ទីក្រុងវ៉ាស៊ីនតោន៖ នៅទីបំផុត លោកស្រីហារីសដែលជាគូប្រកួតប្រជែងរបស់លោកត្រាំនៅក្នុងការបោះឆ្នោតនៅអាមេរិកនោះ បានសុខចិត្តចុះចាញ់ និងទទួលស្គាល់លទ្ធផលបោះឆ្នោតប្រធានាធិបតីកាលពីម្សិលមិញហើយ។ លោកស្រីបានហៅទូរស័ព្ទទៅលោកត្រាំដើម្បីសម្ដែងការអបអរសាទរចំពោះលោកដែលឈ្នះការឈ្នះឆ្នោតលើកនេះ។
លទ្ធផលបោះឆ្នោតចុងក្រោយនេះបង្ហាញថាលោកត្រាំនៅតែទទួលបានការគាំទ្រពីអង្គបោះឆ្នោតជាបន្តទៀត។ ដូច្នេះចំនួនអង្គឆ្នោតសរុបដែលលោកទទួលបាន បានកើនឡើងដល់២៩៤។ ចំណែកលោកស្រីហារីសទទួលបានអង្គបោះឆ្នោតសរុប២២៣។ លោកបៃដិនក៏បានទាក់ទងទៅលោកត្រាំផងដែរដើម្បីអបអរសាទរ។ លោកថែមទាំងអញ្ជើញលោកត្រាំទៅសេតវិមាននៅក្នុងពេលឆាប់ៗនេះដើម្បីពិគ្រោះគ្នាអំពីដំណើរការផ្ទេរអំណាចប្រធានាធិបតីដោយសន្តិវិធី និងដោយរលូន។
យោងតាមទីប្រឹក្សាកំពូលរបស់លោកស្រីហារីស លោកស្រីបានហៅទូរស័ព្ទទៅលោកត្រាំកាលពីយប់មិញ និងបានជជែកគ្នាអំពីការផ្ទេរអំណាច។ លោកស្រីហារីសដែលគេសម្លឹងឃើញថាជាក្ដីសង្ឃឹមថ្មីសម្រាប់គណបក្សប្រជាធិបតេយ្យក្រោយពេលលោកបៃដិនដកខ្លួនថយនោះ លោកស្រីបែរជាត្រូវពលរដ្ឋម្ចាស់ឆ្នោតខ្លះដែលធ្លាប់គាំទ្របក្សនេះមិនបោះឆ្នោតឱ្យទៅវិញ។
នៅក្នុងចំណោមរដ្ឋសំខាន់ៗទាំង៧ដែលមានអង្គបោះឆ្នោតច្រើន និងដែលកំណត់ភាពចាញ់-ឈ្នះរបស់បេក្ខជននីមួយៗលោកស្រីហារីសទទួលបានសំឡេងគាំទ្រតិចជាងលោកត្រាំភាគច្រើន។ លោកត្រាំមានប្រៀបជាងលោកស្រីហារីសទាំងសំឡេងឆ្នោតប្រជាប្រិយ និងអង្គបោះឆ្នោត។ លោកស្រីត្រៀមឡើងថ្លែងសុន្ទរកថាទទួលស្គាល់ការចុះចាញ់ និងទទួលស្គាល់លទ្ធផលឆ្នោតនៅម៉ោង៤ល្ងាច ម៉ោងនៅទីក្រុងវ៉ាស៊ីនតោន។
គិតទៅលោកស្រីហារីសមានពេលវេលាមិនច្រើនទេក្នុងការផ្សព្វផ្សាយអំពីខ្លួនឯងដើម្បីឱ្យពលរដ្ឋម្ចាស់ឆ្នោតបានស្គាល់។ ក្រោយពេលលោកបៃដិនសម្រេចចិត្តទាំងពិបាកដើម្បីដកខ្លួនថយពីការប្រកួតប្រជែងនេះ លោកស្រីហារីសមានពេលត្រឹមតែ១០៧ថ្ងៃប៉ុណ្ណោះដើម្បីរៀបចំខ្លួនក្នុងការឃោសនាបោះឆ្នោត ទល់នឹងបេក្ខជនដែលបានត្រៀមខ្លួនជាច្រើនឆ្នាំមកហើយ ហើយប្រមូលផ្ដុំដោយក្រុមមហាសេដ្ឋីនៅជុំវិញគាត់ដែលមិនខ្លាចនឹងជះលុយទាំងលានដុល្លារដើម្បីឃោសនានោះទេ។
យោងតាមក្រុមអ្នកវិភាគអំពីហិរញ្ញវត្ថុ មួយរដូវកាលឃោសនាបោះឆ្នោតលើកនេះ គណបក្សទាំង២បានចំណាយលុយមិនក្រោម២៦០០លានដុល្លារនោះទេ។ លទ្ធផលស្ទង់មតិបង្ហាញថាពលរដ្ឋអាមេរិកគាំទ្រគណបក្សធំៗទាំង២នេះប្រហាក់ប្រហែលគ្នា។ ពោលគឺប្រហែលជាង៣០%ម្ខាងៗ។ និយាយនេះសំដៅទៅលើការគាំទ្រជាប្រពៃណីតែម្ដងដោយមិនប្រកាន់ថាបេក្ខជនប្រធានាធិបតីជាប្រភេទមនុស្សដែលពួកគេចូលចិត្ត ឬមិនចូលចិត្តទេ។
ដូច្នេះ នៅសល់ប្រហែលជិត៤០%ជាអ្នកដែលមិនទាន់សម្រេចចិត្តបែបណាទេ ហើយរង់ចាំរហូតដល់ថ្ងៃបោះឆ្នោតតែម្ដងទើបសម្រេចចិត្តនៅនាទីចុងក្រោយ។ ប៉ុន្តែលើកនេះ គេសង្កេតឃើញថាអ្នកដែលធ្លាប់គាំទ្រគណបក្សប្រជាធិបតេយ្យជាប្រពៃណីបែរជាងាកទៅបោះឆ្នោតគាំទ្រលោកត្រាំទៅវិញ។ មូលហេតុមិនមែនដោយសារពួកគេចូលចិត្តលោកត្រាំ ឬស្អប់លោកស្រីហារីសទេ។ ប៉ុន្តែពួកគេចង់ដាក់ទណ្ឌកម្មទៅលើគណបក្សប្រជាធិបតេយ្យដែលពួកគេយល់ថាមិនឆ្លើយតបទៅនឹងអ្វីដែលពួកគេចង់បាន។
ជាបន្តទៅទៀតនេះ គណបក្សប្រជាធិបតយ្យត្រូវត្រៀមខ្លួនធ្វើជាគណបក្សប្រឆាំងវិញម្ដង។ គេមិនទាន់ដឹងច្បាស់ថាតើលោកស្រីហារីសក្រោយការបោះឆ្នោត និងក្រោយបញ្ចប់តំណែងអនុប្រធានាធិបតី លោកស្រីនឹងធ្វើអ្វីទៀត ហើយនឹងទទួលបានតំណែងអ្វីនៅក្នុងគណបក្សប្រជាធិបតេយ្យ? ចំណែកលោកត្រាំក៏មានអាយុច្រើនមែនទែនហើយ។ ទម្រាំបញ្ចប់អាណត្តិថ្មីនេះ លោកនឹងមានអាយុ៨២ឆ្នាំ។ បើលោកឈរឈ្មោះនៅអាណត្តិបន្ទាប់ និងឈ្នះឆ្នោតមួយអាណត្តិទៀត មានន័យថាលោកនឹងមានអាយុ៨៦ឆ្នាំទម្រាំចប់អាណត្តិ។ ដូច្នេះនឹងក្លាយជាប្រធានាធិបតីដ៏ចំណាស់បំផុតនៅក្នុងប្រវត្តិសាស្ត្រអាមេរិក៕
ចែករំលែកព័តមាននេះ