ទីក្រុងវ៉ាស៊ីនតោន៖ លោកស្រីហារីសបានឡើងថ្លែងសុន្ទរកថាដ៏សំខាន់មួយដើម្បីបង្ហាញពីការទទួលស្គាល់លទ្ធផលឆ្នោត និងសុខចិត្តចុះចាញ់ការបោះឆ្នោតដោយសុទ្ធចិត្តបន្ទាប់ពីលទ្ធផលចុងក្រោយបង្ហាញថាលោកត្រាំទទួលបានអង្គបោះឆ្នោតសរុប២៩៥ ខណៈដែលលោកស្រីហារីសទទួលបាន២២៣អង្គបោះឆ្នោត។ នៅក្នុងសុន្ទរកថានោះ លោកស្រីហារីសបានផ្ញើសារនយោបាយមួយចំនួនបង្ហាញពីការស្រុសស្រួលគ្នាផ្នែកនយោបាយជាមួយនឹងគូបដិបក្សរបស់លោកស្រីគឺលោកត្រាំ។
លោកស្រីសន្យាថានឹងជួយជ្រោមជ្រែងឱ្យបានពេញទំហឹងរហូតដល់ចប់ចុងចប់ដើមនៅក្នុងការផ្ទេរអំណាចដោយដោយសន្តិវិធីជូនចំពោះលោកត្រាំ។ លោកស្រីបានផ្ដាំផ្ញើទៅក្រុមអ្នកគាំទ្រដើម្បីឱ្យពួកគេកុំបោះបង់សេចក្ដីសង្ឃឹមចោលឱ្យសោះ។ យើងត្រូវតែតស៊ូផ្នែកនយោបាយជាបន្តទៀត។ យើងអាចតស៊ូតាមរយៈការបោះឆ្នោត និងតាមផ្លូវតុលាការ។
ប៉ុន្តែសម្រាប់ដំណាក់កាលនេះ លោកស្រីថ្លែងថាយើងត្រូវតែទទួលស្គាល់លទ្ធផលឆ្នោត។ នេះជាគោលការណ៍ប្រជាធិបតេយ្យជាមូលដ្ឋានគ្រឹះរបស់ប្រទេសអាមេរិកដែលត្រូវតែធ្វើដូច្នេះនៅពេលគណបក្សនយោបាយណាមួយចាញ់ឆ្នោត។ ទោះជាយ៉ាងណាក្ដី លោកស្រីបញ្ជាក់ថាការធ្វើដូច្នេះមិនមែនមានន័យថាយើងទម្លាក់អាវុធចុះចាញ់គូប្រកួត ហើយលែងបន្តការតស៊ូនយោបាយដើម្បីឱ្យមានសេរីភាព ឱកាស សេចក្ដីថ្លៃថ្នូរ និងយុត្តិធម៌នៅក្នុងសង្គមជាតិរបស់យើងនោះឡើយ។
គោលការណ៍ទាំងអម្បាលម៉ានខាងលើនេះសុទ្ធតែជាមូលដ្ឋានគ្រឹះដែលលោកស្រីហារីសបានសន្យានៅចំពោះមុខអ្នកគាំទ្រថានឹងខិតខំសម្រេចឱ្យបានបើសិនជាប់ឆ្នោតនៅអាណត្តិថ្មី។ លោកស្រីថ្លែងបន្តទៀតថាយើងមិនមែនស្មោះស្ម័គ្រចំពោះប្រធានាធិបតី ឬគណបក្សនយោបាយណាមួយនោះទេ។ ប៉ុន្តែយើងស្មោះស្ម័គ្រចំពោះរដ្ឋធម្មនុញ្ញរបស់ប្រទេសអាមេរិក។
លោកស្រីហារីសថ្លែងសុន្ទរកថានេះនៅសាកលវិទ្យាល័យហូវើត (Howard University) ដែលលោកស្រីធ្លាប់សិក្សារៀនសូត្រនៅទីនោះ។ នៅក្នុងចំណោមមនុស្សសំខាន់ៗដែលចូលរួមនៅក្នុងវេទិកានោះក៏មានលោកស្រីណាន់ស៊ី ផេឡូស៊ី (Nancy Pelosi) ដែលជាអតីតប្រធានរដ្ឋសភាអាមេរិក និងជាមនុស្សសំខាន់របស់គណបក្សប្រជាធិបតេយ្យ។ គឺលោកស្រីផេឡូស៊ីនេះហើយដែលជាអ្នកជំរុញឱ្យលោកបៃដិនដកខ្លួនថយពីការប្រកួតប្រជែង និងចូលជំនួសដោយលោកស្រីហារីសវិញម្ដង។
អ្នកសំខាន់ម្នាក់ទៀតដែលចូលរួមនៅក្នុងវេទិកានោះដែរគឺលោកធីមវ៉ាល់ (Tim Walz) ដែលជាបេក្ខជនអនុប្រធានាធិបតី។ នៅចុងបញ្ចប់នៃការថ្លែងសុន្ទរកថានោះ លោកស្រីហារីសបាននិយាយរំលឹកទៅដល់បាវចនារបស់សាកលវិទ្យាល័យហូវើត។ លោកស្រីយល់ថាវាជារឿងសំខាន់ណាស់ដេលយើងត្រូវតែយកឈ្នះទៅលើអ្វីដែលគុណវិបត្តិរបស់យើង ឬនិយាយឱ្យស្រួលស្ដាប់ថា «គ្មានការឈ្នះអ្វីដែលប្រសើរជាងឈ្នះខ្លួនឯងនោះទេ»។
លោកស្រីអាចកាត់យល់បានថាក្រុមអ្នកគាំទ្រគណបក្សប្រជាធិបតេយ្យខ្លះអាចនឹងគិតថាយើងធ្លាក់ចូលទៅក្នុងដំណាក់កាលខ្មៅងងឹត។ ប៉ុន្តែលោកស្រីយល់ថាបើយើងគិតទៅដល់ផលប្រយោជន៍ជារួមរបស់យើងទាំងអស់គ្នា (មិនគិតនិន្នាការនយោបាយទេ ប៉ុន្តែគិតប្រយោជន៍ជាតិជាធំ) លោកស្រីសង្ឃឹមថាស្ថានភាពជាក់ស្ដែងមិនមែនដូចអ្វីដែលពួកគេគិតនោះទេ។
លោកស្រីនិយាយរបៀបលួងលោម និងលើកទឹកចិត្តចំពោះក្រុមអ្នកគាំទ្រវ័យក្មេងដែលអាចនឹងមានអារម្មណ៍ខកចិត្ត ឬសោកស្ដាយចំពោះលទ្ធផលបោះឆ្នោត។ លោកស្រីសូមឱ្យពួកគេធ្វើអារម្មណ៍ធម្មតាឡើងវិញ។ លោកស្រីយល់ថាការតស៊ូនៅក្នុងវិស័យនយោបាយពេលខ្លះត្រូវការដកខ្លួនមួយគ្រាសិនដើម្បីបន្តការតស៊ូនៅក្នុងបុព្វហេតុនយោបាយជាថ្មីម្ដងទៀត។ យើងចាញ់មិនមែនមានន័យថាយើងគ្មានឱកាសទទួលជ័យជម្នះនៅពេលក្រោយទៀតនោះទេ។ សំខាន់គឺមិនបោះបង់ការតស៊ូ៕
ចែករំលែកព័តមាននេះ