ក្រុងប៉ោយប៉ែត ៖ ទឹកបរិសុទ្ធម៉ាកណាមធីប ផលិតនៅប្រទេសសៀម ដែលដឹកតាមរថយន្តសៀមធុនធំប្រភេទយីឌុប ពាក់ស្លាកលេខ៧៥-៧៣៧៣ ត្រូវបានលោកអ៊ុក សុភាព ប្រធានសាខាកាំកុងត្រូលខេត្តបន្ទាយមានជ័យប្រកាសប្រាប់ដល់សាធារណជនថា ជាទឹកបរិសុទ្ធខូចគុណភាព និងមានមេរោគមិនអនុញ្ញាតឱ្យនាំចូលឡើយ
ក្រុងប៉ោយប៉ែត ៖ ទឹកបរិសុទ្ធម៉ាកណាមធីប ផលិតនៅប្រទេសសៀម ដែលដឹកតាមរថយន្តសៀមធុនធំប្រភេទយីឌុប ពាក់ស្លាកលេខ៧៥-៧៣៧៣ ត្រូវបានលោកអ៊ុក សុភាព ប្រធានសាខាកាំកុងត្រូលខេត្តបន្ទាយមានជ័យប្រកាសប្រាប់ដល់សាធារណជនថា ជាទឹកបរិសុទ្ធខូចគុណភាព និងមានមេរោគមិនអនុញ្ញាតឱ្យនាំចូលឡើយ ហើយមន្ត្រីជំនាញកាំកុងត្រូលប្រចាំនៅច្រកទ្វារប៉ោយប៉ែតក៏ធ្លាប់ចាប់យកទៅកម្ទេចចោលផងដែរ រួមទាំងទំនិញនិងអាហារខូចគុណភាព និងហួសកាលបរិច្ឆេទផ្សេងទៀត ។
ដោយឡែក នៅវេលាម៉ោង៣និង៣០នាទីរសៀលថ្ងៃទី១៨ មិថុនា គេឃើញរថយន្តប្រភេទយីឌុបមួយគ្រឿងនេះដឹកទឹកបរិសុទ្ធម៉ាកណាមធីបចូលមកនិងទម្លាក់ស្តុកក្នុងឃ្លាំងនៅប្លុកបរិវណកាស៊ីណូផ្កាយ៥ ស្ថិតក្នុងភូមិក្បាលស្ពាន សង្កាត់ប៉ោយប៉ែត ។ ពេលឃើញសកម្មភាពបែបនេះកើតឡើង ក្រុមអ្នកសារព័ត៌មានក៏បានព្យាយាមផ្តល់ដំណឹងដល់មន្ត្រីកាំកុងត្រូលដែលឈរជើងនៅចំណុចមាត់ច្រកប៉ោយប៉ែតភ្លាមៗ ។
ក្រុមកម្មករបានទម្លាក់ទឹកបរិសុទ្ធចេញពីរថយន្តយកទៅដាក់ក្នុងឃ្លាំងនោះប្រមាណជិត១ម៉ោង លុះពួកគេឃើញមានអ្នកសារព័ត៌មានថតរូបច្រើនពេកក៏បានបិទទ្វារឃ្លាំងហើយបើករថយន្តនោះចេញទៅ ដោយនៅក្នុងរថយន្តនៅមានសល់ទឹកបរិសុទ្ធមួយចំនួនទៀតនិងបានបើកចូលទៅក្នុងកន្លែងសន្តិសុខរបស់កាស៊ីណូផ្កាយ៥ ។ លោកស៊ាន ស៊ីណាត អនុប្រធានសាខាកាំកុងត្រូលខេត្តបន្ទាយមានជ័យ និងជាប្រធានក្រុមមន្ត្រីជំនាញឈរជើងនៅមាត់ច្រកទ្វារប៉ោយប៉ែត បានប្រាប់អ្នកសារព័ត៌មានតាមទូរស័ព្ទថា ចំពោះទឹកបរិសុទ្ធនោះគឺតម្រូវឱ្យខាងក្រុមហ៊ុននាំចូលទៅប្រទេសសៀមវិញ ។
ប្រជាពលរដ្ឋនៅក្រុងប៉ោយប៉ែត បានរិះគន់មន្ត្រីជំនាញថា ទឹកបរិសុទ្ធម៉ាកណាមធីប រួមទាំងទំនិញនិងអាហារខូចគុណភាពនិងហួសកាលបរិច្ឆេទនោះ គេឃើញនៅតែមានលើទីផ្សារក្នុងក្រុងប៉ោយប៉ែតនេះ ហើយពួកគាត់សំណូមពរដល់ថ្នាក់ដឹកនាំនិងក្រសួងពាក់ព័ន្ធសូមជួយទប់ស្កាត់បង្ក្រាបឱ្យបានទាន់ពេលវេលាផង ពីព្រោះបញ្ហាសុវត្ថិភាពចំណីអាហារប្រចាំថ្ងៃសម្រាប់ពួកគាត់គឺពឹងទៅលើមន្ត្រីជំនាញទាំងស្រុង ។ ទោះជាបែបណា ក៏មានការអំពាវនាវដល់ប្រជាពលរដ្ឋដែលជាអ្នកទិញម្ហូបអាហារបរិភោគ គួរតែចៀសវាងដោយការភ្ញាក់រលឹកផងដែរ ព្រោះថា បើលែងមានអ្នកទិញ ទំនិញទាំងនោះ នឹងលែងមានវត្តមានលើទីផ្សារហើយ ៕
ចែករំលែកព័តមាននេះ