ទីក្រុងម៉ូស្គូ៖ នៅថ្ងៃចុងបញ្ចប់នៃកិច្ចប្រជុំកំពូលប្រ៊ីក (BRICS)នៅទីក្រុងកាហ្សាន (Kazan) ប្រទេសរុស្ស៊ីនោះ លោកពូទីននិយាយដោយប្រាកដប្រជាថាទោះបីរុស្ស៊ី និងកូរ៉េខាងជើងពង្រីកទំនាក់ទំនង និងកិច្ចសហប្រតិបត្តិការដល់កម្រិតណាក៏ដោយ ក៏វាជាសិទ្ធិរបស់រដ្ឋាភិបាលទីក្រុងម៉ូស្គូតែប៉ុណ្ណោះ។ លោកថ្លែងដូច្នេះតបទៅនឹងព័ត៌មានដែលផ្សាយថាកូរ៉េខាងជើងបញ្ជូនទ័ពទៅជួយរុស្ស៊ីនៅក្នុងសង្គ្រាមអ៊ុយក្រែន។
ចំពោះសំណួររបស់អ្នកសារព័ត៌មានដែលថា «តើលោកឆ្លើយតប ឬធ្វើអត្ថាធិប្បាយយ៉ាងណាចំពោះព័ត៌មាននេះ?»លោកពូទីនមិនបានឆ្លើយដោយត្រង់ៗដើម្បីបដិសេធ ឬទទួលស្គាល់ថាជាការពិតទេ។ ប៉ុន្តែលោកនិយាយនៅក្នុងន័យទូទៅថានេះជារឿងរបស់រដ្ឋាភិបាលលោកតែប៉ុណ្ណោះដើម្បីពង្រឹងការអនុវត្តតាមកិច្ចព្រមព្រៀងភាពជាដៃគូរវាងម៉ូស្គូ និងព្យុងយ៉ាង។
មកទល់នឹងពេលនេះ លោកពូទីនពុំដែលបដិសេធព័ត៌មានដែលថាកូរ៉េខាងជើងបញ្ជូនទ័ពទៅរុស្ស៊ីទេ។ លោកគ្រាន់តែថ្លែងដោយខ្លីថាសង្គ្រាមអ៊ុយក្រែនឆាបឆេះកាន់តែខ្លាំងរហូតមកដល់ពេលនេះមិនមែនដោយសារទង្វើរបស់រុស្ស៊ីទេ។ ប៉ុន្តែដោយសារក្រុមបស្ចិមប្រទេសដែលបន្តផ្ដល់អាវុធយុទ្ធភ័ណ្ឌយ៉ាងសម្បូរបែបទៅឱ្យអ៊ុយក្រែនដើម្បីដុតបំពក់ភ្នក់ភ្លើងសង្គ្រាមនេះ។
ពាក់ព័ន្ធនឹងកងទ័ពកូរ៉េខាងជើងនេះដែរ អ្នកនាំពាក្យវិមានក្រឹមឡាំងក៏មិនឆ្លើយដោយត្រង់ៗថាមាន ឬគ្មានវត្តមានរបស់ពួកគេនៅលើទឹកដីរុស្ស៊ីនោះដែរ។ លោកប៉េស្កូសគ្រាន់តែនិយាយដោយខ្លីថាការពង្រឹងទំនាក់ទំនងរវាងរុស្ស៊ី និងកូរ៉េខាងជើងគ្មានគោលដៅធ្វើឱ្យប៉ះពាល់ប្រទេសដទៃទៀតនោះឡើយ។ ទោះជាយ៉ាងណាក្ដី កូរ៉េខាងត្បូងកំពុងខឹងដាច់ក្បាលដាច់កន្ទុយចំពោះរឿងនេះ។
យោងតាមការប្រមើលមើលរបស់ក្រុមអ្នកវិភាគ កូរ៉េខាងជើងបញ្ជូនទ័ពទៅរុស្ស៊ីលើកនេះមិនមែនបញ្ជូនទៅដោយឥតប្រយោជន៍នោះឡើយ។ រុស្ស៊ីអាចនឹងផ្ដល់ការតបស្នងជាហិរញ្ញវត្ថុ, បច្ចេកវិទ្យា ឬបច្ចេកវិទ្យានុយក្លេអ៊ែរក៏អាចថាបាន។ ដូច្នេះ វាជាគ្រោះថ្នាក់សម្រាប់កូរ៉េខាងត្បូងដែលទទួលរងការសង្គ្រឺតធ្មេញ និងប្រមាថមើលងាយរាល់ថ្ងៃពីសំណាក់របបក្រុងព្យុងយ៉ាង។ ជាការវាយបកវិញ កូរ៉េខាងត្បូងប្រកាសថាខ្លួននឹងបញ្ជូនអាវុធទៅអ៊ុយក្រែនដើម្បីវាយប្រហាររុស្ស៊ីឱ្យណាណីម្ដង។
អាវុធដែលត្រៀមបញ្ជូនទៅនោះមានទាំងអាវុធសម្រាប់ការពារខ្លួន និងអាវុធសម្រាប់វាយប្រហារទៅលើសត្រូវ។ កាលពីមុននេះ របបទីក្រុងសេអ៊ូលមិនដែលធ្វើដល់ថ្នាក់ហ្នឹងទេ។ យ៉ាងខ្លាំងត្រឹមបញ្ជូនជំនួយមនុស្សធម៌ ឬជំនួយអភិវឌ្ឍតែប៉ុណ្ណោះទៅអ៊ុយក្រែន។ ការប្រកាសនេះធ្វើឡើងតាមរយៈជំនួបទ្វេភាគីរវាងថ្នាក់ដឹកនាំកូរ៉េខាងត្បូង និងប៉ូឡូញ។ នាយករដ្ឋមន្ត្រីប៉ូឡូញ លោកឌូដា ក៏កំពុងស្វះស្វែងរកការទិញអាវុធបន្ថែមពីកូរ៉េខាងត្បូងផងដែរដើម្បីពង្រឹងវិស័យការពារជាតិរបស់ខ្លួន៕
ចែករំលែកព័តមាននេះ