រាជធានីភ្នំពេញ ៖ អ្នកប្រដាល់គុនខ្មែរលំដាប់ជួរមុខនៅកម្ពុជា ត្រូវបានគេចាត់បញ្ចូលឬលេចមុខជាបន្តបន្ទាប់ក្នុងឆ្នាំ២០២៤នេះ ប៉ុន្តែអ្វីដែលគេចង់ដឹងខ្លាំងនោះគឺថា តើអ្នកប្រដាល់គុនខ្មែរលំដាប់ជួរមុខ ឬហៅកាត់ថា Grade A ទាំងនោះ…
រាជធានីភ្នំពេញ ៖ អ្នកប្រដាល់គុនខ្មែរលំដាប់ជួរមុខនៅកម្ពុជា ត្រូវបានគេចាត់បញ្ចូលឬលេចមុខជាបន្តបន្ទាប់ក្នុងឆ្នាំ២០២៤នេះ ប៉ុន្តែអ្វីដែលគេចង់ដឹងខ្លាំងនោះគឺថា តើអ្នកប្រដាល់គុនខ្មែរលំដាប់ជួរមុខ ឬហៅកាត់ថា Grade A ទាំងនោះ ទាំងស៊េរីចាស់ និងស៊េរីថ្មី ពេលឡើងសង្វៀនម្តងៗ ទទួលបានប្រាក់តម្លៃខ្លួនប៉ុន្មាន?
ខាងក្រោមនេះជាតម្លៃខ្លួនក្រៅផ្លូវការរបស់អ្នកប្រដាល់គុនខ្មែរលំដាប់ជួរមុខនៅកម្ពុជាមួយចំនួនដែលកោះសន្តិភាពទទួលបានពីប្រភពនានាដែលសុំមិនឱ្យបញ្ចេញឈ្មោះ។
១-ធឿន ធារ៉ា ៖ កូនសិស្សរបស់លោក អេ ភូថង រូបនេះត្រូវបានអ្នករៀបចំកម្មវិធីប្រដាល់ប្រចាំសង្វៀនទូរទស្សន៍មួយសុំមិនបញ្ចេញឈ្មោះបានទម្លាយមកថា តម្លៃខ្លួនកីឡាករលំដាប់ជួរមុខម្នាក់នេះបានហក់ឡើងដល់ចំនួន៣-៤ពាន់ដុល្លារក្នុងមួយប្រកួតទៅហើយ ។ ប៉ុន្តែតម្លៃខ្លួននេះក៏អាចប្រែប្រួលតិចតួចទៅតាមស្ថានីយទូរស្សន៍សុំការយោគយល់បញ្ចុះតម្លៃខ្លះ ព្រោះអាចមកពីកង្វះថវិកា ឬកង្វះអ្នកចូលរួមជួយឧបត្ថម្ភជាដើម។
២-ពេជ្រ សម្បត្តិ ៖ សិស្សសំណព្វរបស់លោកគ្រូពេជ្រ សុផាន់ រូបនេះ ទទួលបានតម្លៃខ្លួន២-៣ពាន់ដុល្លារក្នុងមួយប្រកួត ។ ប៉ុន្តែតម្លៃខ្លួននេះក៏អាចប្រែប្រួលតិចតួចទៅតាមស្ថានីយទូរស្សន៍នីមួយៗពោលគឺមិនដូចគ្នាទេ។
៣-រឿង សោភ័ណ្ឌ ៖ តម្លៃខ្លួនកីឡាករជំនាញប្រើកណ្ដាប់ដៃឆ្វេងរូបនេះ ក៏មានការប្រែប្រួលខ្លះដែរ ពោលកាលពីមុនត្រូវបានគេទម្លាយមកថា ក្នុងមួយប្រកួត រឿង សោភ័ណ្ឌទទួលបានពី ៥០០ ទៅ ៦០០ ដុល្លារ ។
ប៉ុន្តែមួយរយៈចុងក្រោយនេះតម្លៃខ្លួនបានហក់ឡើងដល់ជាង១ពាន់ដុល្លារក្នុងមួយប្រកួត ហើយពេលខ្លះក៏អាចឈានដល់២ពាន់ដុល្លារផងដែរ ដែលតម្លៃ២ពាន់ដុល្លារនេះជាការទាមទារពីរូបគេផ្ទាល់ ប៉ុន្តែតម្លៃចុងក្រោយអាស្រ័យលើការចរចា។
៤-ផល សោភ័ណ្ឌ ៖ កីឡាកររបស់ក្លិបតាឡីដំរីមានរិទ្ធរូបនេះ ក៏មានតម្លៃខ្លួនមិនអន់នោះដែរនាពេលបច្ចុប្បន្ន ពោលគឺស្ថិតនៅចន្លោះពី ១ពាន់ ទៅ ២ពាន់ដុល្លារផងដែរក្នុងមួយប្រកួត។
៥-ឡៅ ចន្ទ្រា ៖ ប្អូនប្រុសបង្កើតរបស់ ឡៅ ស៊ីណាត រូបនេះត្រូវបានគេដឹងថា តម្លៃខ្លួននាពេលបច្ចុប្បន្នបានហក់ឡើងខ្លាំង ដោយរូបគេបានទាមទារតម្លៃខ្លួនចំនួន២ពាន់ដុល្លារពីអ្នករៀបចំកម្មវិធីប្រដាល់ ។ ខណៈកាលពី២ឬ៣ឆ្នាំមុនកីឡាកររូបនេះទទួលបានត្រឹម៤០០ ទៅ៥០០ដុល្លារប៉ុណ្ណោះ។ ប៉ុន្តែតម្លៃ២ពាន់ដុល្លារនេះកម្រមានអ្នករៀបចំកម្មវិធីប្រដាល់ហ៊ានចាយលុយយករូបគេមកវាយណាស់ បើហ៊ានត្រឹមតែជាង១ពាន់ដុល្លារប៉ុណ្ណោះ។
៦-ឡៅ ចិត្រា ៖ អ្នកប្រដាល់ជើងខ្លាំងប្រចាំក្លិបឆ័ត្រយោង ៩១១ រូបនេះក៏មិនខុសគ្នាឆ្ងាយពីបងប្រុស ឡៅ ចន្ទ្រា ប៉ុន្មានដែរ ពោលគឺតម្លៃខ្លួនល្បាក់ខ្ទង់ជាង១ពាន់ដុល្លារនាពេលបច្ចុប្បន្ន។
៧-ឃីម ឌីម៉ា ៖ ម្ចាស់មេដាយមាសសុីហ្គេមឆ្នាំ២០១៧រូបនេះបានបង្ហើបថា លោកទទួលបានប្រាក់តម្លៃខ្លួនជាង១ពាន់ដុល្លារក្នុង១ប្រកួតនាពេលបច្ចុប្បន្ន។
៨-ឃីម បូរ៉ា ៖ ម្ចាស់មេដាយមាសថ្នាក់ជាតិប្រភេទទម្ងន់ ៦០ គីឡូក្រាម ឃីម បូរ៉ា ត្រូវបានគេដឹងថា តម្លៃខ្លួនរបស់គេក្នុងមួយប្រកួតលើសង្វៀនក្នុងស្រុក គឺទទួលបានចាប់ពី ១ពាន់ ទៅ ២ពាន់ដុល្លារក្នុងមួយប្រកួត។
៩-ឈុត សេរីវណ្ណថង ៖ ម្ចាស់ខ្សែក្រវាត់មាសរបស់ស្ថានីយទូរទស្សន៍ PNN ត្រូវបានប្រភពអ្នករៀបចំកម្មវិធីប្រដាល់បង្ហើបប្រាប់ថា កីឡាកររូបនេះទទួលបានប្រាក់តម្លៃខ្លួនចាប់ពី ១ពាន់ទៅ២ពាន់ដុល្លារ។
១០-អេលីត សាន់ ៖ អ្នកប្រដាល់ជើងខ្លាំងប្រចាំក្លិបនាយកដ្ឋានអង្គរក្សរូបនេះទទួលបានប្រាក់តម្លៃខ្លួនពី ៥០០ ទៅ ១០០០ ដុល្លារ។
ឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរថ្មីៗនេះបានទម្លាយថា តម្លៃខ្លួនកីឡាករប្រដាល់គុនខ្មែរនាពេលបច្ចុប្បន្នមានការឡើងខ្ពស់ណាស់ ។ ជាក់ស្ដែង កីឡាករមុឺន មេឃា កាលពីឆ្នាំកន្លងទៅទទួលបានតម្លៃខ្លួនត្រឹមតែ២០០-៣០០ដុល្លារប៉ុណ្ណោះ តែឆ្នាំនេះទទួលបានរាប់ពាន់ដុល្លារក្នុងមួយប្រកួត ។ ឯកឧត្តមថា កីឡាករល្អៗមានទីផ្សារប្រកួតច្រើនដោយសារស្ថានីយទូរទស្សន៍ និងអ្នកឧបត្ថម្ភកម្មវិធីមានតម្រូវការខ្លាំង ធ្វើឱ្យប្រធានក្លិបប្រដាល់ឬគ្រូបង្វឹកពិបាកបំពេញតាមសំណូមពរ។
ឯកឧត្តមបានលើកឧទាហរណ៍ដូចជាលោកអេ ភូថង ថា គាត់កំពុងពិបាកចិត្តដោយសារពេល
លើកទូរសព្ទ ម្ដងៗ ទទួលតែការស្នើសុំកីឡាករល្អៗពីអ្នករៀបចំកម្មវិធីប្រដាល់ស្ទើរគ្រប់ស្ថានីយ
ទូរទស្សន៍ ។ បើមិនឱ្យកីឡាករល្អទៅទេ ពួកគេនឹងខឹង ឬអន់ចិត្ត តែគាត់មិនអាចបំពេញ
តាមសំណូមពរពួកគេទាំងស្រុងទេ ព្រោះកីឡាករមិនអាចឡើងវាយពីរឬច្រើនកម្មវិធីក្នុងពេលតែ
មួយបានឡើយ។
ឯកឧត្តមខូវ ឆាយ បញ្ជាក់ថា សព្វថ្ងៃយើងឃើញហើយការរីកចម្រើនរបស់គុនខ្មែរកំពុងមានការគាំទ្រច្រើន ដូច្នេះពេលយើងរីកចម្រើនគឺភាគីពាក់ព័ន្ធទទួលបានផលប្រយោជន៍។ កីឡាករ
កីឡាការិនីយើងតម្លៃខ្លួនកើនឡើងច្រើនជាងមុន។
យើងឃើញហើយ កីឡាករ កីឡាការិនីខ្លះកាលពីឆ្នាំមុនបានតម្លៃខ្លួន២០០ទៅ៣០០ដុល្លារក្នុងមួយប្រកួត តែឥឡូវកើនរហូតដល់១០០០ដុល្លារ ១២០០ដុល្លារ ឬ១៥០០ដុល្លារក៏មាន។ បើបូកបន្ថែមនឹងប្រាក់រង្វាន់២០០០ទៅ៣០០០ដុល្លារទៀត អាចមួយប្រកួតបាន៤០០០ទៅ៥០០០ដុល្លារ។ ការបង្កើនតម្លៃខ្លួន និងប្រាក់រង្វាន់ ស្របពេលមានកម្មវិធីប្រកួតច្រើនទាំងក្នុងស្រុក និងក្រៅប្រទេសដែលនេះជាមូលដ្ឋានគ្រឹះដ៏ចាំបាច់មួយជំរុញឲ្យវិស័យកីឡាគុនខ្មែររីកចម្រើន។
ឯកឧត្តម បានរៀបរាប់ថា បើអាជីពប្រដាល់របស់ពួកគាត់(កីឡាករ-កីឡាការិនី)កាន់តែមាន
តម្លៃ ពួកគាត់យកចិត្តទុកដាក់ពង្រឹងការហ្វឹកហាត់ដើម្បីមានទីផ្សារប្រកួត ដោយសារតម្លៃ
ខ្លួនចេះតែកើនឡើង ។ ទោះបីយ៉ាងណាក៏នៅតែមានអ្នកបោះបង់អាជីពខ្លះដែរ តែអ្នកចូលហ្វឹកហាត់ប្រដាល់ច្រើន ហើយអ្នកបោះបង់តិចតូចគឺជាអ្នកស៊ូអត់រួច ។ ការប្រកួតយើងឃើញហើយនៅលើសង្វៀនមានភាពស្វិតស្វាញជាងមុន មានការប្រកួតប្រជែងខ្ពស់ជាងមុនដោយ
សារកីឡាករ កីឡាការិនីរបស់យើងបញ្ចេញអស់ពីសមត្ថភាព ។ នៅពេលតម្លៃខ្លួនខ្ពស់គឺ
ពួកគាត់វ៉ៃអស់ពីសមត្ថភាព គុណភាពកាន់តែល្អ។
យ៉ាងណាក៏ដោយ ប្រធានសហព័ន្ធកីឡាប្រដាល់គុនខ្មែររូបនេះមិនបានបង្ហាញឲ្យដឹងថាតើកីឡាកររូបណាខ្លះ និងកម្រិតណាដែលកើនឡើងតម្លៃខ្លួនប្រកួតយ៉ាងឆាប់រហ័សក្នុងរយៈពេលមួយយ៉ាងខ្លី ។ ខណៈបច្ចុប្បន្នមានម្ចាស់កម្មវិធីប្រកួតច្រើន កីឡាករល្បីៗលំដាប់ជួរមុខទទួលបានឱកាសប្រកួតស្ទើររកពេលសម្រាកគ្មាន ដូច្នេះតម្លៃខ្លួនរបស់ពួកគេកាន់មានការប្រកួតប្រជែងឡើងខ្ពស់ទៅតាមសមត្ថភាព និងប្រជាប្រិយភាពរបស់ពួកគេ។
គួរឱ្យដឹងផងដែរថា តម្លៃខ្លួនកីឡាករគុនខ្មែរលំដាប់ជួរមុខនាពេលបច្ចុប្បន្នពិតជាឡើងខ្ពស់មែន ធ្វើឱ្យជីវភាពអ្នកចាប់អាជីពឈឺខ្លួនមួយនេះមានការប្រែប្រួលជាវិជ្ជមានគួរឱ្យចាប់អារម្មណ៍ និងទទួលបានការសាទរពីគ្រប់មជ្ឈដ្ឋាន ។ ការឡើងតម្លៃខ្លួនខ្ពស់របស់អ្នកប្រដាល់លំដាប់ជួរមុខនាពេលបច្ចុប្បន្នមិនត្រឹមតែទទួលបានការសាទរខ្លាំងប៉ុណ្ណោះទេ ថែមទាំងធ្វើឱ្យអតីតអ្នកប្រដាល់ល្បីឈ្មោះមួយចំនួនដែលខ្លះប្រកាសចូលនិវត្តន៍ឬឈប់ទៅហើយសុំចូលសង្វៀនវិញដូចជា ឡោ សំណាង, កែវ រំចង់និងវង្ស ណយ…ជាដើម ៕
ចែករំលែកព័តមាននេះ