រាជធានីភ្នំពេញ ៖ ម៉ូតូចំនួន២គ្រឿង ជិះគ្នា៤នាក់ បានបើកបត់ត្រលប់ក្រោយ ស្រាប់តែមានម៉ូតូ ១គ្រឿងទៀត ជិះម្នាក់ឯង ក្នុងទិសដៅស្របគ្នាដែរ និងបើកលឿន ទៅដល់បុកពេញទំហឹង បណ្ដាលឲ្យរងបួសធ្ងន់ ៣នាក់ និងស្រាល ២នាក់ ហើយម៉ូតូទាំង ៣គ្រឿង បានរងការខូចខាតដូចគ្នាផងដែរ ។
ឧប្បត្តិហេតុនោះបានកើតឡើងកាលពីវេលាម៉ោង១១និង២៥នាទីព្រឹកថ្ងៃទី១៦ ខែតុលា ឆ្នាំ២០២៤ នៅតាមផ្លូវជាតិលេខ៣ ត្រង់ចំណុចមុខស្ថានីយ៍ប្រេងឥន្ធនៈសមប្រាថ្នា ស្ថិតនៅក្នុងភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះ ពុំត្រូវបានស្គាល់អត្តសញ្ញាណនោះទេ ក្នុងនោះឪពុកបាក់ជើងឆ្វេង(ឆ្អឹងចេញក្រៅ) កូនស្រីបែកមុខបែកមាត់ និងចៅប្រុសរលាត់ដៃជើង ហើយត្រូវបានក្រុមសង្គ្រោះអង្គភាព៧១១ ដឹកយកទៅកាន់មន្ទីរពេទ្យ ដើម្បីសង្គ្រោះបន្ទាន់ ចំណែកឯ២នាក់ទៀតជិះម៉ូតូម្នាក់១គ្រឿង របួសស្រាល ។
បើតាមអ្នកស្ថិតនៅជិតកន្លែងគ្រោះថ្នាក់នេះ បានប្រាប់ឲ្យដឹងថា នៅមុនពេលកើតហេតុ បុរសដែលរងរបួសបាក់ជើង បានជិះម៉ូតូម៉ាកហុងដាឌ្រីមសេ១២៥ ពណ៍ខ្មៅ ១គ្រឿង ពាក់ស្លាកលេខកំពង់ស្ពឺ 1S-0874 ដឹកកូនស្រី និងចៅប្រុស។ ធ្វើដំណើរក្នុងទិសដៅពីជើងទៅត្បូង ស្របគ្នាជាមួយម៉ូតូ ១គ្រឿងទៀត ម៉ាក Ginio ពណ៍ខ្មៅ ពាក់ស្លាកលេខភ្នំពេញ 1KC-4161 ជិះដោយសិស្សប្រុសម្នាក់ ។
ប្រភពដដែល បានឲ្យដឹងបន្តទៀតថា លុះពេលទៅដល់ត្រង់ចំណុចកើតហេតុ ម៉ូតូទាំង២គ្រឿង បានបត់ឆ្វេងត្រលប់ក្រោយ ស្រាប់តែមានម៉ូតូ ១គ្រឿងទៀត ម៉ាកហុងដាឌ្រីមសេ១២៥ ស៊េរីឆ្នាំ២០២៤ ពណ៍ខ្មៅ ពាក់ស្លាកលេខភ្នំពេញ 1KR-6170 បើកបរដោយសិស្សសាលាម្នាក់ ក្នុងល្បឿនលឿនទៅដល់បុកពេញទំហឹង បណ្ដាលឲ្យមានគ្រោះថ្នាក់តែម្ដង ប៉ុន្តែសិស្សដែលជាអ្នកបង្ករងរបួសស្រាលនិងត្រូវបាននគរបាលឃាត់ខ្លួន រីឯសិស្ស ដែលជិះម៉ូតូម៉ាក Gino ក៏រងរបួសស្រាបលដែរ ។
ប្រភពខាងលើបានឲ្យដឹងទៀតថា ក្រោយពេលកើតហេតុ នគរបាលប៉ុស្តិ៍ចោមចៅទី៣ និងនគរបាលខណ្ឌពោធិ៍សែនជ័យ បានធ្វើការវាស់វែង និងនាំយកម៉ូតូទាំង ៣គ្រឿង ទៅរក្សាទុក រង់ចាំការដោះស្រាយនៅពេលក្រោយ ៕
ចែករំលែកព័តមាននេះ