ទីក្រុងកៀវ៖ ប្រធាធិបតីអ៊ុយក្រែន លោកហ្សេឡិនស្គី ថ្លែងថាប្រទេសជាតិរបស់លោកអាចនឹងមានសន្តិភាពឡើងវិញយ៉ាងយូរត្រឹមឆ្នាំ២០២៥បើផែនការជ័យជម្នះអាចអនុវត្តបានជោគជ័យ។ ក៏ប៉ុន្តែមានចំណុច១ដែលក្រុមសម្ព័ន្ធមិត្តលោកខាងលិចមិនយល់ស្របទេ។ នោះគឺការទទួលយកអ៊ុយក្រែនជាសមាជិកអង្គការណាតូនៅពេលសង្គ្រាមមិនទាន់បញ្ចប់ទៅវិញទេ។
លោកហ្សេឡិនស្គីថ្លែងនៅក្នុងរដ្ឋសភាថាបើយើងចាប់ផ្ដើមអនុវត្តផែនការនេះចាប់ឥឡូវនេះទៅ ប្រហែលជាមិនហួសឆ្នាំក្រោយទេយើងអាចបញ្ចប់សង្គ្រាមបានហើយ។ លោកទើបតែយកផែនការនេះទៅបង្ហាញក្រុមប្រទេសលោកខាងលិច។ ប៉ុន្តែពួកគេមិនទាន់ប្រកាសថាយល់ព្រមកម្រិតណាទេ។ នៅក្នុងចំណោមផែនការទាំង៥ចំណុចដែលប្រកាសជូនរដ្ឋសភានោះ ចំណុចទី១អាចជាផែនការដែលមានមហិច្ឆតាខ្ពស់ជាងគេដែលក្រុមបស្ចិមប្រទេសពិបាកនឹងគាំទ្រ។
នៅពេលក្រុមបស្ចិមប្រទេសនិយាយមិនដាច់ពីមាត់ថាខ្លួននឹងបន្តគាំទ្រអ៊ុយក្រែនដោយឥតដកថយ លោកហ្សេឡិនស្គីមិនចង់ឃើញពួកគេនិយាយតែមាត់ទទេបែបនេះឡើយ។ លោកយល់ថាបើពួកគេចិត្តសឿងមែនគួរតែទទួលយកអ៊ុយក្រែនជាសមជិកអង្គការណាតូទាំងកំពុងមានសង្គ្រាមទើបជាការល្អ លោកយល់ថាទាល់តែបែបហ្នឹងទើបបញ្ជាក់ច្បាស់ថាក្រុមបស្ចិមប្រទេសពិតជាតាំងចិត្តជួយអ៊ុយក្រែនឱ្យអស់ពីចិត្តពីថ្លើមមែន។
ជាគោលការណ៍របស់អង្គការណាតូ រាល់ការសម្រេចចិត្តណាមួយអាចយកជាការបានលុះត្រាតែឆ្លងកាត់ការអនុម័តជាឯកច្ឆន្ទ។ មានន័យថាគ្មានសមាជិកណាមួយបោះឆ្នោតជំទាស់។ អាល្លឺម៉ង់ និងអាមេរិកយល់ថានៅពេលអ៊ុយក្រែនកំពុងជាប់ដៃធ្វើសង្គ្រាមបែបនេះ បើណាតូទទួលយកអ៊ុយក្រែនជាសមាជិកហាក់ដូចជាមិនសមទំនងទាល់តែសោះ។ បើដូច្នេះមែនអាចនឹងអូសទាញណាតូឱ្យផ្ទុះសង្គ្រាមជាមួយប្រទេសរុស្ស៊ីក៏អាចថាបានដែរ។
នៅឯកិច្ចប្រជុំកំពូលណាតូនៅវ៉ាស៊ីនតោនកាលពីខែកក្កដា សមាជិកទាំង៣២ប្រទេសប្រកាសថាខ្លួនត្រៀមទទួលយកអ៊ុយក្រែនដោយគ្មានប្រែក្រឡាស់ទេ។ សំខាន់ត្រូវតែរកវិធីបញ្ចប់សង្គ្រាមជាមុនសិន។ ឥឡូវនេះ ណាតូមិនទាន់អាចនិយាយអ្វីជាបន្តទៀតទេពាក់ព័ន្ធនឹងបញ្ហានេះ។ លុះត្រាតែក្រោយកិច្ចប្រជុំកំពូលណាតូនៅហូឡង់នាខែមិថុនា ឆ្នាំ២០២៥ជាមុនសិន។
សព្វថ្ងៃនេះ អ៊ុយក្រែនកំពុងតែពិបាកទប់ទល់នឹងកម្លាំងយោធារបស់រុស្ស៊ី។ ជាពិសេសនៅតំបន់ដូញ៉ែត (Donetsk)ដែលអ៊ុយក្រែនត្រូវតែបង្ខំចិត្តដកថយជាបន្តបន្ទាប់។ ដូច្នេះ អ៊ុយក្រែនពិតជាត្រូវការការជួយជ្រោមជ្រែងពីក្រុមបស្ចិមប្រទេសឱ្យបានពេញទំហឹងទើបអាចមានសង្ឃឹមថាទប់ជាប់។ ប៉ុន្តែខុសពីការរំពឹងទុកនេះ បស្ចិមប្រទេសចាប់ផ្ដើមរយាលដៃបន្តិចម្ដងៗ។
នេះជាលើកទី១ដែលលោកហ្សេឡិនស្គីប្រកាសទទួលស្គាល់ជាចំហថានៅក្នុងការជជែកគ្នាជាលក្ខណៈឯកជនកាលពីពេលថ្មីៗនេះ ក្រុមបស្ចិមប្រទេសចាប់ផ្ដើមជំរុញឱ្យអ៊ុយក្រែនចរចាគ្នាជាមួយរុស្ស៊ីដើម្បីបញ្ចប់សង្គ្រាម។ ពួកគេមិនចង់ឱ្យប្រើពាក្យ «យុត្តិធម៌» តទៅទៀតទេនៅក្នុងការចរចាគ្នានេះ។ មានន័យថាបើត្រូវកាត់ទឹកដីឱ្យគេក៏គួរតែកាត់ដើម្បីជាថ្នូរនឹងសន្តិភាព។
ប៉ុន្តែរុស្ស៊ីបាននិយាយរួចហើយថាទោះបីអ៊ុយក្រែនយល់ព្រមតាមលក្ខខណ្ឌរបស់រុស្ស៊ីក៏ដោយ ចំណុចសំខាន់មួយគឺថារុស្ស៊ីមិនអាចបណ្ដោយឱ្យអ៊ុយក្រែនចូលជាសមាជិកអង្គការណាតូជាដាច់ខាត។ អ៊ុយក្រែនត្រូវតែជាប្រទេសគ្មានកងទ័ព និងមិនចូលបក្សសម្ព័ន្ធណាទាំងអស់។ បើមិនអីចឹងទេអ៊ុយក្រែនមិនអាចនៅសុខបានឡើយ។ ដូច្នេះកុំសង្ឃឹមថាកាត់ទឹកដីខ្លះឱ្យរុស្ស៊ីដើម្បីឱ្យមានកិច្ចព្រមព្រៀងសន្តិភាព។ រួចហើយចូលជាសមាជិកអង្គការណាតូដើម្បីជាយ័ន្តការពារខ្លួន។ យុទ្ធសាស្ត្រនេះមិនអាចទៅរួចទេ។ រុស្ស៊ីនៅតែបន្តរករឿងជារៀងរហូត។
នៅក្នុងផែនការជ័យជម្នះនោះមានផ្នែកខ្លះត្រូវរក្សាទុកជាការណ៍សម្ងាត់ដែលលោកហ្សេឡិនស្គីមិនបានយកទៅជម្រាបជូនរដ្ឋសភាទេ។ ចំណុចខ្លះនិយាយអំពីការបន្តវាយប្រហារទៅលើប្រទេសរុស្ស៊ីរួមទាំងការវាយឆ្មក់ចូលតាមតំបន់ខឺស (Kursk) ដែលចាប់ផ្ដើមកាលពីខែសីហា និងការបញ្ជូនហ្វូងយន្តហោះដ្រូនវាយប្រហារហេដ្ឋារចនាសម្ព័ន្ធរបស់រុស្ស៊ី។ លោកហ្សេឡិនស្គីត្រូវការប្រព័ន្ធការពារដែនអាកាសបន្ថែមទៀត និងត្រូវការព័ត៌មានសម្ងាត់ដែលផ្ដល់ដោយក្រុមសម្ព័ន្ធមិត្ត៕
ចែករំលែកព័តមាននេះ