ខេត្តបន្ទាយមានជ័យ ៖ ភ្លៀងមួយយប់ទល់ភ្លឺ បណ្តាលឱ្យទឹកជន់លិចភូមិសុខសាន្ត ហើយត្រូវប្រជាពលរដ្ឋនិយាយថា គឺបណ្តាលមកពីក្រុមហ៊ុនទឹកស្អាតបិទទំនប់ស្តុបទឹកទុក ទើបធ្វើឱ្យទឹកជំនន់ជន់លិចបែបនេះ នៅថ្ងៃទី០៥ ខែវិច្ឆិកា ឆ្នាំ២០២៤…
ខេត្តបន្ទាយមានជ័យ ៖ ភ្លៀងមួយយប់ទល់ភ្លឺ បណ្តាលឱ្យទឹកជន់លិចភូមិសុខសាន្ត ហើយត្រូវប្រជាពលរដ្ឋនិយាយថា គឺបណ្តាលមកពីក្រុមហ៊ុនទឹកស្អាតបិទទំនប់ស្តុបទឹកទុក ទើបធ្វើឱ្យទឹកជំនន់ជន់លិចបែបនេះ នៅថ្ងៃទី០៥ ខែវិច្ឆិកា ឆ្នាំ២០២៤ ស្ថិតភូមិសុខសាន្ត សង្កាត់និមិត្ត ក្រុងប៉ោយប៉ែត ។
ប្រជាពលរដ្ឋបានប្រាប់ថា មូលហេតុទឹកលិចភូមិសុខសាន្តបណ្តាលប៉ះពាល់ផ្ទះសម្បែង និងផ្លូវថ្នល់ និងដំណាំកសិកម្ម ដោយសារមកពីក្រុមហ៊ុនទឹកស្អាតបិទទំនប់ស្តុបទឹកទុក ទើបបណ្តាលជន់លិចរាល់ឆ្នាំ ។ ជាក់ស្តែងឆ្នាំនេះ លិច២ទៅ៣ដងមកហើយ លិចម្តងៗមានរយៈពេល១សប្តាហ៍ទៅកន្លះខែឯណោះ បើសិនជាអាជ្ញាធរមិនយកចិត្តទុកដាក់កាយទំនប់បើកទឹកទំលាក់ទៅផ្នែកខាងក្រោមទេ ប្រជាពលរដ្ឋពិតជាជួបការលំបាក ។
ប្រជាពលរដ្ឋបានបញ្ជាក់ថា ពេលនេះប្រជាពលរដ្ឋកំពុងជួបការលំបាកនៅពេលមានភ្លៀងធ្លាក់មួយមេធំមួយយប់ទល់ភ្លឺ បណ្តាលឱ្យជន់លិចផ្ទះ ដំណាំកសិផល និងផ្លូវថ្នល់ ធ្វើឱ្យពលរដ្ឋនិងសិស្សានុសិស្សពិបាកចេញចូលទៅមកសិក្សា ។ ពលរដ្ឋសុំឱ្យអាជ្ញាធរក្រុងប៉ោយប៉ែត និងចៅសង្កាត់និមិត្ត ព្រមទាំងមន្ទីរជំនាញជួយរកដំណោះស្រាយឱ្យពួកគាត់ផង កុំទុកឱ្យលំបាករាល់តែឆ្នាំបែបនេះ នៅពេលដែលមានភ្លៀងធ្លាក់ម្តងៗ ។
លោក ខាត់ ធា ចៅសង្កាត់និមិត្តបានប្រាប់ថា យប់មិញមានភ្លៀងធ្លាក់មួយមេធំ ធ្វើឱ្យទឹកជន់លិចផ្ទះពលរដ្ឋ និងផ្លូវថ្នល់មួយចំនួន នៅពេលទឹកជំនន់ហូរធ្លាក់ពីស្រុកម៉ាឡៃ និងអូរព្រំដែន ទើបជន់លិច ហើយពេលអាជ្ញាធរកំពុងរកដំណោះស្រាយដោយបានបើកទ្វារទឹក ដើម្បីរំដោះទឹកធ្លាក់តាមប្រព័ន្ធប្រឡាយទៅផ្នែកខាងក្រោម បើសិនជាគ្មានភ្លៀងធ្លាក់បន្តទេ អាច២ទៅ៣ថ្ងៃទឹកស្រកវិញអស់ជាធម្មតាវិញ។
ចែករំលែកព័តមាននេះ