រាជធានីភ្នំពេញ ៖ ឧត្តមអគ្គានុរក្ស ថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមណ្ឌលអប់រំកែប្រែទី១ (ម១) ឫពន្ធនាគារព្រៃ.ស ដោយមានការអញ្ជើញចូលរួមពីឯកឧត្តម លោកជំទាវ អគ្គនាយករង ប្រធាននាយកដ្ឋាន ព្រះរាជអាជ្ញា លោកអធិការខណ្ឌដង្កោ ប្រធានមណ្ឌលអប់រំកែប្រែ ពន្ធនាគាររាជធានីខេត្ត និងមន្ត្រីពាក់ព័ន្ធ នារសៀលថ្ងៃទី១៨ ខែតុលា ឆ្នាំ២០២៤ នៅសាលប្រជុំមណ្ឌលអប់រំកែប្រែទី១ ។
អគ្គនាយក បានមានប្រសាសន៍ផ្តាំផ្ញើដល់មន្ត្រីក្រោមឱវាទទាំងអស់ឲ្យបន្តយកចិត្តទុកដាក់ខ្ពស់ចំពោះការងារ និងបានដាក់ចេញជាគន្លឹះក្នុងការដឹកនាំដូចខាងក្រោម ៖
១. ត្រូវយកចិត្តទុកដាក់អនុវត្តឲ្យបានម៉ឺងម៉ាត់បំផុត នូវអនុសាសន៍ណែនាំដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត គឺធ្វើការបោសសម្អាតភាពអសកម្មនានា រួមទាំងសម្ភារៈ ហាមឃាត់ និងមានវិធានការម៉ឺងម៉ាត់ដាច់ខាតចំពោះមន្ត្រីទាំងឡាយណា ដែលមានការពាក់ព័ន្ធនឹងសកម្មភាពល្មើស ។
២. ពាក់ព័ន្ធព័ត៌មាន ដែលបានចុះផ្សាយតាមបណ្តាញព័ត៌មានសង្គម ត្រូវសហការស្រាវជ្រាវ រកឬសគល់ នៃបញ្ហាធ្វើការផ្ទៀងផ្ទាត់ព័ត៌មាន និងមានចំណាត់ការឱ្យបានម៉ឺងម៉ាត់បំផុត ។
៣. ពង្រឹងការគ្រប់គ្រងមន្ត្រី ការអនុវត្តមុខងារតួនាទីភារកិច្ច ត្រូវមានភាពស្មោះត្រង់ចំពោះ វិជ្ជាជីវៈរបស់ខ្លួន រក្សាសាមគ្គីភាពផ្ទៃក្នុង ប្រកាន់ខ្ជាប់ នូវក្រមសីលធម៌ និងបទវិន័យមន្ត្រីពន្ធនាគារ ។
៤. បន្តពង្រឹងកិច្ចការពារសន្តិសុខសុវត្ថិភាព ប្រសិទ្ធភាពត្រួតពិនិត្យ ឆែកឆេរ ស៊ើបអង្កេត ស្រាវជ្រាវបង្ការទប់ស្កាត់ការប៉ុនប៉ងលួចលាក់រក្សាទុក ឬនាំសម្ភារៈ ហាមឃាត់ ចូលក្នុងពន្ធនាគារ ។
៥. ពង្រឹងការគោរពអនុវត្តន៍ច្បាប់ នីតិវិធី បទបញ្ជាផ្ទៃក្នុងពន្ធនាគារ និងលិខិតបទដ្ឋាននានា ដែលបម្រើដល់ការងារដឹកនាំគ្រប់គ្រង និងផ្នែកជំនាញនីមួយៗ ។
៦. ប្រធានមណ្ឌលអប់រំកែប្រែ និងពន្ធនាគារ ដែលនឹងជិតដល់ពេលត្រូវចូលនិវត្តន៍ ឬស្ថិត ក្នុងអន្តរកាល នៃការផ្លាស់ប្តូរភារកិច្ច មិនត្រូវមានភាពអសកម្ម ឬបណ្តែតបណ្តោយ ឬធ្វេសប្រហែស ក្នុងការងារដឹកនាំគ្រប់គ្រងអង្គភាពឡើយ
៧. ឯកឧត្តម លោកជំទាវ អគ្គនាយករង ត្រូវបន្តពង្រឹងការងារតាមការបែងចែកភារកិច្ច និងការទទួលខុសត្រូវ និងចុះត្រួតពិនិត្យ ពង្រឹងការងារតាមគោលដៅដែលបានប្រគល់ជូន ។
ឧត្តមអគ្គានុរក្ស ថ្នាក់លេខ១ នុត សវនា អគ្គនាយករង និងជាប្រធានមណ្ឌលអប់រំកែប្រែទី១ថ្មី បានធ្វើការប្ដេជ្ញាចិត្តក្នុងការពង្រឹងមណ្ឌលអប់រំកែប្រែទី១ ជាមណ្ឌលកែប្រែពិតប្រាកដមួយ និងលើកកម្ពស់ក្នុងការគ្រប់គ្រងដឹកនាំការងារប្រចាំថ្ងៃទាំងវិន័យ និងក្រមសីលធម៌របស់មន្ត្រីឲ្យបានខ្ជាប់ខ្ជួន ។
សូមបញ្ជាក់ផងដែរថា កាលពីថ្ងៃទី ១៦ ខែតុលា ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ បានចេញប្រកាសតែងតាំង លោកឧត្តមអគ្គានុរក្សថ្នាក់លេខ ១ នុត សវនា ជាប្រធានមណ្ឌលអប់រំកែប្រែទី ១ បន្ថែមើលមុខតំណែងបច្ចុប្បន្ន ៕
ចែករំលែកព័តមាននេះ