ឆ្នាំ២០២៥ គឺជាចំណុចពាក់កណ្តាលនៃទសវត្សរ៍ដែលពិភពលោកបានប្រឈមនូវរឿងរ៉ាវចលាចល និងការផ្លាស់ប្តូរយ៉ាងជ្រាលជ្រៅលើបច្ចេកវិទ្យា នយោបាយ និងសង្គម ជាសាកលតាំងពីសង្គ្រាមពាណិជ្ជកម្មចិន និងអាមេរិក សង្គ្រាមរុស្ស៊ី និងអ៊ុយក្រែន សង្គ្រាមនៅមជ្ឈឹមបូព៌ា…
ឆ្នាំ២០២៥ គឺជាចំណុចពាក់កណ្តាលនៃទសវត្សរ៍ដែលពិភពលោកបានប្រឈមនូវរឿងរ៉ាវចលាចល និងការផ្លាស់ប្តូរយ៉ាងជ្រាលជ្រៅលើបច្ចេកវិទ្យា នយោបាយ និងសង្គម ជាសាកលតាំងពីសង្គ្រាមពាណិជ្ជកម្មចិន និងអាមេរិក សង្គ្រាមរុស្ស៊ី និងអ៊ុយក្រែន សង្គ្រាមនៅមជ្ឈឹមបូព៌ា ព្រមទាំងផលលំបាកបន្សល់មកដោយសារការរីករាលដាលនៃមេរោគកូវីដ១៩ ដែលបានសម្លា.ប់មនុស្សយ៉ាងរង្គាល ។
នៅពេលដែលយើងទាំងអស់គ្នា បានកំពុងតែខិតចូលឆ្នាំថ្មី ពិភពលោកសព្វថ្ងៃបានមើលឃើញហេតុផលតិចតួចបំផុតដែលរំពឹងថា ល្បឿននៃការរំខាន និងបញ្ហានានានឹងថយចុះ ។ នៅក្នុងស្ថានភាពបែបនេះ សម្រាប់ធុរជនដែលចង់រស់រានមានជីវិត និងរីកចំរើនក្នុងបរិយាកាសសេដ្ឋកិច្ចដូចបច្ចុប្បន្ន វាជារឿងសំខាន់ក្នុងការយល់ដឹងអំពីនិន្នាការដែលជំរុញឱ្យមានការរួបរួមគ្នានៃការបង្កើតថ្មីឆ្លើយតបនឹងការគំរា.មកំហែ.ង និងការប្រជែងគ្នា ដើម្បីដណ្តើមឱកាស ។
ការស្វែងយល់ពីចំណុចទាំងនេះមានសារៈសំខាន់ណាស់សម្រាប់អ្នកដែលមានគោលបំណងប្រើប្រាស់វាសម្រាប់ការរីកចម្រើន និងការប្រកួតប្រជែង ។ ដូច្នេះ នេះជាទិដ្ឋភាពទូទៅ ដែលគួរតែស្វែងយល់អំពីនិន្នាការសំខាន់ៗដែលនឹងប្រឈមនៅឆ្នាំក្រោយ ។ វា គឺជាស្ថានភាពជាសាកល ហើយមានចំណុចខ្លះវាពិបាកសម្រាប់កម្ពុជា តែយើងត្រូវតែដឹង ហើយប្រឹងប្រែងរៀបចំខ្លួនទុកជាមុន ។
១. យុទ្ធសាស្ត្រធុរកិច្ច និងអាជីវកម្មតាមប្រព័ន្ធបញ្ញាសិប្បនិម្មិត
មនុស្សជាតិបានចំណាយពេលពីរបីឆ្នាំចុងក្រោយនេះ រស់នៅក្នុងជីវភាពដ៏អស្ចារ្យផ្សារភ្ជាប់នឹងសក្តានុពលនៃ AI ជំនាន់ថ្មី ហើយបានឮអំពីរបៀបដែលវានឹងផ្លាស់ប្តូរពិភពលោក ដូចនេះ នៅឆ្នាំ២០២៥ខាងមុខ គេបានព្យាករណ៍ថា AI ជំនាន់ថ្មីនឹងកាន់តែរីកចំរើនទ្វេដង ។ ដូច្នេះយុទ្ធសាស្ត្រអាជីវកម្មថ្មីត្រូវតែផ្សារភ្ជាប់នឹង AI ។ នៅពេលនេះក្រុមហ៊ុនធំៗនៅលើពិភពលោក ដូចជា Google Amazon និង Netflix គឺសុទ្ធតែបានរៀបចំឡើងវិញទាំងអស់នូវយុទ្ធសាស្ត្ររបស់ពួកគេតាំងពីលំដាប់ទាបរហូតដល់លំដាប់កំពូល ។ ក្រុមហ៊ុនធំៗបានផ្លាស់ប្តូរគំរូអាជីវកម្មដែលមានស្រាប់ ដូចជា ការផ្សាយពាណិជ្ជកម្មតាមអ៊ីនធឺណិត ការលក់រាយ និងការផ្សព្វផ្សាយតាមប្រព័ន្ធផ្សព្វផ្សាយ ។
២.អាជីវកម្មប្រកបដោយនិរន្តរភាព និងវដ្តនៃសេដ្ឋកិច្ចដែលត្រូវរិះគិត
សម្ពាធបទប្បញ្ញត្តិ និងតម្រូវការអ្នកប្រើប្រាស់ គឺជាហេតុផលដ៏ចម្បងនៅក្នុងការជំរុញបរិយាកាសអាជីវកម្មឆ្ពោះទៅរកការផ្លាស់ប្តូរដើម្បីធានាសង្គតិភាពនៃអាជីវកម្មតាមគំរូ និងបែបផែននៃបែបបទបែបថ្មី។
ការអភិវឌ្ឍនៃវដ្តសេដ្ឋកិច្ចក៏ជាមានសារៈសំខាន់ដោយពិភពលោកពិតជាត្រូវការ ការប្រើប្រាស់ឡើងវិញនូវវត្ថុធាតុដើម និងធនធានកែច្នៃឡើងវិញ នៅក្នុងប្រព័ន្ធ ដើម្បីកាត់បន្ថយកាកសំណល់ និងកាត់បន្ថយការបំពុលលើបរិស្ថាន ។ ខ្សែសង្វាក់ផលិតកម្មត្រូវបានជំរុញឲ្យកាត់បន្ថយការបំពុលបរិស្ថាន ដោយរាប់តាំងពីការដឹកជញ្ជូនឡើងទៅ ។
៣. សហគ្រាសឆ្លាតវៃ
សង្វាក់ផលិតកម្មពិភពលោកត្រូវបានលើកទឹកចិត្តអោយប្រើប្រាស់នូវបច្ចេកវិទ្យាកម្រិតខ្ពស់ ដើម្បីធ្វើស្វ័យប្រវត្តិកម្មប្រកបដោយលក្ខណៈពេញលេញលើដំណើរការការងារតាមរយៈការរួមបញ្ចូលបច្ចេកវិទ្យាផ្សេងៗ ដូចជា ការបំពាក់ ប្រព័ន្ធមនុស្សយន្តស្វ័យប្រវត្តិ និងការបំពាក់ប្រព័ន្ធបច្ចេកវិទ្យាបញ្ញាសិប្បនិម្មិតជាដើម ។ ការបំពាក់នូវបច្ចេកវិទ្យាទាំងនេះ គឺជាមហិច្ឆតាមួយ ប៉ុន្តែក៏ជាហានិភ័យមួយ ជាពិសេស គឺក្រុមហ៊ុន ឬផលិតករដែលមានទុនតិចពីព្រោះវាត្រូវការដើមទុនច្រើនដើម្បីបំពាក់ខ្សែសង្វាក់ផលិតកម្ម និងការផ្គត់ផ្គង់ ដែលត្រូវបានតភ្ជាប់ដោយក្បួនដោះស្រាយឆ្លាតវៃ ។
៤. អតិថិជន គឺជាស្តេចនៅតែជាទ្រឹស្តីនៃអាជីវកម្មមានតម្លៃ
នៅឆ្នាំ២០២៥ ទ្រឹស្តីអតិថិជន គឺជាស្តេចនៅតែសំខាន់ហើយវាត្រូវបានគេព្យាករណ៍ថា នឹងកាន់តែបង្កើនសំពាធខ្លាំងឡើងបន្ថែមទៀត ។ នៅពេលដែលទីផ្សារមានភាពចាស់ទុំ និងអ្នកទិញកាន់តែយល់ច្បាស់ នោះអ្នកធ្វើអាជីវកម្មក៏ត្រូវតែពូកែ និងកាន់តែប្រឈម ដោយសារតែពួកគេត្រូវការប្រកួតប្រជែងលើគុណភាពនៃផលិតផល ក៏ដូចជាសេវាកម្ម ហើយថែមទាំងតម្លៃបន្ថែមទៀត ។ ចំណុចសំខាន់មួយទៀតដែលធុរជនត្រូវគិតផងដែរនោះលើចំណុចនេះ គឺអតិថិជនទាមទារ និងមានតម្រូវការខ្ពស់ ។ នៅឆ្នាំ២០២៥ អតិថិជន គឺកាន់តែទាមទារនូវអ្វីកាន់តែទំនើប ។ ដូច្នេះវាទាមទារឲ្យធុរជននានាត្រូវតែធានាឱ្យមានការផ្លាស់ប្តូរយ៉ាងរលូនរវាងផលិតកម្ម សេវាកម្ម គុណភាព ផ្សារភ្ជាប់នឹងទំនាក់ទំនងតាមអ៊ីនធើណិត និងក្រៅបណ្តាញ ។
៥.ភាពធន់នៅក្នុងយុគសម័យនៃភាពមិនប្រាកដប្រជា
យើងត្រូវត្រៀមខ្លួនទប់ទល់នឹងការប្រឈមមុខចំពោះភាពមិនប្រាកដប្រជាជុំវិញស្ថានភាពសេដ្ឋកិច្ច និងបញ្ហានៃសន្តិសុខអន្តរជាតិនៅពេលយើងចូលឆ្នាំ ២០២៥ ។ សង្គ្រាមដែលកំពុងបន្ត រួមជាមួយភាពមិនប្រាកដប្រជានៃសេដ្ឋកិច្ច និងមានការប្រែប្រួលលក្ខខណ្ឌទីផ្សារ គឺការបង្កើតបញ្ហាប្រឈមសម្រាប់អាជីវកម្មដ៏មហិមា ។ តម្រូវការសម្រាប់ក្រុមហ៊ុន និងសហគ្រាស ដើម្បីអភិវឌ្ឍសមត្ថភាពនៅក្នុងការទ្រទ្រង់ និងការសម្របខ្លួន គឺត្រូវការភាពធន់ និងការអត់ធ្មត់ខ្ពស់បំផុត ។
សរុបមកវិញនៅពេលយើងឈានចូលដល់ឆ្នាំ២០២៥ វាច្បាស់ណាស់ថាអាជីវកម្មត្រូវតែត្រៀមខ្លួនជាស្រេច ដើម្បីសម្របខ្លួនទៅនឹងបញ្ហាប្រឈមនានា ដែលកំពុងវិវឌ្ឍន៍យ៉ាងឆាប់រហ័ស ។ នៅក្នុងការប្រកួតប្រជែង ប្រសិនបើយើងខ្សោយ យើងនឹងស្លា.ប់ ។ ដូច្នេះវាទាមទារការត្រៀមខ្លួនឲ្យបានរួចរាល់ដើម្បីបន្សាំ និងសម្របខ្លួនតាមបរិបទសង្គម។
យើងដឹងថា អ្វីដែលបង្ហាញនេះមានចំណុចជាច្រើនដែលធុរជននៅក្នុងស្រុកយើងពិបាកនឹងអនុវត្ត ប៉ុន្តែត្រូវតបន្សាំ ពីព្រោះចង់ឬមិនចង់យើងត្រូវតែរត់តាមគេ ។ កាលណាយើងរត់ យើងអស់កម្លាំងយើងអាចដួល ប៉ុន្តែបើយើងដឹងមុន យើងត្រៀម យើងបម្រុង យើងអាចសម្របខ្លួនបាននោះ គឺជាកាលានុវត្តភាពរបស់យើង ៕
ចែករំលែកព័តមាននេះ