ខេត្តព្រៃវែង ៖ ដើម្បីចូលរួមអបអរ ពិធីបុណ្យអុំទូក អកអំបុក សំពះព្រះខែ ដែលនឹងចូលមកដល់ក្នុងពេលឆាប់ៗនេះ និងដើម្បីបង្កើតបរិយាកាសសប្បាយរីករាយជូនដល់ប្រជាពលរដ្ឋក្នុងខេត្តផងនោះ រដ្ឋបាលខេត្តព្រៃវែង បានបង្កើតព្រឹត្តិការណ៍ប្រណាំងទូកដ៏ធំមួយ…
ខេត្តព្រៃវែង ៖ ដើម្បីចូលរួមអបអរ ពិធីបុណ្យអុំទូក អកអំបុក សំពះព្រះខែ ដែលនឹងចូលមកដល់ក្នុងពេលឆាប់ៗនេះ និងដើម្បីបង្កើតបរិយាកាសសប្បាយរីករាយជូនដល់ប្រជាពលរដ្ឋក្នុងខេត្តផងនោះ រដ្ឋបាលខេត្តព្រៃវែង បានបង្កើតព្រឹត្តិការណ៍ប្រណាំងទូកដ៏ធំមួយ ដែលមានរយៈពេល ២ថ្ងៃគឺនៅថ្ងៃទី១៦ និង១៧ ខែតុលា ដែលការប្រណាំងនេះ គឺធ្វើឡើងនៅចំណុចចុងប៉ម ខាងមុខសាលាខេត្តព្រៃវែងតែម្ដង ។
យោងតាមរបាយការណ៍របស់រដ្ឋបាលខេត្តព្រៃវែង បានឲ្យដឹងថា ទូកង ដែលបានចូលរួមប្រណាំងមានចំនួន ៦៣ទូក ក្នុងនោះរួមមាន ទូកង ខ្នាតអន្តរជាតិមានចំនួន ៤៧ទូក ក្នុងនោះចំណុះពិត ១,០៣៤នាក់ ចំណុះត្រៀម ២៨២នាក់ ទូកងខ្នាតវែងមានចំនួន ១៦ទូក មានចំណុះពិត ១,១៩៣នាក់ ចំណុះត្រៀម ២៣០នាក់។ សរុបទូកទាំងខ្នាតវែង និងខ្នាតអន្តរជាតិ មានចំនួន ៦៣ទូក ដែលមានចំណុះពិត និងចំណុះត្រៀមសរុបទាំងអស់ ចំនួន ២,៧៤៩នាក់ ។
ចំពោះដំណើរការ នៃការប្រណាំង មានរយៈពេល ២ថ្ងៃ គឺថ្ងៃទី១៦ អុំចំនួន ៤ជើង ព្រឹក អុំពីរជើង ប្ដូរខ្សែទឹក និងពេលរសៀលអុំ ២ជើង ប្ដូរខ្សែទឹកដូចគ្នា នឹងថ្ងៃទី១៧ គឺអុំ ចំនួនមួយជើង និងពេលរសៀលអុំ មួយជើងទៀត ដោយប្ដូរខ្សែទឹកផ្តាច់ព្រាត់តែម្តង ។
ក្រៅពីការប្រណាំងទូកនេះ នៅពេលរាត្រី រដ្ឋបាលខេត្តព្រៃវែង ក៏បានបង្កើតនូវកម្មវិធីកម្សាន្តសប្បាយជាច្រើនប្រភេទទៀត សម្រាប់បង្កើតបរិយាកាសសប្បាយរីករាយ ជូនដល់បងប្អូនប្រជាពលរដ្ឋក្នុងខេត្ត ក៏ដូចជាភ្ញៀវជាតិ និងអន្តរជាតិទាំងអស់ ដែលបានមកចូលរួមលេងកម្សាន្ត នៅក្នុងទឹកដីខេត្តព្រៃវែងរយៈពេល ២ ថ្ងៃនេះ ៕
ចែករំលែកព័តមាននេះ