ខេត្តបាត់ដំបង ៖ ភ្ញៀវជាតិនិងអន្តរជាតិយ៉ាងតិចជាង១,១៧លាននាក់បានចូលរួមទស្សនាក្នុងពិធីបុណ្យអុំទូកក្នុងរយៈពេល០២ថ្ងៃ (១៦-១៧,១០,២០២៤) ដែលប្រព្រឹត្តទៅនៅក្នុងដងស្ទឹងសង្កែ ស្ថិតចំកណ្ដាលក្រុងបាត់ដំបង ដែលចំនួននេះមានការកើនឡើងជាងពិធីបុណ្យអុំទូកឆ្នាំ២០២៣ រហូតដល់ទៅ៧,១១% ។ នេះបើយោងតាមរបាយការណ៍មន្ទីរទេសចរខេត្ត…
ខេត្តបាត់ដំបង ៖ ភ្ញៀវជាតិនិងអន្តរជាតិយ៉ាងតិចជាង១,១៧លាននាក់បានចូលរួមទស្សនាក្នុងពិធីបុណ្យអុំទូកក្នុងរយៈពេល០២ថ្ងៃ (១៦-១៧,១០,២០២៤) ដែលប្រព្រឹត្តទៅនៅក្នុងដងស្ទឹងសង្កែ ស្ថិតចំកណ្ដាលក្រុងបាត់ដំបង ដែលចំនួននេះមានការកើនឡើងជាងពិធីបុណ្យអុំទូកឆ្នាំ២០២៣ រហូតដល់ទៅ៧,១១% ។ នេះបើយោងតាមរបាយការណ៍មន្ទីរទេសចរខេត្ត ។
តាមរយៈរបាយការណ៍ លោកអុច អ៊ុំភីនីស្សារ៉ា ប្រធានមន្ទីរទេសចរខេត្តបានឲ្យដឹងថា ពិធីបុណ្យអុំទូករយៈពេល០២ថ្ងៃ គឺថ្ងៃទី ១៦-១៧ តុលា ឆ្នាំ២០២៤ ក្នុងឪកាសចេញវស្សានេះ មានភ្ញៀវជាតិ និងអន្តរជាតិ មកចូលរួមទស្សនាសរុបចំនួន១,១៧២,៨៩៦នាក់ ដែលមានការកើនឡើងេហូតដល់ទៅ៧,១១% បើធៀបទៅនឹងពិធីបុណ្យអុំទូលឆ្នាំ២០២៣កន្លងទៅ ដែលមានភ្ញៀវចូលរួមចំនួន១,០៩៥,០០០នាក់ ។
កត្តាដែលនាំឲ្យភ្ញៀវជាតិ និងអន្តរជាតិ ភ្លូកទឹកភ្លូកដី ចូលរួមទស្សនាពិធីបុណ្យអុំទូកនៅខេត្តបាត់ដំបង មានកើនឡើងពីមួយឆ្នាំទៅមួយឆ្នាំនេះ គឺការរៀបចំកែលំអរសោភ័ណ្ឌភាពក្នុងក្រុង ដែលនាំឲ្យមានការទាក់ទាញខ្លាំងបំផុត ។ ដូចជាការរៀបចំលំអរតាមសួនកម្សាន្ត រៀបចំលំអរតាមដងស្ទឹងសង្កែ (តំបន់ប្រារព្ធពិធីបុណ្យ) ប្រកបដោយភាពបៃតង ការរៀបចំពីព័រណ៏ទំនិញនានា ការប្រគុំតន្ត្រីយ៉ាងអធិកអធ័ម នៅក្នុងពិធីបុណ្យ និងការការពារសន្តិសុខ សណ្ដាប់ធ្នាប់។ល។ នេះបើតាមការលើកឡើងនៅក្នុងរបាយការណ៍មន្ទីរទេសចរខេត្តដែលគោរពជូនរដ្ឋបាលខេត្ត និងគោរពជូនរដ្ឋមន្ត្រីក្រសួងទេសចរណ៍ ។
សូមបញ្ជាក់ថា ពិធីបុណ្យអុំទូកក្នុងឱកាសចេញវស្សានាឆ្នាំនេះ រដ្ឋបាលខេត្តបានរៀបចំឲ្យការប្រណាំងទូកដូចឆ្នាំមុនៗដែរ ។ បើតាមរបាយការណ៍គណៈកម្មការបុណ្យទូក សម្រាប់ពិធីបុណ្យក្នុងឆ្នាំ២០២៤ នេះមានទូកចូលរួមប្រគូតសរុប៤២ទូក ដែលមានកីឡាកចូលរួមចំនួន១,៤៩០នាក់ ក្នុងនោះ កីឡាកបំរុងចំនួន៣៥៧នាក់ ។
ជាមួយនឹងការចូលរួមមិនថមថយពីសំណាក់ប្រជាពលរដ្ឋ ក្នុងពីធីបុណ្យអុំទូក ពីមួយឆ្នាំទៅមួយឆ្នាំបែបនេះ រដ្ឋបាលខេត្តបាត់ដំបងរំពឹងថា ការរៀបចំពិធីបុណ្យនេះ នាឆ្នាំក្រោយៗ នឹងមានការកែលំអរក្នុងពិធីបុណ្យកាន់តែល្អកាន់តែប្រសើរឡើង ហើយភ្ញៀវចូលរួមទស្សនាកាន់តែច្រើន ទាំងភ្ញៀវជាតិនិងអន្តជាតិ៕
ចែករំលែកព័តមាននេះ