ទីក្រុងប៉េកាំង៖ ប្រទេសចិននិយាយដាស់តឿនកោះតៃវ៉ាន់ដើម្បីឱ្យកោះនេះយល់ឱ្យច្បាស់ថាខ្លួនមិនអាចពឹងកម្លាំងបរទេសបានឡើយ។ ជាពិសេស ប្រទេសចិនចង់សំដៅទៅលើប្រទេសអាមេរិកដែលច្រើនតែប្រកាសជាចំហថាខ្លួននឹងធ្វើអន្តរាគមន៍ភ្លាមបើចិនវាយប្រហារតៃវ៉ាន់។ អ្នកនាំពាក្យចិនសូមផ្ដាំថាបើលោកត្រាំឈ្នះឆ្នោតនៅអាណត្តិថ្មី គាត់មិនខ្វល់នឹងកោះតៃវ៉ាន់ទេ ហេងស៊យបោះបង់កោះតៃវ៉ាន់ចោលតែម្ដងព្រោះនយោបាយរបស់ត្រាំគឺតម្កល់ផលប្រយោជន៍ជាតិអាមេរិកទីមួយ។
កាលពីពេលកន្លងមក លោកត្រាំធ្លាប់បង្ហាញអាកប្បកិរិយាមិនអាចជួយអ្នកដទៃសុខចិត្តខាតបង់ផលប្រយោជន៍ជាតិរបស់ខ្លួនបានឡើយ។ លោកសង្កត់ធ្ងន់ថាតៃវ៉ាន់ត្រូវតែបង់លុយថ្លៃការពារឱ្យបានច្រើនគ្រប់គ្រាន់ ប្រយ័ត្នលោកបោះបង់ចោល។ លោកយល់ថាតៃវ៉ាន់បានដណ្ដើមមុខរបររបស់អាមេរិកច្រើនណាស់នៅក្នុងវិស័យផលិតបន្ទះឈីប។ លោកចង់មានន័យថាតៃវ៉ាន់ទទួលបានប្រាក់ចំណេញច្រើនម្លឹងៗ ហេតុអ្វីបានជារិះថាំចំពោះការបង់ថ្លៃការពារ?
អ្នកនាំពាក្យការិយាល័យទំនាក់ទំនងរវាងប្រទេសចិន និងកោះតៃវ៉ាន់ លោកស្រីជូហ្វឹងលៀន (Zhu Fenglian) ថ្លែងថាប្រជាជនតៃវ៉ាន់យល់ច្បាស់អំពីចរិតនយោបាយការរបស់អាមេរិក។ ទោះបីអាមេរិកចង់ជួយ ឬចង់ដោះដៃពីតៃវ៉ាន់ លោកស្រីជឿជាក់ថាតៃវ៉ាន់យល់ច្បាស់ណាស់ថាអាមេរិកគិតតែផលប្រយោជន៍របស់ជាតិគេតែប៉ុណ្ណោះ។ ប្រជាជនតៃវ៉ាន់ដឹងច្បាស់ថាខ្លួនគ្រាន់តែជាកូនអុកសម្រាប់គេប្រើមួយគ្រាតែប៉ុណ្ណោះ។ នៅទីបញ្ចប់ ពេលណាគេលែងត្រូវការ គេនឹងបោះបង់ចោលដូចជាក្មេងតូចម្នាក់។
អ្នកនាំពាក្យចិនរូបនេះមិនបាននិយាយឈ្មោះលោកត្រាំទេនៅក្នុងការឆ្លើយតបទៅសំណួររបស់អ្នកសារព័ត៌មាន។ ប៉ុន្តែគេដឹងថាប្រទេសចិនមិនសប្បាយចិត្តនឹងឃើញលោកត្រាំឡើងមកដឹកនាំប្រទេសអាមេរិកសាជាថ្មីទេព្រោះសង្គ្រាមពាណិជ្ជកម្មនឹងផ្ទុះឡើងកាន់តែខ្លាំង។ ដោយសារអាមេរិកកំពុងជាប់រវល់នៅក្នុងការឃោសនាបោះឆ្នោត ដូច្នេះតៃវ៉ាន់មិនចង់ធ្វើអត្ថាធិប្បាយវែងឆ្ងាយទេ។ តៃវ៉ាន់គ្រាន់តែជូនពរឱ្យការបោះឆ្នោតនៅអាមេរិកធ្វើឡើងដោយរលូនតាមគន្លងប្រជាធិបតេយ្យ។
កាលពីថ្ងៃសុក្រសប្ដាហ៍មុន ទីក្រុងវ៉ាស៊ីនតោនប្រកាសផ្ដល់អាវុធទៅឱ្យតៃវ៉ាន់សរុបជាទឹកប្រាក់ជិត២ពាន់លានដុល្លារ។ នៅក្នុងកញ្ចប់នោះក៏មានជើងទម្របាញ់មីស៊ីលផងដែរ។ ហេតុនេះ ប្រទេសចិនមានកំហឹងយ៉ាងខ្លាំង។ ចិនព្រមានធ្ងន់ៗថាបើទុកជាតៃវ៉ាន់ទិញអាវុធដាក់ពេញទឹកដីរបស់ខ្លួនយ៉ាងណាក្ដី មិនមែនមានន័យថាតៃវ៉ាន់ងាចទិញបានការធានាសន្តិសុខនោះទេ៕
ចែករំលែកព័តមាននេះ