គមយ៉ាងច្រើនសន្ធឹក បានគាំទ្រយ៉ាងខ្លាំងទៅលើសង្ឃដីការរបស់ព្រះគ្រូ គូ សុភាព ៕
ចែករំលែកព័តមាននេះ