ទីក្រុងម៉ានីឡា៖ ខ្យល់ព្យុះត្រាមី (Trami) កំពុងវាយប្រហារប្រទេសហ្វ៊ីលីពីន១ទំហឹង ហើយបង្កជាទឹកជំនន់ និងការបាក់ដីជាច្រើនកន្លែង។ គិតត្រឹមក្បាលព្រលប់ថ្ងៃព្រហស្បតិ៍ ក្រុមអ្នកជួយសង្គ្រោះរកឃើញសាកសពបន្ថែមទៀត ហើយធ្វើឱ្យចំនួនអ្នកស្លាប់សរុបទាំងមុន ទាំងក្រោយ…
ទីក្រុងម៉ានីឡា៖ ខ្យល់ព្យុះត្រាមី (Trami) កំពុងវាយប្រហារប្រទេសហ្វ៊ីលីពីន១ទំហឹង ហើយបង្កជាទឹកជំនន់ និងការបាក់ដីជាច្រើនកន្លែង។ គិតត្រឹមក្បាលព្រលប់ថ្ងៃព្រហស្បតិ៍ ក្រុមអ្នកជួយសង្គ្រោះរកឃើញសាកសពបន្ថែមទៀត ហើយធ្វើឱ្យចំនួនអ្នកស្លាប់សរុបទាំងមុន ទាំងក្រោយ កើនឡើងដល់២៦នាក់។ ក្រៅពីនេះ មនុស្សជាច្រើននាក់ទៀតនៅបាត់ខ្លួននៅឡើយ។
ក្រុមអ្នកជួយសង្គ្រោះកំពុងធ្វើដំណើរជាប្រញាប់ដើម្បីចុះទៅដល់ទីកន្លែងដែលមនុស្សជាច្រើនត្រូវហ៊ុមព័ទ្ធដោយជំនន់ទឹកភ្លៀងយ៉ាងល្ហល្ហាចដោយសារឥទ្ធិពលនៃខ្យល់ព្យុះ។ សាក្សីនិយាយថាភូមិជាច្រើនកន្លែងលិចទៅក្រោមបាតទឹក។ សាលារៀន និងស្ថាប័នរបស់រដ្ឋត្រូវបិទទ្វារនៅទូទាំងភាគខាងជើងហ្វ៊ីលីពីននៅពេលខ្យល់បក់ទៅដល់កោះលូហ្សន (Luzon)។
មន្ត្រីផ្នែកជួយសង្គ្រោះម្នាក់នៅខេត្តបាថាន់ហ្កាស់ (Batangas) ប្រាប់ថាភ្លៀងធ្លាក់ខ្លាំងជាបន្តបន្ទាប់ធ្វើឱ្យទឹកជំនន់មិនត្រឹមតែមិនស្រកទៅវិញទេ ថែមទាំងហក់ឡើងកាន់តែខ្ពស់។ យើងទទួលបានការហៅទូរស័ព្ទចូលច្រើនណាស់ដើម្បីស្នើសុំជំនួយសង្គ្រោះបន្ទាន់។ មន្ទីរពេទ្យ១កន្លែងនៅខេត្តដដែលនេះសម្រេចចិត្តបិទទ្វារលែងទទួលអ្នកជំងឺដែលបញ្ជូនទៅថ្មីៗទៀតព្រោះបន្ទប់ធម្មតា និងបន្ទប់សង្គ្រោះបន្ទាន់ត្រូវទឹកលិចគ្មានសល់។
នៅតំបន់មាត់សមុទ្រកោះលូហ្សនខាងលិច អាជ្ញាធរប្រកាសឱ្យប្រជាជនប្រុងប្រយ័ត្នខ្ពស់ចំពោះរលកសមុទ្រដែលហក់ឡើងខ្ពស់ដល់២ម៉ែត្រ។ ទីតាំងដែលរងគ្រោះខ្លាំងជាងគេគឺតំបន់ប៊ីខូល (Bicol) នៃទីក្រុងណាហ្កា (Naga) ដែលគេរកឃើញសាកសពជនរងគ្រោះរហូតដល់១៤នាក់។ អ្នកខ្លះនៅពេលផ្ទះរបស់ខ្លួនត្រូវទឹកលិចខ្លាំង ពួកគេត្រូវតែបង្ខំចិត្តឡើងទៅសំកុកនៅលើដំបូលផ្ទះដាច់បាយដាច់ទឹកដើម្បីរង់ចាំក្រុមអ្នកជួយសង្គ្រោះទៅដឹកជញ្ជូនពួកគេយកទៅទីកន្លែងសុវត្ថិភាព។
ខ្យល់ព្យុះត្រាមីដែលមានល្បឿន៩៥គីឡូម៉ែត្រក្នុង១ម៉ោងកំពុងបន្តដំណើរទៅភាគខាងលិច ហើយនឹងឆ្លងកាត់តំបន់ព្រៃភ្នំភាគខាងជើងទៅសមុទ្រចិនខាងត្បូង។ ងាកទៅមើលស្ថានភាពនៅវៀតណាមឯណេះវិញ ក្រសួងឧតុនិយមព្យាករថាខ្យល់ព្យុះនឹងបក់ទៅដល់ដែនសមុទ្រវៀតណាមនៅយប់ថ្ងៃព្រហស្បតិ៍។ នៅពេលទៅដល់វៀតណាម ខ្យល់ព្យុះនឹងបន្ថែមល្បឿនរហូតដល់១១៧គីឡូម៉ែត្រក្នុង១ម៉ោង។ ដូច្នេះ វៀតណាមអាចនឹងរងគ្រោះជាថ្មីដោយសារជំនន់ទឹកភ្លៀង និងការបាក់ដីជាបន្តទៀត៕
ចែករំលែកព័តមាននេះ