ខេត្តបាត់ដំបង ៖ ជនដែលមានសតិមិនប្រក្រតីម្នាក់បានយកភ្លើងដុតខោអាវចាស់ៗ ក្នុងគោលបំណងបណ្ដេញសត្វមូលក្នុងផ្ទះ តែចៃដន្យភ្លើងបានឆេះរាលដាល រហូតលេបយកផ្ទះមួយខ្នងទាំងស្រុង កាលពីព្រឹកថ្ងៃទី២៩ តុលា នៅភូមិស្ថាពរ២ ឃុំអំពិលប្រាំដើម…
ខេត្តបាត់ដំបង ៖ ជនដែលមានសតិមិនប្រក្រតីម្នាក់បានយកភ្លើងដុតខោអាវចាស់ៗ ក្នុងគោលបំណងបណ្ដេញសត្វមូលក្នុងផ្ទះ តែចៃដន្យភ្លើងបានឆេះរាលដាល រហូតលេបយកផ្ទះមួយខ្នងទាំងស្រុង កាលពីព្រឹកថ្ងៃទី២៩ តុលា នៅភូមិស្ថាពរ២ ឃុំអំពិលប្រាំដើម ស្រុកបវេល ធ្វើឲ្យខូចខាតគិតជាទឹកប្រាក់ប្រមាណ២៧លានរៀល ។
សេចក្ដីរាយការណ៍របស់សមត្ថកិច្ចបានឲ្យដឹងថា លំនៅឋាននោះ មានទំហំ៧ម៉៩ម៉ ធ្វើពីថ្មក្រោម ឈើលើ និងប្រក់ក្បឿង ដែលមានម្ចាស់ឈ្មោះ សុន ញ៉ាញ ភេទស្រី អាយុ៦៤ឆ្នាំ ។ រីឯជនដៃដល់ដែលបានដុតផ្ទះនោះឈ្មោះ ឆុន ឈួង ភេទប្រុស អាយុ២៧ឆ្នាំ ត្រូវជាក្មួយម្ចាស់ផ្ទះ ហើយត្រូវគេអះអាងថា ជាមនុស្សកើតរោគសរសៃប្រសាទ ។
អធិការស្រុកបវេល លោក សុខ សារិន បានប្រាប់ថា ជនបង្កជាមនុស្សដែលមានសតិមិនប្រក្រតី ហើយក៏ត្រូវជាក្មួយម្ចាស់ផ្ទះដែរ ។ លោកថា ម្ចាស់ផ្ទះមិនសូវបានស្នាក់នៅក្នុងផ្ទះទេ ភាគច្រើនគាត់ទៅប្រកបមុខរបររកស៊ីនៅក្រុងប៉ោយប៉ែត ហើយក្មួយឈ្មោះ ឆុន ឈួន ដែលមានសតិមិនគ្រប់នេះ តែងចេញចូល និងស្នាក់នៅផ្ទះកើតហេតុនេះ តែភាគច្រើនផ្ទះចាក់សោរទុកចោល ។
លោក សុខ សារិន បានបញ្ជាក់ថា នៅថ្ងៃកើតហេតុ គ្មាននរណាបានដឹង ឬបានឃើញផ្ទាល់ភ្នែក នៅពេលក្មួយម្ចាស់ផ្ទះរូបនេះ បង្កឲ្យមានអគ្គីភ័យនោះទេ លុះអគ្គិភ័យឆាបឆេះ អណ្ដាតភ្លើងសន្ធោរសន្ធៅ ផ្សែងខ្មួលខ្មាញ់ពេញផ្ទៃអាកាស ទើបអ្នកភូមិមានការភ្លាក់ផ្ទើលនាំគ្នាជួយអន្តរាគមន៍ និងរាយការណ៍ប្រាប់សមត្ថកិច្ច ។
បើតាមអ្នកភូមិបាននិយាយថា ផ្ទះកើតហេតុខាងលើ ស្ថិតនៅឆ្ថាយពីគេឯង។ ហើយគេតែងឃើញក្មួយប្រុសម្ចាស់ផ្ទះ ដែលកើតរោគសរសៃប្រសាទខាងលើ ចេញចូលស្នាក់នៅទីនោះ ។
ប្រភពដដែលបានបញ្ជាក់ថា នៅថ្ងៃកើតហេតុ គេឃើញអណ្ដាតភ្លើង និងផ្សែងយ៉ាងសន្ធោរសន្ធៅ ឆាបឆេះផ្ទះនោះទើបអ្នកភូមិនាំគ្នារត់ទៅជួយពន្លត់ ។ នៅកន្លែងកើតហេតុ គេឃើញជនបង្កកំពុងស្ថិតនៅទីនោះដែរ តែត្រូវសមត្ថកិច្ចឃាត់ខ្លួនទៅសួរនាំ រីឯផ្ទះដ៏ធំមួយខ្នងនេះត្រូវអគ្គិភ័យលេបយកអស់ទាំងស្រុង ដោយសារអគ្គិភ័យឆេះលឿន ហើយរថយន្តពន្លត់សមត្ថកិច្ចមិនអាចចូលរួច ។
នៅចំពោះមុខសមត្ថកិច្ច ជនសរសៃប្រសាទឈ្មោះ ឆុន ឈួន នេះបានសារភាពទាំងរញីរញ័រថា ខ្លួនជាអ្នកដុតផ្ទះនោះ ។ ជននេះ ត្រូវបានសមត្ថកិច្ចស្រង់សម្ដីថា ដំបូងខ្លួនយកខោអាវចាស់ៗ មកគរដុតដើម្បីដេញមូសក្នុងផ្ទះ តែក៏ឆេះរាលដាល ឆេះទាំងផ្ទះខ្ទេចអស់តែម្ដង ។ លោកសុខ សារិន អធិការស្រុកបវេលបាននិយាយថា ពេលកើតហេតុនោះ រថយន្តពន្លត់អគ្គិភ័យបានព្យាយាមរកច្រកចូលជួយអន្តរាគម៍ តែផ្ទះនោះនៅដាច់ស្រយាល គ្មានផ្លូវសម្រាប់រថយន្តចូលដល់ ទើបរថយន្តពន្លត់អគ្គិភ័យមិនអាចចូលជួយទាន់ពេល ។
លោកអធិការបានបន្ថែមថា ជនបង្កសតិមិនគ្រប់ទឹកនោះ ពិតជាបានឆ្លើយទទូលស្គាល់ថា ខ្លួនជាអ្នកបង្កឲ្យមានអគ្គិភ័យនោះមែន។ ប៉ុន្តែយើងមិនឃាត់ខ្លួនជនបង្កឡប់សតិនេះទេ ដោយយោងតាមសំណូមពរម្ចាស់ផ្ទះ ដែលត្រូវជាពូ ។
ជុំវិញការខូចខាតវិញ បើតាមរបាយការណ៍សមត្ថកិច្ច ក្រៅតែពីអស់ផ្ទះមួយខ្នងទ្រព្យសម្បត្តិនានា ដែលនៅក្នុងផ្ទះទាំងអស់ក៏ក្លាយជាផេះដែរ ដែលគិតជាទឹកប្រាក់អស់ប្រមាណ២៧លានរៀល ៕
ចែករំលែកព័តមាននេះ