រាជធានីភ្នំពេញ ៖ កាលពីរសៀលថ្ងៃទី៣០ ខែតុលា ឆ្នាំ២០២៤ តុលាការកំពូល និងមហាអយ្យការអមតុលាការកំពូល បានរៀបចំពិធីប្រគល់ និងទទួលកុំព្យូទ័រ ចំនួន…
រាជធានីភ្នំពេញ ៖ កាលពីរសៀលថ្ងៃទី៣០ ខែតុលា ឆ្នាំ២០២៤ តុលាការកំពូល និងមហាអយ្យការអមតុលាការកំពូល បានរៀបចំពិធីប្រគល់ និងទទួលកុំព្យូទ័រ ចំនួន ១១៦គ្រឿង និងពិធីចែកវិញ្ញាបនបត្របញ្ជាក់ការចូលរួមវគ្គបណ្តុះបណ្តាល ឌីជីថល លើជំនាញសន្តិសុខសាយប័រ និងអក្ខរកម្មទិន្នន័យ ពីក្រសួងប្រៃសណីយ៍ និងទូរគមនាគមន៍ ផ្តល់ជូនតុលាការកំពូល និងមហាអយ្យការអមតុលាការកំពូល ។
ពិធីនេះប្រារពធ្វើឡើងក្រោមអធិបតីភាព ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងឯកឧត្តមបណ្ឌិត ជីវ កេង ប្រធានតុលាការកំពូល និងមានការចូលរួមពីមន្ត្រីអ្នកមុខអ្នកការ នៃស្ថាប័នទាំងពីរផងដែរ ។
តុលាការកំពូល និងមហាអយ្យការអមតុលាការកំពូល បានចុះហត្ថលេខាលើអនុស្សរណៈ នៃការយោគយល់ ជាមួយក្រសួងប្រៃសណីយ៍ និងទូរគមនាគមន៍ ស្តីពី “កិច្ចសហប្រតិបត្តិការដាក់ឲ្យប្រើថ្នាលផ្ទៀងផ្ទាត់ឯកសារ verify.gov.kh និងការរៀបចំហេដ្ឋារចនាសម្ព័ន្ធ និងការតភ្ជាប់អ៊ីនធីណិត” កាលពីថ្ងៃទី២៧ ខែកុម្ភៈ ឆ្នាំ២០២៤ ហើយតាមរយៈការអនុវត្តអនុស្សរណៈ នៃការយោគយល់នេះ តុលាការកំពូល និងមហាអយ្យការអមតុលាការកំពូលទទួលបាននូវវឌ្ឍនភាព នៃបរិវត្តកម្មឌីជីថលជាផ្លែផ្កា មានជាអាទិ៍ ៖
១.ការបញ្ចប់ជាស្ថាពរនូវការរៀបចំហេដ្ឋារចនាសម្ព័ន្ធនិងការតភ្ជាប់អ៊ីនធឺណិត ។
២.ការបណ្តុះបណ្តាលលើជំនាញឌីជីថលចំនួន ២វគ្គ គឺវគ្គសន្តិសុខសាយប័រ និងវគ្គអក្ខរកម្មឌីជីថល ជូនដល់អគ្គព្រះរាជអាជ្ញារង ចៅក្រម ព្រះរាជអាជ្ញា និងមន្ត្រីតុលាការកំពូលនិងមហាអយ្យការ សរុបចំនួន១១២ នាក់ ដែលនិងទទួលបាននូវវិញ្ញាបនបត្រនាពេលឱកាសនេះផងដែរ ។
៣.ការបញ្ចប់កិច្ចពិភាក្សាបច្ចេកទេសលើការដាក់ឲ្យប្រប្រាស់ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh ។
៤.ការទទួលបាន នូវ (១) កុំព្យូទ័រចំនួន ១១៦គ្រឿង (២) Domain Controller សម្រាប់គ្រប់គ្រងសិទ្ធិអ្នកប្រើប្រាស់ (៣) Server ជំនាន់ថ្មីសម្រាប់គ្រប់គ្រងសំណុំរឿងចំនួន ១គ្រឿង (៣) Server សម្រាប់គ្រប់គ្រងការព្រីននិងការស្គែនឯកសារ ចំនួន ១គ្រឿង (៤) ម៉ាស៊ីនព្រីននិងស្គែនចំនួន ១គ្រឿង (៥) ការ Hosting វេបសាយរបស់តុលាការកំពូលនិងមហាអយ្យការអមតុលាការកំពូល និង (៦) អាជ្ញាបណ្ណ Office 365 ។
តុលាការកំពូល និងមហាអយ្យការអមតុលាការកំពូល បាននិងកំពុងជំរុញការធ្វើបរិវត្តកម្មឌីធីថល និងកែប្រែស្ថាប័នមួយនេះទៅជាស្ថាប័នឌីជីថល ដើម្បីលើកកម្ពស់ប្រសិទ្ធិភាព នៃការផ្តល់សេវាយុត្តិធម៌ប្រកបដោយគុណភាព ភាពឆាប់រហ័ស ងាយស្រួល សុក្រិតភាព និងតម្លាភាព ឆ្លើយតបទៅនិងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋភិបាល នីតិកាលទី៧ នៃរដ្ឋសភា ជាពិសេស បញ្ចកោណ ទី៥ ការអភិវឌ្ឍសេដ្ឋកិច្ច និងសង្គមឌីជីថល និងគោលនយោបាយរាជរដ្ឋាភិបាលឌីជីថលកម្ពុជា ២០២២.២០២៥ ។
ជាជំហានបន្ទាប់ តុលាការកំពូល និងមហាអយ្យការអមតុលាការកំពូល និងបន្តសហការយ៉ាងជិតស្និតជាមួយក្រសួងប្រៃសណីយ៍ និងទូរគមនាគមន៍ លើកិច្ចការជាអាទិភាពមួយចំនួនបន្ថែមទៀត ដូចជា (១) ដាក់ឲ្យប្រើថ្នាលនិងកម្មវិធីរដ្ឋបាលឌីជីថល (២) អភិវឌ្ឍនិងប្រើប្រាស់កម្មវិធីគ្រប់គ្រងសំណុំរឿង ដែលគាំទ្រនិងអភវឌ្ឍដោយក្រសួងប្រៃសណីយ៍និងទូរគមនាគមន៍ និង (៣) បណ្តុះបណ្តាលនិងជំរុញការចាប់យកឌីជីថលរបស់មន្ត្រីនៃតុលាការកំពូល និងមហាអយ្យការអមតុលាការកំពូល ឲ្យកាន់តែមានគុណភាពល្អប្រសើ និងប្រសិទ្ធិភាពនៃការផ្តល់នូវសេវាយុត្តិធម៌សម្រាប់សង្គមជាតិ ៕
ចែករំលែកព័តមាននេះ